2 Kevcai Lus Tawqhia
Lus Tawqhia
Phau 2 Kevcai no yog Mauxes sau rau cov Yixalayees thaum lawv tseem nyob hauv tebchaws Mau-am, qhov chaw uas lawv taug kev ntev loo hla tiaj suabpuam los xaus, thiab hla mus rau tebchaws Kana-as.
Tej zaj tseemceeb uas muab sau rau hauv phau no yog: (1) Mauxes rovqab hais txog tej xwmtxheej tseemceeb uas tshwmsim plaubcaug xyoo tag los. Nws nquahu kom cov Yixalayees ncontsoov qhov uas Vajtswv tau coj lawv hla tiaj suabpuam los, kom lawv mlooglus, thiab muab siab npuab Vajtswv. (2) Mauxes rov tshab txog Kaum Nqe Kevcai thiab hais txog lub ntsiablus ntawm Thawj nqe Kevcai, kom cov Yixalayees pehawm tus TSWV tibleeg xwb. Dhau ntawd, nws hais txog tej nqe kevcai tswjhwm rau cov Yixalayees uas nyob rau hauv lub tebchaws uas Vajtswv tau coglus tseg yuav muab rau lawv. (3) Mauxes rov nquahu kom cov Yixalayees ncontsoov Vajtswv tej lus cogtseg thiab rov coglus dua tshiab kom ua rawsli tej lus cogtseg ntawd. (4) Tsa Yausuas ua tus coj Vajtswv haivneeg mus lawm yav tomntej. Tomqab hu ib zaj nkauj qhuas Vajtswv txoj kev ncajncees tag, thiab thov Vajtswv foom koobhmoov rau cov Yixalayees, ces Mauxes txawm tuag rau hauv tebchaws Mau-am, ntawm ntug Dej Yauladees sab hnubtuaj lawm.
Lub ntsiablus tseemceeb hauv phau ntawv no yog Vajtswv tau cawm thiab foom koobhmoov rau Nws haivneeg uas Nws tau xaiv thiab hlub; kom lawv yuavtsum ncontsoov tej no, yuavtsum hlub Vajtswv thiab mloog Nws lus, kom lawv thiaj tau koobhmoov mus li thiab muaj sia nyob ntev.
Nqe tseemceeb ntawm phau ntawv no yog 6:4-6, uas yog muaj cov ntsiablus uas Yexus tau hais tias yog nqe tseemceeb tshajplaws ntawm txhua nqe kevcai: “Nej yuavtsum hlub tus TSWV, uas yog nej tus Vajtswv, kom kawg siab kawg ntsws, kawg plab kawg plawv, thiab kawg dag kawg zog.”
Txheejtxheem
Mauxes qhia thawjzaug (1:1—4:49)
Mauxes qhia zaum thib ob (5:1—26:19)
a. Kaum Nqe Kevcai (5:1—10:22)
b. Kevcai, kev tswjhwm, thiab kev ceebtoom (11:1—26:19)
Qhia txog kev mus tebchaws Kana-as (27:1—28:68)
Nrog Vajtswv sib coglus dua (29:1—30:20)
Mauxes tej lus zaum kawg (31:1—33:29)
Mauxes txoj kev tuag (34:1-12)
Currently Selected:
2 Kevcai Lus Tawqhia: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.