2 Kevcai 10

Mauxes Rov Tau Txais Kaum Nqe Kevcai Dua

(Khiav Dim 34:1-10)

1“Tomqab ntawd tus TSWV hais rau kuv tias, ‘Koj ciali txaug ob daim txiag zeb uas zoo ib yam li thawj ob daim thiab ua ib lub Phijxab ntoo ntim rau es ciali tuaj cuag Kuv saum roob. 2Kuv yuav rov sau tej lus uas Kuv twb xub sau rau ob daim txiag zeb uas koj muab ntsawm tawg tas lawm rau hauv ob daim txiag zeb ntawd. Koj yuav tau muab ntim rau hauv lub Phijxab ntawd.’

3“Yogli ntawd, kuv thiaj muab ntoo kubtwg txua tau ib lub Phijxab thiab txaug tau ob daim txiag zeb zoo ib yam li thawj ob daim thiab nqa mus saum roob. 4Ces Tus TSWV thiaj rov sau dua cov lus uas Nws twb sau thawjzaug lawm rau hauv ob daim txiag zeb tshiab ntawd. Tej lus ntawd yog Kaum Nqe Kevcai uas thaum nej mus sibsau uake rau ntawm lub roob es Nws haislus hauv cov nplaimtaws tuaj rau nej. Tus TSWV muab ob daim txiag zeb ntawd rau kuv, 5ces kuv thiaj nqis saum roob los thiab muab ob daim txiag zeb ntawd ntim rau hauv lub Phijxab uas kuv ua, rawsli tus TSWV tau xaaj rau kuv lawm. Ob daim txiag zeb ntawd tseem nyob hauv lub Phijxab los txog nimno.”

( 6Cov Yixalayees khiav tawm ntawm cov neeg Ya-akas tej qhovdej los nyob rau ntawm Mauxelas. Aloos tau tuag thiab lawv muab nws log rau ntawd; nws tus tub Ele-axas thiaj sawv los ua povthawj hlob hloov nws chaw. #Teev 20:28; 33:38 7Tomqab ntawd lawv thiaj khiav mus rau Nkunkaudas, thiab dhau ntawd mamli mus nyob rau hauv Yaunpathas, uas yog ib thaj chaw muaj dej ntau heev. 8Lub sijhawm ntawd tus TSWV tau tsa xeem Levis ua cov kwv lub Phijxab Lus Cogtseg, tsa lawv ua cov povthawj hlob uas ua Nws tes haujlwm, thiab ua cov tuav Nws lub npe foom koobhmoov rau sawvdaws. Lawv tseem ua li ntawd los txog niajhnub no. #Teev 3:5-8 9Yogli ntawd xeem Levis thiaj tsis tau txais ib thaj av li lwm xeem tau txais; qhov lawv tau txais yog lawv tau ua tus TSWV cov povthawj hlob, rawsli tus TSWV, uas yog nej tus Vajtswv, tau coglus tseg lawm.)

10“Kuv nyob saum roob tau plaubcaug hnub plaubcaug hmo ib yam li thawjzaug. Tus TSWV mloog kuv tej lus thov dua ib zaug, Nws thiaj tsis ua rau nej puastsuaj. #Khiav 34:28 11Nws hais kom kuv ciali mus thiab coj nej mus, nej thiaj tau mus nyob hauv lub tebchaws uas Nws tau coglus tseg yuav muab rau nej cov yawgkoob nyob.

Yam Uas Vajtswv Xav Kom Ua

12“Zaumno, ibtsoom Yixalayees 'e, nej ciali ua tibzoo mloog seb tus TSWV, uas yog nej tus Vajtswv, xav kom nej ua dabtsi? Nws xav kom nej hwm Nws, ua txhua yam rawsli Nws lub siab nyiam, hlub Nws, thiab ua Nws tes haujlwm kawg siab kawg ntsws, 13thiab coj rawsli Nws tej kevcai txhua nqe uas hnubno kuv muab cob rau nej, kom thiaj yuav muajnqis rau nej.

14“Saib maj, lub ntuj uas siab kawg nkaus yog tus TSWV li, lub ntiajteb thiab ibpuas tsavyam uas nyob hauv los puavleej yog Nws tug huv tibsi. 15Tiamsis tus TSWV hlub nej cov yawgkoob heev, Nws thiaj xaiv nej, uas yog lawv li cajces, los ua Nws haivneeg; Nws twb tsis xum xaiv lwm haivneeg es nimno nej thiaj tseem yog haivneeg uas Nws xaiv. 16Yogli ntawd, txij no mus nej yuavtsum mloog tus TSWV lus, thiab tsis txhob tawv ncauj lawm.

17“Tus TSWV uas yog nej tus Vajtswv, yog tus Vajtswv ntawm txhua tus nyuag vajtswv thiab yog tus Tswv ntawm txhua tus tswv huv tibsi. Nws yog tus uas loj thiab muaj hwjchim kawg nkaus, sawvdaws yuavtsum hwm thiab paub ntshai Nws. Nws tsis xaiv leejtwg ntsejmuag thiab tsis yuav leejtwg tej nyiaj xiab. #1Tim 6:15; Tshwm 17:14; 19:16; Teshl 10:34; Loos 2:11; Kalat 2:6; Efex 6:9 18Nws tsomkwm cov menyuam ntsuag thiab tej pojntsuam tsis pub leejtwg ua phem rau lawv; Nws hlub lwm haivneeg uas nrog nej nyob. Nws pub lawv muaj tsoostsho hnav thiab muaj zaub-mov noj. 19Yogli ntawd, nej yuavtsum hlub lwm haivneeg, rauqhov yav tas los nej twb txeev ua neeg txawv tebchaws uas nyob hauv lub tebchaws Iziv thiab. 20Yuavtsum hwm tus TSWV, uas yog nej tus Vajtswv, thiab pehawm Nws tibleeg xwb. Yuavtsum ncajncees rau Nws thiab tuav Nws lub npe coglus xwb. 21Yuavtsum qhuas Nws, rauqhov Nws yog nej tus Vajtswv. Nej lub qhovmuag twb pom tej txujci tseemceeb uas Nws tau ua pab nej los lawm. 22Thaum ub nej cov yawgkoob mus nyob hauv tebchaws Iziv, lawv tsuas muaj xyacaum leej xwb, tiamsis nimno tus TSWV, uas yog nej tus Vajtswv, tau pub rau nej huamvam coob ib yam li tej hnubqub saum nruabntug lawm. #Chiv 46:27; Chiv 15:5; 22:17

Currently Selected:

2 Kevcai 10: MWW2022

Highlight

Copy