Tes Haujlwm 24

Cov Yudais Kom Paulus

1Tsib hnub tomqab ntawd, Ananias uas yog tus Tuam Povthawj Hlob, nrog rau ob-peb tug txwjlaug thiab ib tug txivneej uas hais plaubntug hu ua Tetulus, lawv mus rau pem lub nroog Xixaleyas. Lawv txawm mus cuag Felis uas yog tus Tswvxeev thiab kom Paulus rau nws. 2Lawv thiaj hu Paulus los, ces Tetulus txawm pib kom Paulus rau Felis hais tias:

“Hawm txog tus Tswvxeev Felis. Peb nyob ywjxeeb los tau ntau lub xyoo twb yog vim koj yog ib tug thawjcoj uas ntse heev, thiab peb lub teb lub chaw muaj kev txhimkho ntau yam zoo vim yog koj txoj kev xam pom deb. 3Peb yeej txaussiab rau txhua yam uas koj ua nyob rau txhua qhov thiab txhua lub sijhawm, thiab peb yuav ncontsoov koj txiajntsig mus li. 4Kuv tsis xav nkim koj lub sijhawm, yogli ntawd, kuv thov koj ua siabntev mloog lo puav lus uas peb yuav hais rau koj no.

5“Peb pom tias tus txivneej no yog ib tug uas nyiam tsim teebmeem heev; nws pib ua teebmeem rau cov Yudais uas nyob thoob qabntuj, thiab nws tseem yog ib tug thawjcoj ntawm cov Naxalev pab thiab. 6Tsis tas li ntawd xwb, nws tseem yuav ua kom lub Tuamtsev tsis dawbhuv thiab, yogli ntawd peb thiaj ntes nws. 7#24:7: Tej phau ntawv qub uas xuas tes sau, ntxiv nqe 6b-8a no rau: Peb yeej yuav txiavtxim rau nws rawsli peb txoj kevcai, 7 tiamsis tus thawj tubrog pawg txhiab uas yog Lixias txawm tuaj tawmtsam peb hnyav heev thiab txeeb Paulus ntawm peb tes mus lawm. 8 Ces Lixias txawm hais rau cov neeg uas kom Paulus kom tuaj hais timntsej timmuag ntawm koj. 8Yog koj taug tus txivneej no zaj, koj yuav paub qhov tseeb ntawm txhua yam uas peb hais txog nws.” 9Cov Yudais puavleej koomsiab kom Paulus thiab hais tias txhua yam ntawd yeej muaj tseeb tiag.

Paulus Hais Daws Nws Zaj Tabmeeg Felis

10Thaum tus tswvxeev ncaws hau kom Paulus hais, Paulus txawm hais tias:

“Kuv paub tias koj yog ib tug uas txiavtxim ntawm lub tebchaws no los tau ntau xyoo, kuv zoosiab hais daws kuv zaj rau koj mloog. 11Yog koj tshawb saib, koj yuav pom tias txij hnub uas kuv mus pehawm Vajtswv saum lub nroog Yeluxalees los txog rau hnubno, twb tsis tau dhau kaum-ob hnub. 12Cov Yudais yeej tsis tau pom kuv nrog leejtwg sibcav hauv lub Tuamtsev, lossis pom kuv ua rau cov pejxeem kubntxhov tsis hais hauv tej tsev sablaj lossis ib qhov chaw twg nyob hauv nroog li. 13Tej lus uas lawv kom kuv rau koj no, lawv twb nrhiav tsis tau ib qhov nyuag puavpheej uas yuav siv los tawmtsam kuv li.

14“Txawm li ntawd los, kuv thov lees ib qho rau koj hais tias, kuv yeej pehawm peb cov yawgkoob tus Vajtswv uas yog coj rawsli Txojkev ntawd qhia, qhov ntawd yog qhov uas lawv hais tias cuav xwb. Tiamsis kuv kuj ntseeg txhua lo uas sau tseg rau hauv Mauxes txoj Kevcai thiab hauv tej ntawv uas cov xibhwb cev Vajtswv lus tau sau tseg lawm huv tibsi. 15Kuv ciasiab rau Vajtswv ib yam li lawv ciasiab thiab, hais tias txhua tus neeg, tsis hais tus zoo los tus phem, puavleej yuav sawv rovqab los. 16Yogli ntawd, kuv thiaj muab siab rau ua kuv lub neej kom haum Vajtswv siab thiab haum neeg siab txhua lub sijhawm.

17“Tomqab uas kuv tawm hauv lub nroog Yeluxalees mus tau ntau xyoo lawm, kuv tau rovqab los rau hauv lub nroog Yeluxalees uas yog coj mentsis nyiaj los pub rau kuv haivneeg thiab muab tsiaj tua hlawv fij rau Vajtswv. #Teshl 21:17-28 18Thaum kuv ua kevcai ntxuav tag, kuv tabtom muab tsiaj tua hlawv fij rau Vajtswv hauv lub Tuamtsev, ces lawv txawm tuaj pom kuv. Thaum ntawd yeej tsis muaj neeg coob nrog kuv nyob uake thiab tsis muaj kev kubntxhov dabtsi li. 19Tiamsis muaj ib cov Yudais uas tuaj pem lub xeev Exias tuaj, kuj nyob rau ntawd. Yog lawv muaj dabtsi uas tsis txaussiab rau kuv, tsimnyog lawv tuaj kom kuv rau koj ntawm no. 20Lossis kom cov neeg uas nyob ntawm no hais seb, thaum kuv qhia kuv zaj rau cov Yudais tej nomtswv mloog, lawv ho pom kuv ua txhaum dabtsi. 21Tsuas tshwj thaum kuv sawv tabmeeg lawv, kuv tau hais ib los li no hais tias: ‘Hnubno nej taug kuv zaj twb yog vim kuv ntseeg tias cov neeg uas tuag lawm yuav sawv rov los muaj txojsia.’ ” #Teshl 23:6

22Felis yeej paub txog Txojkev ntawd zoo, nws thiaj muab rooj plaub ntawd ncua. Nws hais rau sawvdaws hais tias, “Tos Lixias uas yog tus thawj tubrog pawg txhiab tuaj txog tso, kuv mamli txiavtxim rau nej rooj plaub no.” 23Felis kom tus thawj tubrog pawg pua zov Paulus zoo-zoo, tiamsis kom muab qeeyam kev ywjpheej rau Paulus, thiab tsocai rau nws cov phoojywg tuaj tu nws rawsli nws txoj kev cheemtsum.

Paulus Hais Rau Felis Thiab Nruxilas Mloog

24Ob-peb hnub tomqab ntawd, Felis thiab nws tus pojniam Nruxilas, uas yog neeg Yudais txawm uake tuaj. Nws kom lawv coj Paulus los ntsib nkawd thiab kom Paulus qhia txog kev ntseeg Yexus Khetos rau nkawd mloog. 25Tiamsis thaum Paulus qhia txog txoj kev ncajncees, kev tswj yus tuskheej, thiab txoj kev txiavtxim uas yuav muaj los yav tomntej, ces Felis txawm ntshai, nws thiaj hais rau Paulus hais tias, “Koj mus tau lawm lau, lwmhnub kuv khoom tso kuv mamli rov hu koj tuaj dua.” 26Tiblub sijhawm ntawd Felis pheej xav tias Paulus yuav muab nyiaj rau nws, vimli ntawd nws thiaj pheej hu kom Paulus mus nrog nws tham ob-peb zaug.

27Tomqab dhau ob xyoos lawm, Paukius Fexatus los ua tus tswvxeev hloov Felis chaw. Felis xav kom cov Yudais nyiam nws, nws thiaj cia Paulus kaw nyob rau hauv tsev lojcuj.

Currently Selected:

Tes Haujlwm 24: MWW2022

Highlight

Copy