Tes Haujlwm 20

Paulus Mus Tim Makedaunias Thiab Akhayas

1Tomqab uas txoj kev kubntxhov ntawd tus lawm, Paulus txawm hu cov ntseeg tuaj uake, nws haislus txhawb lawv zog thiab haislus ncaim lawv, ces nws txawm mus rau Makedaunias lawm. 2Thaum nws taug kev mus, nws qhia ntau zaj txhawb cov neeg uas nyob hauv tej cheebtsam ntawd lub zog. Ces nws txawm mus txog lub xeev Akhayas, 3thiab nyob ntawd tau peb hlis. Thaum nws tabtom yuav caij nkoj mus rau tim xeev Xilias, nws hnov tias cov Yudais tuavhauv yuav ua phem rau nws, nws thiaj txiavtxim siab rovqab mus hla pem lub xeev Makedaunias mus.

4Cov neeg uas nrog Paulus mus yog Pilaus tus tub Xaupataws uas nyob hauv Npele-as, Alitakhaus thiab Xekudus uas nyob hauv Thexalaunikes; Nkai-us uas nyob hauv Dawnpis; Tikhikus thiab Rhaufimus uas nyob hauv Exias; thiab Timautes. 5Lawv cov ntawd xub uantej mus nyob rau hauv lub nroog Rhau-as tos peb. 6Tomqab ua Kevcai Noj Ncuav Tsis Xyaw Keeb tag, peb txawm caij nkoj tawm hauv lub nroog Filipis mus. Peb mus tau tsib hnub mamli mus txog lub nroog Rhau-as, thiab peb nyob ntawd tau xya hnub.

Paulus Mus Saib Lub Nroog Rhau-as Zaum Kawg

7Thawj hnub#20:7: Thawj hnub; lossis Hnubkaj. ntawm lub limtiam, peb tuaj sibsau uake uas yog tuaj ua kevcai noj tus Tswv Rooj Mov. Paulus tau qhuabqhia rau cov neeg ntawd mloog, nws qhia ntev loo mus txog ib taghmo, rauqhov hnub tomqab ntawd xwb ces nws yuav tau ncaim lawv mus. 8Chav tsev txheej saud uas peb sablaj ntawd, lawv taws ntau lub teeb.

9Muaj ib tug hluas hu ua Yutikhus, nws nyob ntawm lub qhovrais. Thaum Paulus qhia ntev loo mus ntxiv, Yutikhus txawm tsaugzog zujzus tuaj; thaum kawg nws ciali loojhlias thiab poob nroos ntawm lub qhovrais txheej tsev thib peb rau hauv av. Thaum lawv mus tsa nws, ces nws twb tuag lawm. 10Tiamsis Paulus txawm nqis kiag mus, khoov ntshis thiab puag nkaus tus hluas ntawd, thiab hais tias, “Tsis txhob txhawj, nws tseem ciajsia!” 11Ces Paulus thiaj nce rov mus rau saum tsev, muab ncuav los ntais thiab faib rau sawvdaws noj. Paulus nrog sawvdaws tham ntev loo mus txog ntua thaum kajntug, nws mamli ncaim lawv mus lawm. 12Sawvdaws pom tus hluas ntawd tseem muaj sia, lawv zoosiab kawg li, lawv txawm coj nws mus tsev.

Mus Ntawm Rhau-as Rau Miletus

13Peb uantej mus rau nram lub nkoj thiab caij nkoj mus rau nram lub nroog Axaus, qhov chaw uas peb yuav tos Paulus nrog peb mus. Nws twb xub hais kom peb ua li ntawd lawm, rauqhov nws yuav mus kotaw mus rau nrad. 14Thaum nws ntsib peb nram lub nroog Axaus lawm, peb thiaj coj nws nrog peb caij nkoj mus rau nram lub nroog Mitilenes. 15Peb caij nkoj ntawm qhov chaw ntawd mus thiab hnub tomqab peb mam mus txog rau ntawm lub povtxwv Khi-aus. Ib hnub tomqab ntxiv, peb mus txog lub povtxwv Xamaus, thiab hnub tomqab ntxiv thiab, peb mam mus txog nram lub nroog Miletus. 16Paulus tau txiavtxim siab caij nkoj mus kom dhau plaws lub nroog Efexaus, kom thiajli tsis noj sijhawm rau hauv xeev Exias, vim nws maj mus kom txog nram lub nroog Yeluxalees, seb mus puas ncav hnub Pheetekhos.

Paulus Haislus Ncaim Rau Cov Txwjlaug Uas Tuaj Pem Efexaus Tuaj

17Thaum Paulus tseem nyob hauv lub nroog Miletus, nws tau txib neeg mus hu cov txwjlaug uas saib pawg ntseeg hauv lub nroog Efexaus kom tuaj ntsib nws. 18Thaum lawv tuaj txog lawm, nws hais rau lawv hais tias, “Suav txij li hnub uas kuv tuaj txog rau hauv lub xeev Exias, nej yeej paub tias kuv ua kuv lub neej zoo licas. 19Kuv tau ua tus Tswv tes haujlwm los ntawm kev txo hwjchim thiab lub kuamuag poob; muaj ntau yam teebmeem tuaj raug kuv vim cov neeg Yudais tuavhauv ua phem rau kuv. 20Nej yeej paub tias thaum kuv qhuabqhia, tsis hais qhia hauv nej tej tsev los yog hauv tej tsev sablaj, kuv yeej tsis lam muab tej zaj uas yuav pab tau nej zais cia ib zaug li. 21Kuv pheej ceebtoom rau cov Yudais thiab Lwm Haivneeg kom sawvdaws yuavtsum tso tej kev txhaum tseg thiab ntseeg peb tus Tswv Yexus.

22“Nimno, kuv mloog Vaj Ntsujplig tus dawbhuv lus, kuv thiaj yuav mus rau nram lub nroog Yeluxalees, tiamsis tsis paub tias xyov yuav muaj dabtsi tshwmsim rau kuv nyob rau nrad. 23Kuv tsuas paub rawsli Vaj Ntsujplig tau ceebtoom rau kuv hais tias, kuv yuav raug kaw hauv tsev lojcuj thiab yuav raug kev txomnyem nyob rau txhua lub nroog. 24Tiamsis kuv tsis suav hais tias kuv lub neej tseemceeb dabtsi; kuv tsuas xav ua tes haujlwm uas tus Tswv Yexus muab rau kuv ua kom tiav xwb. Tes Haujlwm ntawd yog qhia Txoj Moo Zoo uas hais txog Vajtswv txoj hmoovhlub. #2Tim 4:7

25“Nimno kuv paub tias nej cov uas kuv tau qhia txog Vajtswv lub Tebchaws rau lawm, yuav tsis rov pom kuv ntxiv li lawm. 26Yogli ntawd, hnubno kuv qhia tseeb rau nej hais tias, yog leejtwg raug kev puastsuaj, tsis yog tim kuv. 27Rauqhov kuv twb qhia tagnrho Vajtswv lub homphiaj rau nej lawm, kuv yeej tsis tau zais ib qho li.

28“Nej yuavtsum saib nej tuskheej thiab saib tagnrho pab yaj uas Vaj Ntsujplig tus Dawbhuv muab tso rau nej ua tus saib. Nej yuavtsum saib Vajtswv#20:28: Vajtswv; tej phau ntawv qub uas xuas tes sau, muaj tus Tswv. pawg ntseeg ib yam li tus tswv yaj saib nws pab yaj, vim Nws tau txhiv pawg ntseeg ntawd los ua Nws tug, uas yog los ntawm Nws#20:28: los ntawm Nws cov ntshav; lossis los ntawm Nws tus Tub txoj kev tuag theej txhoj; lossis los ntawm Nws tus Tub cov ntshav. cov ntshav. 29Kuv paub tias thaum kuv mus lawm, yuav muaj hma nyaum nkag los rau hauv nej, thiab lawv yuav tsis tseg pab yaj kiag li. 30Txawm yog hauv nej cov kiag los yuav muaj qeeleej sawv los ntxeev txoj kev tseeb, ntxias cov ntseeg kom raws lawv qab mus. 31Yogli ntawd, nej yuavtsum ncontsoov ceevfaj, thiab ncontsoov tias tau peb xyoos nkaus uas kuv quaj qaws qhia nej sawvdaws nruabhnub hmontuj tsis tuncua li.

32“Nimno kuv muab nej tso rau ntawm Vajtswv thiab rau ntawm txojlus uas yog Nws txoj hmoovhlub; qhov ntawd thiaj yuav pab tau nej thiab yuav pub tau tej koobhmoov uas Vajtswv muab rau txhua tus uas yog Nws haivneeg. 33Kuv yeej tsis tau ntshaw leejtwg tej nyiaj tej kub lossis tej ristsho. 34Nej sawvdaws puavleej paub tias kuv thiab cov phoojywg uas nrog kuv ua haujlwm tau noj tau hnav twb yog vim kuv ob txhais tes khwv yug sawvdaws xwb. 35Txhua yam haujlwm uas kuv ua khwv-khwv no yog ua qhia kom nej pom tias peb yuavtsum ua pab cov neeg uas tsis muajzog. Ncontsoov tej lus uas tus Tswv Yexus tau qhia lawm hais tias, ‘Kev pub ua rau muaj kev zoosiab tshaj li kev tau txais.’ ”

36Thaum Paulus qhia lawv tag lawm, nws txawm nrog lawv txhoscaug thiab thov Vajtswv. 37Thaum nws yuav ncaim lawv mus, sawvdaws quaj kawg li, lawv txawm los khawm nws thiab nwj nws. 38Lawv ntxhovsiab heev vim nws tau hais tias, lawv yuav tsis pom nws ntxiv li lawm. Yogli ntawd, lawv thiaj xa nws mus rau nram lub nkoj.

Currently Selected:

Tes Haujlwm 20: MWW2022

Highlight

Copy