Tes Haujlwm 14

Nyob Hauv Ikaunius

1Nyob hauv lub nroog Ikaunius los zoo tibyam nkaus: Paulus thiab Npananpas nkawd mus rau hauv cov Yudais lub tsev sablaj thiab qhia tau zoo heev, ua rau cov Yudais thiab Lwm Haivneeg los ntseeg coob kawg li. 2Tiamsis cov Yudais uas tsis kam ntseeg txawm mus ntxias kom Lwm Haivneeg tawmtsam cov uas ntseeg Yexus. 3Nkawd nyob hauv lub nroog ntawd tau ntev loo. Nkawd muaj siab tawv qhia txog tus Tswv, uas tau lees paub tias tej uas nkawd qhia txog Nws txoj hmoovhlub ntawd yeej muaj tseeb. Nws thiaj pub hwjchim rau nkawd ua ntau yam txujci tseemceeb. 4Cov neeg uas nyob hauv lub nroog ntawd txawm tawg ua ob pab: ib pab tuaj cov Yudais tog, thiab ib pab tuaj ob tug timthawj tog.

5Qeeleej uas yog Lwm Haivneeg thiab cov Yudais, nrog rau lawv cov thawjcoj, txawm tuavhauv yuav ua phem thiab muab pobzeb ntaus ob tug timthawj. 6Thaum nkawd paub li ntawd, nkawd thiaj khiav mus rau nram lub nroog Lixathas thiab lub nroog Dawnpis uas nyob hauv tebchaws Likaunias thiab tej cheebtsam uas nyob ibncig ntawd. 7Nkawd qhia Txoj Moo Zoo rau hauv cov cheebtsam ntawd.

Nyob Hauv Lixathas Thiab Dawnpis

8Nyob hauv lub nroog Lixathas muaj ib tug txivneej tuag ceg thaum nruabthiab los, uas yeej ibtxwm mus tsis taus kev li. 9Nws nyob ntawd mloog Paulus tej lus qhia. Paulus ntsiantsoov nws, thiab pom tias nws muaj txoj kev ntseeg uas yuav kho tau nws kom zoo. 10Ces Paulus txawm hais nrov-nrov rau nws hais tias, “Koj ciali sawvtsees!” Tus txivneej ntawd txawm sawvtsees thiab ncig mus ncig los.

11Thaum sawvdaws pom tej uas Paulus tau ua ntawd, lawv txawm qw lawv cov lus Likaunias nrov-nrov hais tias, “Tej nyuag vajtswv tau txia ua neeg thiab tau los cuag peb lawm!” 12Lawv thiaj hu Npananpas hu ua Xus, thiab hu Paulus ua Hawmes, rauqhov Paulus yog tus thawj uas qhia. 13Tus povthawj hlob uas teev tus nyuag vajtswv Xus, nws lub tuamtsev nyob sabnraud ntug nroog, nws txawm cab tej txiv nyuj thiab nqa pajntoos tuaj rau ntawm lub roojvag uas yuav mus rau hauv lub nroog; rauqhov nws thiab cov pejxeem xav coj tej ntawd tuaj fij rau ob tug timthawj.

14Thaum Npananpas thiab Paulus hnov txog tej uas lawv yuav ua ntawd, nkawd txawm muab nkawd ob lub tsho dua thiab khiav mus rau hauv cov neeg coob-coob ntawd, thiab hais nrov-nrov rau lawv hais tias, 15“Nej ua dabtsi li no? Wb yog neeg ib yam li nej thiab xwb! Wb tuaj ntawm no, yog tuaj qhia Txoj Moo Zoo rau nej, kom nej tig tawm ntawm tej uas tsis muaj qabhau no es los ntseeg tus Vajtswv uas muaj sia nyob. Nws yog tus uas tsim lub ntuj thiab lub ntiajteb, tsim dej hiavtxwv, thiab txhua yam uas nyob rau ntawm tej chaw ntawd huv tibsi. #Khiav 20:11; Nnkauj 146:6 16Yav tas los, Vajtswv cia txhua haivneeg nyias ua rawsli nyias lub siab nyiam. 17Tes Haujlwm zoo uas Vajtswv ua, yog Nws pub muaj tshav muaj nag, thiab kom tej qoobloo siav raws caij raws nyoog, thiab pub zaub-mov rau nej noj kom nej tau nyob kajsiab lug. Tej no yeej ibtxwm ua puavpheej hais tias muaj Vajtswv tiag.” 18Txawm yog ob tug timthawj twb qhia li ntawd los, nkawd tseem cheem cov neeg uas pheej yuav muab khoom fij rau nkawd nyuaj kawg nkaus li.

19Tiamsis cov Yudais muaj qeeleej uas tuaj hauv lub nroog Ati-aukias hauv tebchaws Pixidias thiab hauv lub nroog Ikaunius tuaj; lawv ntxias tau sawvdaws tuaj lawv tog, lawv muab pobzeb ntaus Paulus thiab muab nws cab tawm hauv lub nroog mus, lawv xav tias nws tuag lawm. 20Tiamsis thaum cov ntseeg tuaj sawv vij nws, nws txawm sawv thiab rov mus rau hauv nroog. Hnub tomqab nws thiab Npananpas nkawd txawm mus rau nram lub nroog Dawnpis lawm.

Paulus Thiab Npananpas Rov Los Rau Ati-aukias Hauv Tebchaws Xilias

21Paulus thiab Npananpas nkawd qhia Txoj Moo Zoo hauv lub nroog Dawnpis, ua rau muaj ntau leej tau los ntseeg Yexus. Ces nkawd txawm rov mus rau pem lub nroog Lixathas, lub nroog Ikaunius, thiab lub nroog Ati-aukias hauv tebchaws Pixidias. 22Nkawd txhawb cov ntseeg lub zog thiab nquahu kom lawv nyob ruaj-khov rau hauv txoj kev ntseeg. Nkawd qhia lawv tias, “Peb yeej yuav raug ntau yam kev txomnyem, peb thiaj mus tau Vajtswv lub Tebchaws.” 23Paulus thiab Npananpas tau tsa muaj cov txwjlaug rau txhua pawg ntseeg; lawv ua kevcai yoo mov thiab thov Vajtswv, nkawd tau muab lawv fij rau tus Tswv, uas yog tus lawv tsosiab rau.

24Tomqab uas nkawd hla cheebtsam Pixidias lawm, nkawd thiaj mus rau tebchaws Pafilias. 25Thaum nkawd qhia Vajtswv Txojlus hauv lub nroog Pawnkas tag, ces nkawd txawm mus rau hauv lub nroog Atalias, 26thiab dhau ntawd ces nkawd caij nkoj rov rau tim lub nroog Ati-aukias uas yog qhov chaw cov ntseeg tau muab nkawd cob rau Vajtswv txoj hmoovhlub uas yog ua tes haujlwm uas nimno nkawd twb ua tiav lawm.

27Thaum nkawd rovqab los txog hauv lub nroog Ati-aukias, nkawd hu cov ntseeg tuaj uake thiab piav txhua yam uas Vajtswv tau pab nkawd, thiab qhia qhov uas Vajtswv tau qhib kev rau Lwm Haivneeg los ntseeg Vajtswv rau lawv mloog. 28Nkawd nrog cov ntseeg ntawd nyob tau ntev loo.

Currently Selected:

Tes Haujlwm 14: MWW2022

Highlight

Copy