2 Kauleethaus 13

Tej Lus Ntuas Thiab Lus Xa Xov Thaum Kawg

1Zaumno yog zaum thib peb uas kuv yuav tuaj saib nej. Rawsli Vajtswv Txojlus hais tias, “Yog muaj xaiv muaj lus, yuavtsum muaj ob leeg lossis peb leeg ua timkhawv thiaj tseeb.” #2Kev 17:6; 19:15 2Kuv twb ntuas nej cov uas yav tas los tau ua txhaum thiab ntuas tagnrho sawvdaws ib zaug los lawm, uas yog zaum thib ob uas kuv tuaj saib nej. Zaumno, txawm yog kuv nyob deb nej los kuv rov ntuas nej hais tias, lwm zaus uas kuv rov tuaj, kuv yuav tsis txuag lawv ntxiv lawm.

3Nej yuav pom tseeb hais tias Khetos yog tus uas siv kuv hais Nws tej lus. Thaum Nws taug nej zaj, Nws yuav tsis ua tus nyuag vau zujzis, tiamsis Nws yuav ua kom nej pom Nws lub hwjchim. 4Txawm yog Nws raug muab ntsia rau saum ntoo khaublig zooli tus uas vau zujzis los Nws tseem muaj sia nyob vim Vajtswv lub hwjchim. Ib yam nkaus li ntawd, txawm yog peb vau zujzis nyob rau hauv Nws los, los ntawm Vajtswv lub hwjchim, peb yuav nyob rau hauv Nws thiab ua haujlwm pub rau nej.

5Nej ciali sojntsuam thiab ntsuas nej tuskheej seb nej puas tseem ua neej nyob rau hauv txoj kev ntseeg. Nej tsis paub lov, hais tias Yexus Khetos nyob rau hauv nej? Yog nej tsis paub, ces yog nej twb tsis ua neej nyob rau hauv txoj kev ntseeg lawm. 6Kuv ciasiab tias nyaj nej yuav paub tias peb yeej tsis tau poob ntawm txoj kev ntseeg lawm.

7Peb thov Vajtswv pab kom nej tsis txhob ua txhaum. Peb thov li ntawd tsis yog peb ua rau sawvdaws xav tias peb yog cov uas twb ua zoo lawm. Txawm yog zooli peb twb ua tsis tau zooli los peb xav kom nej ua tau qhov zoo. 8Rauqhov peb yeej ua tsis tau ib yam dabtsi uas yuav cuamtshuam qhov tseeb li, tsuas muaj uas yuav ua rawsli qhov tseeb xwb. 9Thaum peb qaugzog es nej tseem muajzog npho los peb kuj zoosiab. Peb yuav thov Vajtswv pab kom nej ua tau lub neej zoo zujzus ntxiv. 10Twb yog vimli ntawd, thaum kuv tseem nyob deb nej kuv thiaj sau tsab ntawv no tuaj rau nej; kom thaum kuv tuaj txog lawm kuv thiaj yuav tsis siv lub hwjchim uas tus Tswv muab rau kuv ntawd los ua nyaum rau nej, lub hwjchim ntawd yog tsa nej sawv, tsis yog yuav rhuav nej.

11Cov kwvtij, thaum kawg no, kuv thov ncaim nej mus! Nej yuavtsum muab siab rau xyaum ua lub neej kom zoo kawg nkaus, khaws kuv tej lus cia, sawvdaws ua ib lub siab, thiab ib leeg tsis txhob nrhiav xaiv nrhiav lus rau ib leeg. Vajtswv tus uas muaj txoj kev hlub thiab kev thajyeeb yuav nrognraim nej nyob.

12Nej ib leeg hais nojqab nyobzoo rau ib leeg thiab ib leeg nwj ib leeg ntawm txoj kev dawbhuv.

13Tagnrho cov ntseeg puavleej xa kev nojqab nyobzoo rau nej thiab.

14Thov kom tus Tswv Yexus Khetos txoj hmoovhlub, Vajtswv txoj kev hlub, thiab Vaj Ntsujplig tus Dawbhuv txoj kev phooj kev ywg nyob nrog nej txhua tus.

Currently Selected:

2 Kauleethaus 13: MWW2022

Highlight

Copy