2 Kauleethaus 1

1Kuv yog Paulus, uas yog Yexus Khetos ib tug timthawj rawsli Vajtswv tus dejsiab, thiab los ntawm peb tus kwv Timautes.

Xa mus rau Vajtswv pawg ntseeg uas nyob hauv lub nroog Kauleethaus, thiab tagnrho Vajtswv haivneeg uas nyob thoobplaws hauv lub xeev Akhayas: #Teshl 18:1

2Thov Vajtswv uas yog peb Leejtxiv thiab tus Tswv Yexus Khetos pub txoj hmoovhlub thiab kev nyabxeeb rau nej.

Paulus Ua Vajtswv Tsaug

3Peb ciali ua Vajtswv uas yog peb tus Tswv Yexus Khetos Leejtxiv tsaug, Leejtxiv tus uas muaj txoj kev hlub thiab Vajtswv tus uas muaj kev tabncuab. 4Nws txhawb peb lub zog thaum peb raug txhua yam kev nyuajsiab, kom peb thiaj muaj cuabkav mus txhawb tau lwmtus lub zog thaum lawv raug txhua yam kev nyuajsiab ib yam li Vajtswv tau txhawb peb lub zog lawm. 5Peb muaj feem nrog Khetos raug txoj kev txomnyem ntau npaum licas, los ntawm Khetos, peb kuj muaj feem tau txais Vajtswv txoj kev tabncuab ntau npaum li ntawd thiab. 6Qhov uas peb raug kev txomnyem, yog kev txhawb nej lub zog thiab pab kom nej muaj kev cawmdim; qhov uas Vajtswv txhawb peb lub zog, yog kev txhawb nej lub zog ib yam nkaus, kom nej ua taus siabntev tiv tej kev txomnyem ib yam nkaus li peb twb tiv los lawm. 7Yogli ntawd, peb thiaj ciasiab ruaj-khov rau nej, rauqhov peb paub tias nej nrog peb raug kev txomnyem licas, ces nej yeej yuav tau nrog peb txais kev tabncuab ib yam li ntawd thiab.

8Cov kwvtij, peb xav kom nej paub txog tej teebmeem uas los raug peb thaum peb nyob hauv lub xeev Exias. Tej teebmeem ntawd hnyav kawg nkaus li, hnyav dhau peb lub zog, ua rau peb tag kev ciasiab hais tias xyov peb puas yuav muaj txojsia li lawm. #1Klt 15:32 9Qhov tseeb, peb xav tias lub txim tuag los raug rau peb lawm. Tiamsis yuavtsum muaj li no kom peb thiajli tsis ciasiab rau peb tuskheej, tiamsis ciasiab rau Vajtswv tus uas tsa tau neeg tuag sawv rovqab los. 10Nws tau cawm peb dim ntawm txoj kev tuag uas phem kawg nkaus li, Nws yeej yuav cawm kom peb dim; thiab peb ciasiab ntsoov rau Nws hais tias yav tomntej no Nws tseem yuav cawm peb ntxiv thiab, 11vim nej niajhnub pab peb los ntawm nej txoj kev thov Vajtswv. Muaj coob leej tau thov Vajtswv pab peb, mas Vajtswv tau teb sawvdaws tej lus thov, thiab Vajtswv tseem yuav foom koobhmoov rau peb; thiab muaj coob leej yuav tsa lawv lub suab los ua Vajtswv tsaug.

Paulus Ncua Tsis Mus Saib Cov Ntseeg

12Peb zoosiab qhov uas peb lub siab qhia rau peb paub tias peb lub neej hauv ntiajteb no, tshwjxeeb yog peb txoj kev phoojywg nrog nej, peb ua nrog txoj kev ncajncees thiab ua nrog nploojsiab dawbpaug#1:12: dawbpaug; tej phau ntawv qub uas xuas tes sau, muaj dawbhuv. los ntawm Vajtswv. Peb ua tau li ntawd, tsis yog peb ua rawsli peb lub tswvyim tiamsis yog rawsli Vajtswv txoj hmoovhlub xwb. 13-14Rauqhov peb yeej tsis sau lwmyam tuaj rau nej, tsuas yog sau tej uas nej muaj peevxwm nyeem thiab totaub tau xwb. Txawm yog nimno nej tsuas totaub mentsis txog peb xwb los, kuv ciasiab hais tias nej yuav totaub txhua yam txog peb, kom hnub uas peb tus Tswv Yexus rovqab los, nej yuav txaussiab rau peb ib yam li peb txaussiab rau nej thiab.

15Thaum kuv paub meej li no lawm, kuv thiaj npajsiab uantej hais tias kuv yuav xub tuaj saib nej kom nej tau koobhmoov ob npaug. 16Kuv npajsiab hais tias kuv yuav tuaj xyuas nej thaum kuv tuaj mus rau Makedaunias, thiab thaum kuv rov los kuv yuav los saib nej dua, kom nej thiaj pab xa tau kuv mus rau nram lub xeev Yudas. #Teshl 19:21 17Thaum kuv npaj tej no lawm, kuv tseem yuav hloov siab thiab lov? Lossis puas yog kuv npaj rawsli neeg nqaijtawv npaj uas hais tias “Tuaj, tuaj,” tiamsis ho “Tsis tuaj, tsis tuaj” no lov?

18Vajtswv yeej yog tus ncajncees, tej lus uas peb hais rau nej tsis yog tej lus uas hais tias, “Ua” thiab “Tsis ua.” 19Rauqhov Vajtswv tus tub Yexus Khetos, tus uas Xilas, Timautes thiab kuv tau qhuabqhia rau nej ntawd, Nws tsis yog tus uas hais tias, “Ua” thiab “Tsis ua,” tiamsis Nws yeej ibtxwm hais tias “Ua” no xwb. #Teshl 18:5 20Rauqhov txhua yam uas Vajtswv tau coglus tseg lawm, Yexus yog tus “Ua” huv tibsi. Twb yog vimli no peb thiajli hais “Amees” los ntawm Yexus Khetos lub npe, uas yog ua rau Vajtswv tau koobmeej. 21Vajtswv yog tus uas ua rau peb thiab nej nyob ruaj-khov rau ntawm Khetos, Nws yog tus uas muab peb tsa rau ibcag, 22Nws muab Nws lub cim los nias rau peb, thiab Nws pub Vaj Ntsujplig tus Dawbhuv los nyob rau hauv peb lub siab uas yog ua timkhawv qhia hais tias peb yuav tau txhua yam uas Nws npaj tseg cia rau peb lawm.

23Kuv thov Vajtswv nrog ua kuv tus timkhawv, vim Nws paub kuv lub siab! Qhov uas kuv tsis tau rovqab tuaj rau hauv lub nroog Kauleethaus yog kuv xav txuag nej xwb. 24Peb tsis yuam hais tias nej yuavtsum ntseeg licas, rauqhov peb paub tias nej yeej sawv khovkho rau ntawm txoj kev ntseeg lawm, tiamsis peb xav nrog nej ua haujlwm uake kom nej muaj kev kajsiab xwb.

Currently Selected:

2 Kauleethaus 1: MWW2022

Highlight

Copy