1 Petus 3

Cov Pojniam Thiab Cov Txiv

1Ib yam nkaus li ntawd, nej cov uas yog pojniam yuavtsum mloog nej cov txiv lus, kom txawm yog muaj tej tus tsis ntseeg Vajtswv Txojlus los nej tus cwjpwm uas zoo thiaj yuav ua rau lawv los ntseeg. Tsis tas nej yuav hais ib los li, #Efex 5:22 2rauqhov lawv yeej yuav pom nej txoj kev ncajncees thiab nej txoj kev hwm lawv nyob rau hauv nej tus cwjpwm.

3Nej tsis txhob siv lwmyam sabnraud los ua rau nej zoonkauj, xwsli kev ntxias plaubhau, lossis coj nyiaj coj kub, lossis hnav tej tsoostsho uas kim-kim. 4Tiamsis cia nej txoj kev zoonkauj yog nej lub siab lub ntsws, uas yog lub siab mosmuag thiab lub siab tusyees uas tsis paub laus, qhov ntawd thiaj yog qhov uas Vajtswv pom tias muajnqis. 5Cov pojniam txheej thaum ub uas ua lub neej dawbhuv thiab ciasiab rau Vajtswv, lawv yeej ua rau lawv zoonkauj los ntawm qhov uas lawv mloog lawv cov txiv lus. 6Xalas yeej zooli ntawd, nws mloog Anplahas lus thiab hu Anplahas hais tias Anplahas yog nws tus tswv. Nimno yog nej ua zoo thiab tsis ntshai dabtsi li, ces nej yog Xalas cov ntxhais lawm ntag.

7Ib yam nkaus li ntawd thiab, nej cov uas yog txiv yuavtsum ua neej nrog txoj kev totaub hais tias nej cov pojniam tsis muajzog li nej. Nej yuavtsum saib taus nej cov pojniam, rauqhov Vajtswv yeej yuav pub txojsia rau lawv thiab rau nej ib yam nkaus. Yog nej ua li ntawd, yuav tsis muaj ib yam dabtsi los tabkaum nej tej lus thov Vajtswv.

Raug Tsimtxom Vim Ua Zoo

8Thaum kawg no, nej sawvdaws yuavtsum ua ib lub siab, ib leeg hmovtshua ib leeg, ib leeg hlub ib leeg ib yam li kwvtij sibhlub, ib leeg ua zoo rau ib leeg, thiab ib leeg txo hwjchim rau ib leeg. 9Nej tsis txhob ua phem pauj phem lossis ib tug tsis txhob foom ib tug, tiamsis nej ib tug ciali thov Vajtswv foom koobhmoov rau ib tug, rauqhov thaum Vajtswv hu nej los, Nws yeej coglus tseg hais tias Nws yuav foom koobhmoov rau nej. 10Vajtswv Txojlus hais tias:

“Yog koj ntshaw lub neej zoo

thiab kev kajsiab,

koj yuavtsum ceev koj tus nplaig tsis txhob haislus phem

thiab ceev koj lub qhovncauj tsis txhob haislus dag.

11Koj yuavtsum khiav tawm ntawm tej kev phem thiab ua qhov zoo;

koj yuavtsum nrhiav kev sib haumxeeb kom kawg koj lub siab.

12Rauqhov tus TSWV ntsiantsoov cov neeg ncajncees,

thiab Nws mloog lawv tej lus thov;

tiamsis Nws tawmtsam cov neeg uas ua phem.” #Nnkauj 34:12-16

13Yog nej yeej xav ua qhov zoo xwb, leejtwg thiaj yuav ua tau phem rau nej? 14Tiamsis txawm yog nej raug kev tsimtxom vim qhov uas nej ua zoo ntawd los nej yeej yuav muaj kev kajsiab! Yogli ntawd, nej tsis txhob ntshai lawv thiab tsis txhob txhawj. #Math 5:10 15Nyob rau hauv nej lub siab, nej yuavtsum hwm Khetos hais tias Nws yog tus Tswv. Nej yuavtsum npaj txhij los teb cov neeg uas nug nej hais tias vim licas nej muaj chaw ciasiab, #Yaxaya 8:12-13 16tiamsis ua tibzoo teb lawv los ntawm lolus mosmuag thiab txoj kev hwm. Nej yuavtsum saibqab saibhau kom meej-meej, kom thaum nej raug luag txobthuam, cov neeg uas haislus thuam nej tus cwjpwm zoo vim nej yog Khetos cov thwjtim, lawv yuav txajmuag rau tej lus uas lawv hais ntawd. 17Yog nej ua zoo es nej raug tsimtxom, yog tias qhov ntawd haum Vajtswv siab, mas yuav zoo dua qhov uas nej ua phem es nej raug tsimtxom.

18Rauqhov Khetos tuag#3:18: tuag; ntau phau ntawv qub uas xuas tes sau, muaj raug kev tsimtxom. tibzaug txhiv sawvdaws lub txim xwb, Nws yog tus ncajncees tuag txhiv cov uas tsis ncajncees, kom Nws thiaj coj tau nej mus cuag Vajtswv. Luag muab Nws tua tuag ntawm sab nqaijtawv, tiamsis ntawm sab Ntsujplig, Nws tseem ciajsia, 19thiab ntawm sab Ntsujplig, Nws tau mus qhuabqhia rau cov ntsujplig uas tau raug muab kaw cia. 20Cov ntsujplig ntawd yog cov neeg uas Vajtswv ua siabntev rau lawv, tiamsis lawv tsis mloog Vajtswv lus thaum lub sijhawm uas Nau-as txua nkoj. Tsuas muaj tsawg-tsawg leej thiaj mus nyob hauv lub nkoj xwb, tagnrho yog muaj yim leej, lawv yog cov uas thiajli dim dej nyab. #Chiv 6:1—7:24

21Cov dej ntawd piv txog txoj kevcai rausdej uas nimno cawm nej dim nej lub txim. Kevcai rausdej tsis yog qhov uas ntxuav nej lub cev kom huv, tiamsis yog lolus cogtseg ntawm nej lub siab uas ncajncees rau Vajtswv. Kevcai rausdej pab tau nej dim yog los ntawm qhov uas Yexus Khetos twb sawv hauv qhovtuag los lawm; 22Nws tau rov mus rau saum ntuj ceebtsheej thiab nyob ntawm Vajtswv sab xis, Nws kav tagnrho cov timtswv ceebtsheej, cov uas muaj meejmom, thiab muaj hwjchim huv tibsi.

Currently Selected:

1 Petus 3: MWW2022

Highlight

Copy