1 Yauhas 4

Tus Ntsujplig Tseeb Thiab Tus Ntsujplig Cuav

1Cov kwvtij uas kuv hlub, nej tsis txhob ntseeg txhua tus ntsujplig, tiamsis nej yuavtsum ntsuas cov ntsujplig ntawd seb puas yog los ntawm Vajtswv los tiag, rauqhov muaj ntau tus xibhwb cevlus cuav tau tawm mus rau hauv lub ntiajteb no lawm. 2Qhov uas nej yuav muaj peevxwm paub tau tias yog Vajtswv tus Ntsujplig tiag mas yogli no: txhua tus ntsujplig uas lees paub tias Yexus Khetos tus uas tau los yug ua neeg yog los ntawm Vajtswv los. 3Tiamsis txhua tus ntsujplig uas tsis lees paub txog Yexus, ces tsis yog Vajtswv tus Ntsujplig. Tus ntsujplig uas nws muaj yog los ntawm Khetos tus Yeebncuab los; nej twb hnov lawm hais tias nws yuav los, nimno nws twb los nyob hauv ntiajteb no lawm.

4Cov menyuam, nej yog Vajtswv cov menyuam thiab nej twb tawmtsam yeej cov xibhwb cevlus cuav lawm, vim Vaj Ntsujplig tus uas nyob rau hauv nej tseem muaj hwjchim loj dua tus ntsujplig uas nyob rau hauv lub ntiajteb no. 5Cov xibhwb cevlus cuav ntawd yog neeg ntiajteb, vimli ntawd lawv thiaj qhia txog tej uas yog ntiajteb zaj xwb, thiab neeg ntiajteb thiaj nyiam mloog lawv qhia. 6Tiamsis peb yog Vajtswv cov menyuam. Tus uas paub Vajtswv yeej mloog peb qhia; tus uas tsis yog Vajtswv li menyuam yeej tsis mloog peb qhia. Vimli no peb thiaj paub tias tus Ntsujplig tseeb thiab tus ntsujplig cuav txawv licas.

Vajtswv Yog Kev Hlub

7Cov phoojywg uas kuv hlub, cia peb ib leeg hlub ib leeg, rauqhov kev hlub yog los ntawm Vajtswv los. Tus uas muaj kev hlub, tus ntawd yog Vajtswv li menyuam thiab nws yeej paub Vajtswv. 8Tus uas tsis muaj kev hlub, tus ntawd yeej tsis paub Vajtswv, rauqhov Vajtswv yog kev hlub. 9Qhov uas Vajtswv qhia Nws txoj kev hlub rau peb yogli no: Vajtswv txib Nws tibleeg Tub los rau hauv ntiajteb no, kom peb thiaj tau txojsia los ntawm Nws. 10Lub ntsiab ntawm txoj kev hlub yogli no: tsis yog peb tau hlub Vajtswv, tiamsis yog Vajtswv tau hlub peb thiab Nws tau txib Nws tus Tub los tuag theej peb lub txhoj, Vajtswv thiaj zam peb tej kev txhaum.

11Cov phoojywg, yog Vajtswv twb hlub peb npaum li ntawd diam, tsimnyog peb ib leeg yuavtsum hlub ib leeg. 12Yeej tsis tau muaj leejtwg pom Vajtswv ib zaug li, tiamsis yog peb ib leeg hlub ib leeg, Vajtswv yeej nyob rau hauv peb, thiab Nws txoj kev hlub yuav muaj puvnpo nyob rau hauv peb. #Yauh 1:18

13Peb paub tias peb nyob rau hauv Vajtswv thiab Vajtswv nyob rau hauv peb, vim Vajtswv tau pub Nws tus Ntsujplig rau peb lawm. 14Peb twb pom thiab twb ua timkhawv qhia rau sawvdaws paub lawm hais tias, Leejtxiv txib Nws tus Tub los ua neeg ntiajteb tus Cawmseej. 15Tus uas lees hais tias Yexus yog Vajtswv tus Tub, Vajtswv yeej nyob rau hauv tus ntawd thiab tus ntawd yeej nyob rau hauv Vajtswv. 16Vimli no, peb thiaj paub thiab ntseeg Vajtswv txoj kev hlub uas Nws muaj pub rau peb.

Vajtswv yog kev hlub, tus uas ua neej nyob rau hauv kev hlub yog nws ua neej nyob rau hauv Vajtswv, thiab Vajtswv nyob rau hauv nws. 17Txoj kev hlub twb muaj puvnpo nyob rau hauv peb lawm, yogli ntawd, thaum txog Hnub Txiavtxim peb yuav muaj lub siab tawv qhawv, rauqhov peb lub neej uas nyob hauv lub ntiajteb no twb zoo ib yam li Khetos lub lawm. 18Nyob rau hauv txoj kev hlub, yeej tsis muaj kev ntshai; txoj kev hlub uas zoo kawg nkaus yeej ntiab tau txoj kev ntshai tawm mus. Yogli ntawd, tus uas ntshai, tus ntawd tseem tsis tau muaj txoj kev hlub uas puvnpo, rauqhov kev ntshai muaj feem nyob rau hauv kev rautxim.

19Peb hlub vim Vajtswv twb xub hlub peb lawm. 20Tus uas hais tias, “Kuv hlub Vajtswv,” tiamsis nws tseem ntxub nws kwv nws tij, tus ntawd yog neeg dag. Rauqhov tus uas twb tsis hlub nws kwv nws tij uas nws qhovmuag pom, tus ntawd yeej hlub tsis tau Vajtswv tus uas nws qhovmuag twb tsis tau pom ib zaug li. 21Tej lus uas Khetos muab rau peb yogli no: tus uas hlub Vajtswv, nws yuavtsum hlub nws kwv nws tij thiab.

Currently Selected:

1 Yauhas 4: MWW2022

Highlight

Copy