1 Kauleethaus 6

Cov Ntseeg Ua Plaub Rau Cov Ntseeg

1Thaum nej ib leeg muaj plaubntug rau ib leeg, nej tseem muajplhus coj mus rau cov neeg uas tsis ntseeg ua cov tu thiab lov? Uacas tsis coj mus rau cov ntseeg tu xwb? 2Nej tsis paub tias cov ntseeg yuav ua cov txiavtxim rau neeg ntiajteb no lov? Yog nej twb yuav txiavtxim rau neeg ntiajteb, nej txawm tsis muaj peevxwm tu tej nyuag plaub me-me no li thiab lov? 3Nej tsis paub tias peb twb yog cov uas yuav txiavtxim rau cov timtswv no lov? Yogli ntawd, tsimnyog peb yuavtsum muaj peevxwm tu tau tej nyuag plaubntug uas niajhnub muaj no ntau npaug!

4Thaum nej muaj plaubntug li hais los no, nej txawm yuav ciali tsa ib cov neeg uas pawg ntseeg twb tsis hwm li los txiavtxim no lov? 5Tsimnyog nej yuavtsum paub txajmuag! Nej txawm tsis muaj ib tug txawjntse uas yuav hais tau tej plaubntug uas cov ntseeg ua li lov? 6Uacas cov ntseeg ib leeg tseem kom ib leeg mus rau hauv tsev tu plaub, es ho tseem cia cov tsis ntseeg ua cov tu plaub thiab?

7Tseeb tiag, qhov uas nej pheej sib ua plaub ntawd qhia tau hais tias nej yeej tsis coj lub neej zooli tus ntseeg Vajtswv hlo li. Nej ua tus swb tsis tau li lov? Uacas nej tsis cia luag ntxo nej xwb? 8Nej twb yog tib cov ntseeg xwb los nej ib leeg tseem ua phem rau ib leeg, thiab ib leeg ntxo ib leeg!

9Nej tsis paub tias cov neeg uas ua phem yuav tsis muaj feem nyob rau hauv Vajtswv lub Tebchaws no lov? Nej tsis txhob xav yuamkev; cov neeg uas nyiam ua kev nkauj kev nraug, pe mlom, deev luag pojniam luag txiv, cov txivntiav, txivneej deev txivneej, 10cov ua tubsab, ntshaw luag tug, quavcawv, haislus chob lwmtus thiab ntxo lwmtus, yuav tsis muaj feem mus nyob rau hauv Vajtswv lub Tebchaws li. 11Yav tas los nej cov muaj qeeleej zoo nkaus li ntawd. Tiamsis nej lub txim twb raug muab ntxuav lawm; nej twb dawbhuv lawm; nej twb tau los nrog Vajtswv sib raugzoo los ntawm Tswv Yexus Khetos lub npe thiab ntawm Vajtswv tus Ntsujplig lawm.

Siv Nej Lub Cev Ua Rau Vajtswv Tau Ntsejmuag

12Qeeleej yuav hais tias, “Kuv yeej muaj cai ua tau txhua yam.” Kuj yog li ntawd thiab ntag; tiamsis tsis yog txhua yam ntawd yuav muajnqis huv tibsi. Txawm yog “Kuv yeej muaj cai ua tau txhua yam,” los kuv yuav tsis cia ib yam twg uas kuv ua ntawd yuam tau kuv ua nws qhev. #1Klt 10:22 13Muaj dua lwmtus yuav hais tias, “Zaub-mov yog npaj los rau lub plab, thiab lub plab yog npaj los ntim zaub-mov.” Yog lawm, tiamsis Vajtswv yuav ua kom ob yam ntawd puastsuaj tag huv tibsi. Lub cev tsis yog cia siv rau kev nkauj kev nraug, tiamsis yog cia siv rau tus Tswv; thiab tus Tswv yog tus uas yug lub cev ntawd. 14Vajtswv twb tsa tus Tswv sawv hauv qhovtuag rovqab los lawm, Vajtswv lub hwjchim yuav tsa peb sawv rovqab los ib yam nkaus thiab.

15Nej tsis paub lov hais tias nej lub cev muaj feem koomxeeb nrog rau Khetos? Yogli ntawd, kuv puas yuav muaj cuabkav muab ib feem ntawm Khetos lub cev mus koomxeeb nrog rau ib tug niamntiav? Yeej tsis tau kiag li! 16Nej tsis paub tias tus neeg uas koomxeeb nrog rau ib tug niamntiav, nws yeej nrog tus niamntiav ntawd koom ib lub cev lawm no lov? Vajtswv Txojlus tau hais tias, “Nkawd yuav koom ua ib lub cev.” #Chiv 2:24 17Tiamsis tus uas nrog tus Tswv koom uake, tus ntawd yeej yog ib tug nrog tus Tswv.

18Nej yuavtsum khiav tawm ntawm txoj kev nkauj kev nraug. Txhua yam kev txhaum uas neeg ua, yog kev txhaum rau sabnraud ntawm nws lub cev; tiamsis tus uas ua kev nkauj kev nraug yog nws ua txhaum rau nws lub cev. 19Nej tsis paub tias nej lub cev yog Vaj Ntsujplig tus Dawbhuv lub tuamtsev no lov? Tus Ntsujplig ntawd nyob rau hauv nej thiab yog tus uas Vajtswv muab pub rau nej. Nej lub cev tsis yog nej li tiamsis yog Vajtswv li; #1Klt 3:16; 2Klt 6:16 20rauqhov Nws tau txhiv nej los ntawm ib tug nqi uas kim kawg li. Yogli ntawd, nej ciali siv nej lub cev ua rau Vajtswv tau ntsejmuag.

Currently Selected:

1 Kauleethaus 6: MWW2022

Highlight

Copy