Иаков 5

Байларга кичээндириг

1Байлар, ам силер мени дыңнаңар! Ишкирнигип ыглап-сыктаңар#Ам. 6:1; Лк. 6:24, чүге дээрге хай-халаптар силерже диргелип кел чыдар-дыр. 2Эртине-байлааңар ирип каар-дыр, идик-хевиңерни үзүт-ховаган дыдып чиптер-дир#Иов 13:28; Иса. 50:9; Мф. 6:19-20. 3Алдын-мөңгүнүңер дадарып каар-дыр! Оларның дады силерге удур херечилел бооп, мага-бодуңарны от-биле дөмей оя чирти бээр. Эртине-байлааңарны бо делегейниң сөөлгү хүннеринде чыып алган-дыр силер#Рим. 2:5. 4Силерниң шөлдериңерниң дүжүдүн ажаап берген ажылчыннарның акшазы чедир төлеттинмээн#Лев. 19:13; Ы. х. к. 24:14-15. Оларның халактаан ыы-сыызын дыңнаңар. Оларның халак-тилээ ам Аг-шериглиг Дээрги-Чаяакчының кулаанга чеде берген#Ы. х. к. 24:15; Иса. 5:9. 5Силер чер кырынга чыргап-таалап, мага хандыр чурттап келдиңер. Чүрээңер дөгерери-биле семирти азыраан хойлар чүрээ дег апарды#Иер. 12:3. 6Силерге удурланмаан чөптүг-шынныг улусту#5:6 Азы: «Чөптүг-шынныг Кижини». шииткеш, өлүрүп турдуңар.

Шыдамык чорук болгаш мөргүл

7Ха-дуңма, ынчангаш Дээрги-Чаяакчының ээп кээр хүнүнге чедир шыдажып көрүңер. Тараачын кижи черниң дүжүт бээр үезин кайы хире манаарын көрүңер даан. Ол күскү болгаш часкы чаъстар чаарын шыдамык манап кээр#Ы. х. к. 11:14. 8Силер база шыдамыыңар көргүзүңер. Идегелиңер черле ышкынмаңар, чүге дээрге Дээрги-Чаяакчының чедип кээр хүнү мыя бо келген-дир#1 Пет. 4:7.

9Ха-дуңма, шииттирип албазы-биле#Мф. 7:1, удур-дедир хомудал үндүрбеңер. Бурган шупту улусту шынныы-биле шиидер#Иак. 4:12.

10Ха-дуңма, Дээрги-Чаяакчының өмүнээзинден чугаалап турган медээчилерни хилинчек көөрүнүң болгаш шыдамык чоруктуң үлегери кылдыр ап көрүңер#Мф. 5:12; 23:34; Аж.-ч. 7:52; Евр. 11:32-38. 11Шыдажып үнген улусту#Мф. 10:22; Мк. 13:13; Иак. 1:12; Ажыд. 2:10 ам амыр-чыргалдыг деп алгап-йөрээп турар бис. Иовтуң туруштуунуң дугайында дыңнаан, түңнелинде ооң Дээрги-Чаяакчыдан чүнү алганын билир силер#Иов 1:21-22; 2:10; 42:10. Чүге дээрге Дээрги-Чаяакчы аажок өршээлдиг болгаш кээргээчел болгай#Хост. 34:6.

12Ха-дуңма, хамыктың мурнунда дээр-биле-даа, чер-биле-даа база өске-даа даңгырактар-биле даңгыраглаваңар. Бурганга шииттирбес дээш, «ийе» деп чугаалааныңар «ийе» дээн болзун, «чок» деп чугаалааныңар «чок» дээн болзун#Мф. 5:34-37.

13Кайы-бирээңер хилинчек көрген дижик? Ол кижи мөргүзүн. Кайы-бирээңер аас-кежиктиг болган дижик? Ол кижи Бурганга өөрүп четтирген ыдыктыг ырлар ырлазын#1 Кор. 14:15; Эф. 5:19. 14Кайы-бирээңер аараан дижик? Христиан ниитилелдиң удуртукчуларын кыйгыртып каарга, олар демги кижини Дээрги-Чаяакчының адындан олива үзү-биле чаап, ооң кадыкшылы дээш мөргүзүннер#Мк. 6:13. 15Бүзүрел сиңген мөргүл аарыг кижиниң кадыын эгидиптер, чүге дээрге Дээрги-Чаяакчы ону кадык кылыптар. А ол кижи бачыт үүлгеткен болза, Бурган ону өршээр#Иов 22:30. 16Ынчангаш Бурган силерни экиртсин дээш, үүлгеткен бачыдыңарны бот-боттарыңарга минниңер#Мк. 1:5; Аж.-ч. 19:18 база бот-боттарыңар дээш мөргүңер. Чөптүг-шынныг кижиниң мөргүлү аажок күштүг салдарлыг боор#Э. д. 20:17; Сан. 11:2; 3 Хаан. 13:6; 4 Хаан. 4:33-34; Иов 42:8; Аж.-ч. 9:40; 28:8.

17Илия медээчи, бистиң шуптувус ышкаш, анаа кижи чораан. Ол, чаъс чагбазын дээш, сеткилиниң ханызындан мөргүүрге, чер-чуртка үш чыл алды ай дургузунда чаъс чагбаан#3 Хаан. 17:1; 18:1; Лк. 4:25. 18Ол оон база катап мөргүүрге, дээрден чаъс кудуп эгелээн соонда#3 Хаан. 18:42-45, чер дүжүдүн берип эгелээн.

19Ха-дуңма, кайы-бирээңер шынның оруундан соора баарга, ону өске кижи Бурганче ээлдирипкен дижик#Гал. 6:1. 20Билдингир болзун: бачыттыг кижини шын эвес оруктан Бурганче ээлдирген кижи ону өлүмден камгалаар база ооң хөй бачыттарын өршээрин чедип алыр#У. ч. 10:12; 1 Пет. 4:8.

Currently Selected:

Иаков 5: TUV

Highlight

Copy