Matayo 8
8
Kwejiwa kwa munhū wa mbiji
1Aho wika ū mu lūgūlū, mabita mataale ga banhū gūnondeela. 2Kūhayimanīla munhū ūmò wa mbiji ūng'wegeela, ūgwa kū magūlū gakwe ūnamya, kūnū alīng'wīla; “Seeba ūlū ūtogwa ūdūgije kūneeja.” 3Nang'hwe ū Yesu ūgoloola nkono ūnkuumya, kūnū alīng'wīla; “Natogagwa elaga!” Haho na haho jūng'winga ī mbiji jakwe. 4Hūna ū Yesu ūng'wīla gīkī, “Ūtizūng'wila munhū nūūlū ūmò, alīyo jaga ūkiyooleche kūlī ngabīji, ūkafunye na shitambo gīt'ūmo Musa alagīlile; būbize ho būkaanīji kūbo.”
Kūpījiwa kwa ntūmami wa nshilikale
Luk 7:1-10
5Hūna ū wei ūja Kapelanaumu, aho washika ū mu nzengo, munhū ūmò, ntaale wi'gele lya bashilikale ung'wegeela. Ūng'wikūmbīlīja 6alīhaya gīkī, “Seeba alīho nsese wane alaalile mu kaya, alī na makoye mataale no kūlwa būsaatu bo mangwisha!” 7Nang'hwe ū Yesu ūng'wīla, “Nakūja nakampīje.” 8Alīyo ū ntaale wi'gele lya bashilikale ng'wenūyo, ūnshokeja ūhaya gīkī, “Seeba ū nene natigeleelilwe ū bebe ūshike a ha ng'wane, hayaga mhayo dūhū, akūpīla ū nsese wane. 9Nguno nane nalī munhū ūyo alī ha sīlīlī ya būsugi; nū nene nalī na bashilikale a ha sīlīlī yane. Nadūngije kung'wīla ūyū gīkī, ‘Jaga;’ ng'hana akūja. Nūūlū ūngī gīkī, ‘Nzūgū;’ ng'hana akwiza. Hama nūūlū nsese wane nashikile kūng'wīla, ‘Īaga gīkī, na ng'hana akwīta!”
10Ū Yesu aho wigwa gīko akankumya, u munhū ng'wenuyo, wīīgalūkila īmbiita ya banhū īyo yanondeelaga wīwīla gīkī, “Nalīmuwīla gwa ng'hana gīkī, nataalī kūbona kūzunya kwa mbika gītī īyī na hado yaya pye a hose ū mu Isiraeli. 11Nīyo nalīmuwīla bingī bakwiza, kūfuma kīya na ng'weli, bigashe ū mu būtemi bo ng'wigūlū hamò na Abulahamu na Isaka na Yakobo. 12Alīyo a baana ba ng'wikūlū bakūponyiwa hanze kū giiti, bakalīle na kūshelanya mino kwenūko!” 13Hūna ū Yesu ūng'wīla ū ntaale wi'gele lya bashilikale igana ng'wenūyo gīkī, “Jaga n'ībizage gīt'ūmo kūsanya kwako kūlī.” Ī likanza lyenīlo ūpīla ū ntūmami wakwe.
Kūpījiwa kwa banhū bingī
Mko 1:29-34; Luk 4:38-41
14Hūna ū Yesu ūūkingīla mu numba ya ng'wa Petelo, ūnsanga nina būko wa ng'wa Petelo alī mu ndīlī walalaga alena nswiza ntale. 15Ūshika ūnkuumya ha nkono gūnekela ū nswiza ntale, ūbūūka ūmeegeja shilīwa. 16I mhindi yeneyo a banhū bandya kūng'wenhela bingī abo bakoyiagwa masamva, nang'hwe ūyūgapeeja bo gūhaya mhayo dūhū; na a babo basaataga ūbapīja pye. 17Ū mu kwīta gīko akagūshikīlīja ūyo gūhayiwe na ng'hangi Isaya gīkī, “Ū būgokolo wise akabūbūūcha wei; nī ndwala jise ūjīnja we.”
Kūnondeela Yesu
Luk 9:57-62
18Ha numa ya yenīyo ū Yesu aho wabona gīkī ī libita lya banhū lyayūng'okalīīla na kūmpīndya hose hose, ūlagīla baje kū nkīlo. 19Hūna lūūlū, ū nangi wa shilagīlo ūshika ūng'wīla gīkī, “Nangi, nakūkūlondeela būlī kwene ūko ūlaje.” 20Nang'hwe ū Yesu ūnshokeja ūhaya gīkī, “Ī nyamhawa jilī na myobo, nī noni ja kūlala jilī na chanjo; alīyo ū Ng'wana wa Munhū atī na ha kūlaaja nūūlū ntwe gokwe!” 21Ūmò wa bahemba bakwe nang'hwe ūng'wīla gīkī, “Seeba nizunīlījage naje tame nakanjīke baba.” 22Alīyo ū Yesu ūng'wīla, “Bebe ng'wene nilondeelage dūhū, balekage a bafu babajīke a bafu babo.”
Kūlembeeja nyanza
Mko 4:35-41; Luk 8:22-25
23Hūna wingīla mu lyato, na a bahemba bakwe būnondeela mo. 24Kūhayimanīla gwabūūka nyaga ntaale, yūbipa no ī nyanza, gūyūbūūka mahuuli gashikile kūlītubīja ī lyato. Alīyo ū wei walī walaala tūlo. 25A bahemba bakwe būmisha balīhaya; “Tupijage Seeba, twashila!” 26Nang'hwe ūbawīla gīkī, “Bing'we ba kūzunya kūdo, nibūlī mulogoha gīko?” Hūna ūbūūka ūgūhama ū nyaga nī nyanza, hūbiza sele sele! 27A banhū benabo bakakumya nū kunū baliwila gīīkī, “Ū ng'wenūyū ī gete ni munhū kī, wakwigwiwa na miyaga na nyanza pye shang'wigwa?”
Banhū ba Gadala kwīngījiwa masamva
Mko 5:1-20; Luk 8:26-39
28Bahayūshika mu sī ya Gadala ū kū nkīlo gwa nyanza, banhū babīlī baalī na masamva būmanhya nang'hwe balīng'wizīīla kūfuma kū mashigila. Baalī bakalī kībi no; nose ī nzīla yenīyo yalī shilambu kūbītīlwa na munhū ose ose. 29Kūhayimanīla a banhū benabo bandya kūlīla balīhaya gīkī, “Ng'wana wa ng'wa Mulungu ūlī na mhayo kī na a bise? Nibūlī wiza kūtūluhya, alīyo ī likanza lyane lītaalī?” 30Līkasangwa lyalīho idale lya ngulubī ningī jadīīmaga katanaalo ū kwīnga aho baalī henaho. 31Hūna a masamva gūndayīīla galīhaya gīkī, “Ūlū ūlītūpeeja tūtwalage ū ng'widale lya ngulubī ījo.” 32Nang'hwe ūgawīla, “Jagi.” Ng'hana gūfuma gūkingīla ū mu ngulubī jenījo. Pyī ī lidale lyūpeela n'hambo kūjīlīīla kū lūgegu lo nyanza, jūkagwīla mu minzī jūng'wa nhuli, jūcha! 33A badīīmi bajo būpeela n'hambo, būja būūkīkumūcha ū mu nzengo ī mihayo yenīyo, nī ya banhū abo baalī na masamva. 34Pye a banhū būfuma ū mu nzengo kūja kūnola ū Yesu; aho bamona būng'wikūmbīlīja īnge ū mu sī yabo!
Currently Selected:
Matayo 8: SUKBI15
Highlight
Copy
Compare
Share
Want to have your highlights saved across all your devices? Sign up or sign in
Sukuma Bible © Bible Society of Tanzania, 2019.
