Matayo 5

Būlomeeji mu lūgūlū

Abo balī na lubango

1Aho wagabona a mabita ga banhū, ūlinha mu lūgūlū ūūkigasha. Bahayūng'wegeela a bahemba bakwe, 2wandya kūbalanga alīhaya gīkī,

3“Balī na lubango a bahabī mu moyo;

nguno ū būtemi bo ng'wigūlū būlī wabo.

4Balī na lubango abo balī na būpīna;

nguno bakūlūngūjiwa.

5Balī na lubango a bidohya;

nguno bakūbiza bingīji ba sī.

6Balī na lubango abo lūtuubo na nota yabo

shilī ha kūkooba būtūngīlīja;

nguno bakūshikīlīgījiwa ī ng'hūmbū jabo.

7Balī na lubango a bachīji ba shigongo;

nguno bakūchīlwa shigongo.

8Balī na lubango a beela mu moyo;

nguno bakūmona ū Mulungu.

9Balī na lubango a batūūji ba mhola;

nguno bakwitanwa balī baana ba ng'wa Mulungu.

10Balī na lubango abo bakūluhiagwa kūlwa kwīta yawiza;

nguno ū būtemi bo ng'wigūlū būlī wabo.”

11“A bing'we mulī na lubango ūlū bakūmusondagūlaga na kūmuluhya, na kūmulembekeja ya būbi bo būlī mbika kūlwa nguno yane. 12Yegagi na kūzalabana, īkī mulī na mheela nhaale ū ng'wigūlū. Nguno h'ūmo babaluhījaga na a bahangi a ba kale, abo baalīho aho bing'we mutaalī kūbiza ho!”

Munhu n'isana

Mko 9:50; Luk 14:34-35

13“A bing'we mulī munhu gwa sī, alīyo ū munhu ūlū gūlinda gūsūūka, angū gūdūgije kūsandūchiwa kī hangī? Gūkūbiza u mwanya kū būlī nīmo gose gose, ūlū ītī kūponyiwa hanze dūhū na kūpandagīlwa na banhū! 14A bing'we mul'isana lya sī, ū nzengo ūlū gūzengelilwe ha ngūlya gūtūdūla kūshīkījiwa. 15Na hangī a banhū batabachaga tala bīkundīkīja itangwa, alīyo bakīkīndīkaga h'ikīndīkīlo lya tala; ū mu gīko h'īkūbatiimīla pye abo balīmo ū mu numba. 16H'ūmo īlī nū kū bing'we, shiigelile ī lisana ling'we līyūbatiimīla a banhū, bashibone ī shītīle shing'we ī shawiza, bankūje ū Sīng'we ūyo alī ng'wigūlū.”

Kūshikīlīja shilagīlo

17“Mutiziganika gīkī ū nene nizile kūshīnja ī shilagīlo nūūlū a bahangi. Yaya natizile kwīta gīko, nizile kwīshikīlīja ī yenīyo. 18Nguno nalīmuwīla mu ng'hana yose gīkī, katīnga ho kadone nūūlū ka nuguta kamò ū mu shilagīlo, kūshisha aho igūlū na sī shikūbīta, na būlī mhayo gūshikīlījiwe. 19Hūna lūūlū nalīmuwīla gīkī, ose ose ūyo ūkenaagūla shilagīlo shimò shaho, nūūlū shibize shido na ginehe, hama ūbalanga na bangī kwīta gīko, ū munhū ng'wenūyo akūbiza atī na mwanya nūūlū hado ū mu būtemi bo ng'wigūlū. Alīyo ūyo wīta gīt'ūmo īlī, hūna ūbalanga na bangī kwīta chene; ū ng'wenūyo akūbiza ntaale ū mu būtemi bo ng'wigūlū. 20Kūlwa nguno nalīmuwīla gīkī, ū būtūngīlīja wing'we ūlū būtakīlile a ha būtūngīlīja bo balangi ba shilagīlo nū bo Bafalisayo, mutūdūla ū kwingīla ū mu būtemi bo ng'wigūlū.”

Shilagīlo shipya

21“Mukigwaga gūhayiwe ū kū bakūlūgenji gīkī, ‘Yaya ū kūbūlaga; na būlī ng'wene ūyo ūbūlaga wigeleelagwa nsango.’ 22Alīyo ū nene nalīmuwīla gīkī, būlī ng'wene ūyo ampelanīlile ng'wiye wigeleelilwe kūpandīka nsango. Nīyo nūūlū munhū ūng'wīla munhū ūngī mhayo gwa koolecha kūndalaha, ū ng'wenūyo nang'hwe shing'wigeleelilwe kūshishiwa kwibanza. Nūūlū hamo ūng'wīla gīkī, ‘Ū bebe ūlī līkūdūhū.’ Ū ng'hayi ng'wenūyo wigeleelagwa nsango gwa mu nyanza ya moto! 23Nose lūūlū īkūbeelela ībize gīkī, nūūlū ūlīfunya shakwinha shako ha ng'walīlo, hūna wizūkwa gīkī ūlī na wilemeelwa na ndūgūyo, 24shilekage henaho ha būtongi bo ng'walīlo, ūje tame ūkiyelelwe mbīnyigwa nū ndūgūyo, hūna wize ūshifunye ī shakwinha shako. 25Iyangūlage nū ng'wilemeelwa wako, wiyigwe nang'hwe wangū aho mutaalī mu nzīla. Atizūkūshisha kūlī namuji, nang'hwe ū namuji akūtūūle mu makono ga nshilikale ūponyiwe mu jeela. 26Nalīkūwīla gwa ng'hana gīkī, ūtūfuma mo kūshisha ūmale ū kūlīpa pyī ū būgasa wako; kūshisha hela ya kūmalīja!”

Shibi sha būshihani

27“Mukigwaga gūhayiwe gīkī, ‘Yaya ū kūshihya.’ 28Alīyo ū nene nalīmuwīla gīkī, būlī ng'wene ūyo ūnola nkīma mu kūng'wikūmva, wamalaga kūshihya nang'hwe ū mu moyo gokwe. 29Hūna lūūlū, nūūlū liso lyako lya kū būlyo lyūkwipamya līkobolage ūlīponye ūlekane nalyo, nguno īlī hambū hambū lījimīīle ibudīka lya mīlī gwako, kūtinda ī gīkī pyī ū mīlī gūponyiwe mu nsango gwa moto. 30Hama nūūlū nkono gwako gwa būlyo gūkūhūbya, gūbbutage ūgūponye, ūlekane nago; nguno īlī hambū hambū lījimīīle ibudīka lya mīlī gwako dūhū, kūtinda ī gīkī pyī ū mīlī gūponyiwe mu nsango gwa moto!”

Kwihīga kwa būbūlagi bo kaya

Mat 19:9; Mko 10:11-12; Luk 16:18

31“Hangī gūhayiwe gīkī, ‘Ose ose ūyo ūneka nke wakwe shiigelile ang'winhe talaka.’ 32Alīyo ū nene nalīmuwīla gīkī, ūyo ūneka nke wakwe kūlwa nguno yīngī yose yose, ūlū ītī kūlwa nguno ya būshihani, wang'wītaga kūbiza nshihani; hangī nū ngosha ūyo ūntoola nkīma alekilwe, nang'hwe wingīlaga mu būshihani.”

Kwilang'hana na wilahīji

33“Na hangī mukigwaga gūhayiwe ū kū bakūlūgenji gīkī, ‘Yaya ū kūlahīla nyamaama, alīyo nshikīlīgījage ū Seeba ī shilahīlo shako.’ 34Gwike ū nene nalīmuwīla gīkī, yaya gete ū kūlahīla kūnū mukūlīhayaga igūlū, nguno ī lyoi līl'isumbī lya ng'wa Mulungu. 35Yaya nūūlū kwīhaya sī, nguno ī yoi īlī būtūūlo wa mhambala jakwe; pyī nūūlū nzengo gwa Yelusalemu yaya, nguno gūlī nzengo gwa Ntemi ntaale. 36Nīyo nūūlū kūgūhaya ntwe gwako nī chene yaya; nguno ū bebe ūtī na būdūla bo kūbeeja lūywīlī nūūlū lūmò dūhū, lwape nūūlū lwapi! 37Alīyo ū mhayo gwing'we ūlū gūbiza ‘Ehe’ ni ībizage ‘Ehe.’ Ūlū ‘Yaya’ numho ‘Yaya.’ Nguno pyī ī yīngī ī ya kūkīla a ha yenīyī, īkafumaga kūlī ng'wanishi!”

Mihayo ya kūmala shiilī

Luk 6:29-30

38“Mukigwaga gūhayiwe gīkī, ‘Liso kūlwa liso,’ na gīkī, ‘Lino kūlwa lino!’ 39Alīyo ū nene nalīmuwīla yaya ū kwilwisha na munhū ng'hūnga; hūna lūūlū ūlū ose ose ūkūpaala ipī kū lūsaya lo kū būlyo, ngalūkījage nū lwandī ū lūngī! 40Nūūlū ūngī ūgaagaana kūkūtwala kwibanza kūlwa kūkooba kūkūtaaja ishadi lyako, nekelage nī ng'hanjo yako. 41Nūūlū hamo ūngī hangī ūkūhadīkīja kūja nang'hwe lūgendo lwa ka koleho, jaga nang'hwe ng'hangala ibīlī kokelaho. 42Ūyo ūkūlomba shikolo ng'winhage, nīyo ūlū munhū alītogwa kūsola būgasa kūfuma kūlī bebe, yaya ū kūng'wima.”

Kūbatogwa banishi

Luk 6:27-28,32-36

43“Mukigwaga gūhayiwe gīkī, ‘Ntogagwe nzenganwa ng'wiyo, alīyo ū ng'wanishi wako nkolagwe!’ 44Gwike ū nene nalīmuwīla batogagwi na a banishi bing'we, hangī ng'ūbalombela abo bakūmuluhyaga. 45Ū mu gīko hū mukūbiza baana bakwe ū Sīng'we ūyo alī ng'wigūlū. Nguno ū ng'wene atī na būsolanhya, akabaakījaga ī līīmi lyakwe pye a banhū, a babūbi na a bawiza; nī mbula akabinhaga a batūngīlīja na a batī batūngīlīja. 46Ī gīsī mukūpandīka mheela kī ūlū ng'ūgelela kūbatogwa dūhū abo bamutogilwe a bing'we? Dūhaya na a batobisha ba goodi bakīītaga gīko dūhū! 47Nūūlū ng'ūgelela kūyūgīsha badūgū bing'we dūhū, mukūbiza mubalebije kī abo bataamanile Mulungu? 48Hūna lūūlū, shiigelile mubize bashikanu gīt'ūmo alī ū Sīng'we ūyo alī ng'wigūlū.”

Currently Selected:

Matayo 5: SUKBI15

Highlight

Copy

Compare