Matayo 3
3
Kūbatījiwa na kūgeng'wa
1Ū mu shikū jenījo Yohana Matīīja akiza kū matogolo ga Būyudaya; ūyūlomeela 2alīhaya, “Galūkagi nguno ū būtemi bo ng'wigūlū wegeelaga.” 3Ū ng'wenūyo hū ng'wene ūyo ahayiwe na ng'hangi Isaya, gīkī,
“Ilaka lya munhū akūhamukaga mu matogolo,
‘Beeja beejagi ikūūwa lya ng'wa Seeba,
jigoloolagi ī nzīla jakwe.’”
4Ī shizwalo sha ng'wa Yohana shalī sha booya bo ngamīla, ū mu nkīmbīlī witungaga ngwasho gwa nkoba, ī shilīwa shakwe shalī njige na būūkī bo mu matogolo. 5Banhū bingī bakayiza ūko walī; bafumaga Yelusalemu na hose hose ū mu sī ya Būyudaya, nū mu sī pyī ī ja kū mbalama ya mongo gwa Yolodani. 6Būlī bene bashikaga batambūūla ī shibi shabo wababatīīja ū mu mongo gwenūyo. 7Gwike aho wabona Bafalisayo bingī na Basadukayo baliza ū kū būbatīīja bokwe; ūbawīla, “Bing'we būbyīle wa nzoka, nani wamuhūgūlile gīkī mugūpeele ū nsango ūyo gūliza? 8Hūna lūūlū, twajagi matwajo kūlwa koolecha būkaanīji bo kūgalūka kwing'we. 9Mutiganikage mukwiwīlaga gīkī, ‘Tūlī ba nkulugenji wise Abulahamu.’ Nguno nalīmuwīla nūūlū kūfuma mu mawe gīt'aya, ū Mulungu adūgije kūng'wenhela baana ū Abulahamu. 10Nīyo ī haha īlīho mbasa ītūūlilwe ng'hana ng'hana a ha matina ga mitī. Hū kūhaya būlī ntī ūyo gutafunyaga matwajo gawiza, gūkūbbutwa gūponyiwe mu moto.
11“Ū nene ng'hana nalīmubatīīja mu minzī kūlwa kūgalūka; alīyo a ha numa yane aliza ūyo anikīlile ū būdūla. Ū nene natigeleelilwe nūūlū ni kūmūūkīja shilatū shakwe, ū ng'wenūyo h'ūyo akūmubatīīja na Moyo Ng'wela, na moto. 12Ū lūhūngo lokwe alī nalo mu nkono gokwe wei ng'wenekīlī, hama ū lūbūūga lokwe akūlūpyagūla alweje lwele pe. Ū būsīga abūkuminge chiza abūtūūle ng'wibīkīlo lyakwe; alīyo a meela a gene ūgapemba mu moto gūtī gwa kūjima!”
Kūbatījiwa kwa ng'wa Yesu
Mko 1:9-11; Luk 3:21-22
13Hūna ū Yesu wīnga ī Galilaya, ūja ūko walī ū Yohana, ū kū mongo gwa Yolodani, akabatījiwe. 14Alīyo ū Yohana ūnemeja alīhaya, “Nibūlī ūliza kūlī nene, alīyo ū nene hū īnigeleelile ūnibatīīje ū bebe?” 15Nang'hwe ū Yesu ūnshokeja ūng'wīla, “Nizunīlījage ī haha, nguno īlī yawiza tūbūshikīlīje ū būtūngīlīja ū bose.” Hūna ūnzunīlīja. 16Ū Yesu aho wamala ū kūbatījiwa, haho na haho ūfuma ū mu minzī. Ū likanza lyenīlo lyūkundūka ī ligūlū, ūmona ū Moyo wa ng'wa Mulungu alika gītī ng'hūūlū, izile aho wale. 17N'ilaka lyūfuma ū ng'wigūlū līlīhaya gīkī, “Ūyū ng'wene Ng'wana wane Ntogwa, ūyo aniyegije hataale no!”
Currently Selected:
Matayo 3: SUKBI15
Highlight
Copy
Compare
Share
Want to have your highlights saved across all your devices? Sign up or sign in
Sukuma Bible © Bible Society of Tanzania, 2019.
