Matayo 27

Yesu kwibanza lya ng'wa Pilato

Mko 15:1; Luk 23:1-2; Yoh 18:28-32

1Hūna lūūlū aho wela ī dilū, pye a bagabīji bataale na a banamhala bigasha, bizunīlīja gīkī ū Yesu abūlagwe. 2Hūna būntunga, būntongeja bantwalile kūlī Pilato, ūyo walī nsugi w'ipandī lyenīlo.

Kūcha kwa ng'wa Yuda

Shī 1:18-19

3Ū Yuda, ū nodeejibo ng'wa Yesu, aho wabona gīkī walamulwa, ūgalūcha a maganiko. Ī shilingi ījo makūmi adatū ūjishosha ū kū bagabīji bataale na a banamhala. 4Ūūkabawīla gīkī, “Naahūbile ū kūlodeela mininga gatī na shilingo!” Nabo būng'wīla, “Tūlī na mhayo kī hangī a bise? Ūkwīlonja bebe ng'wenekīlī ī yenīyo!” 5Ūjiponeja mu hekalu ī hela, ū wei wīnga a henaho ūja ūūkinija! 6Alīyo a bagabīji bataale aho bajisola ī hela jenījo būhaya gīkī, “Ītī yawiza ū kūjitūūla ng'wibīkīlo lya manong'ho, nguno ī joi jilī hela ja mininga.” 7Lyalīho itongo lya mūmbi, bizunīlīja kūjitūmamīla kūlīgūla, gīkī bayūjīkīla mo bageni. 8Ī litongo lyenīlo lyūyitanwa Itongo lya mininga, kūshisha na lelo yene. 9Gūbiza gwashikīīla ūyo gūhayiwe na ng'hangi Yelemia; gīkī, “Bakajisola ī shilingi īji makūmi adatū, ījo jilī mpango gokwe ūyo Baisilaeli bakang'wisaabīla, 10būjigūla itongo lya mūmbi gīt'ūmo Seeba akanilagīīlīla.”

Yesu kū būtongi bo ng'wa Pilato

Mko 15:2-5; Luk 23:3-5; Yoh 18:33-38

11Na ng'hana ū Yesu wīmīīla ū kū būtongi bo nsugi; ū nsugi ūmūja gīkī, “Ū bebe hū ūlī ntemi o Bayudaya?” ū Yesu ūshosha ūng'wīla, “H'ūmo ūlīhayīla!” 12Alīyo aho bandya kūmūūla a bagabīji bataale na a banamhala, atashokije nūūlū mhayo! 13Nose ū Pilato ūng'wīla gīkī, “Bebe ūtūyigwaga īyo balīkūbūūla?” 14Nahene atanshokegije nūūlū mhayo gūmò; ū nsugi ūkumya no!

Yesu ūlamulwa nsango gwa kūbūlagwa

Mko 15:6-15; Luk 23:13-25; Yoh 18:39–19:16

15Ū mu shikū ja shigukulu, ū nsugi walī na shīmīle sha kūbataligūlīla a banhū ntungwa ūyo būng'wigongela boi. 16A makanza genayo walīho ntungwa nkumūku witanagwa Balaba. 17Hūna lūūlū ū Pilato ūbabūja a banhū abo baalī bibilinga; ūhaya gīkī, “Mutogilwe namutaligūlīle nani? Balaba, nūūlū ū Yesu ūyo akitanagwa Kilisito?” 18Nguno walī amanile gīkī baalī bantūūla ū Yesu mu makono gakwe kūlwa wilu. 19Ū Pilato aho ataalī igashije ū ng'wibanza, ū nke okwe ūntūmīla nhūng'wa kūng'wīla gīkī, “Ū munhū ng'wenūyo ntūngīlīja nekage ū bebe. Nguno ū būjikū bo lelo nakoyaga hataale no mu shilooti kūlwakwe.” 20Gwike a bagabīji bataale na a banamhala, baalī babasamīlīja a banhū gīkī banombe abataligūlīle Balaba, ū Yesu ng'wene ache! 21Hūna lūūlū ū nsugi ūshokeela hangī kūhaya gīkī, “Ū mu babīlī aba, mutogilwe namutaligūlīle alī?” Nabo būhaya, “Balaba!”

22Nang'hwe ū Pilato ūbabūja, “Alū ū Yesu ūyo akitanagwa Kilisito, nang'wīte ginehe ū ng'wene?” Pye a bose būhoolanīja kūhaya gīkī, “Nekage akong'we ha nsalaba!” 23Nang'hwe ūhaya, “Nibūlī wītile būbi kī?” A boi bongeja kūhoolanīja n'ilaka lya higūlya balīhaya gīkī, “Ni akomagwe ha nsalaba!” 24Ū Pilato aho wabona gīkī gūtūsobookaga mhayo ntengeke, ūlū ītī kongeja kūkūla nsambo dūhū, ūsola minzī ūkalaba a makono gakwe kū būtongi wabo a banhū; ūhaya gīkī, “Neela ū nene, nīnga ū mu mininga gakwe ū munhū ng'wenūyū, mukwīlonja bing'we benekīlī ī yenīyī!” 25Pye a banhū būnshokeja balīng'wīla gīkī, “A mininga gakwe ni gabizage ha mitwe yise na baana bise!” 26Na ng'hana ūbataligūlīla ū Balaba. Aho wamala kūntūla mbooko ū Yesu, ūntūūla mu makono gabo akakong'we ha nsalaba.

Yesu ūgīmva nyachilū

Mko 15:16-20; Yoh 19:2-3

27Hūna a bashilikale ba nsugi būng'wingīja ū Yesu mu numba ya h'ikūlū, būng'wihoolekela ibita igima. 28Būnzuuja ī shizwalo īsho walī azwalile, būnzwalīkīja ng'hanjo ya nzulunge. 29Hama būbeeja na ngikili ya ming'hwa, nayo būnzwalīkīja ū kū ntwe gokwe, būlola būndimya na nang'ha ū mu nkono gokwe ū gwa būlyo; hūna bandya kūyūntugīja mazwi ū kū būtongi bokwe, kūnū balīngīmba nyachilū; būyūhaya gīkī, “Kūlaga ūhangame ntemi o Bayudaya!” 30Būyūnswīla na mate; banoga būgūsola ū nang'ha būyūntūlīla ū kū ntwe gokwe! 31Aho bamala ū kūngīmba nyachilū gīko, būnzuuja ī ng'hanjo ya nzulunge, būnzwalīkīja ī shizwalo shakwe. Hūna būntwala kūjūnkoma ha nsalaba!

Yesu kūkong'wa ha nsalaba

Mko 15:21-32; Luk 23:26-43; Yoh 19:17-27

32Aho balīja, būmona munhū ūmò muna Kilene, lina lyakwe Simoni. Būng'hadīkīja amūūkīje ū nsalaba gokwe. 33Hūna būnshisha ū Yesu h'ipandī līkitanagwa Goligota, makūlū gaho ipandī lya lūpanga. 34Būng'winha mvinya īsangije ndūlū gīkī ang'we; alīyo aho wīloja atīng'wile. 35Bahayūmala ū kūnkoma būshigabanha ī shizwalo shakwe bo kūshesela mbale. 36Hūna bigasha henaho kūnang'hana. 37A ha nsalaba a higūlya ya ntwe gokwe, būtūūlwa ho wandīke bo kūbūūlwa kwakwe būhayile gīkī, “ŪYŪ NG'WENE YESU NTEMI O BAYUDAYA” 38Na basambo babīlī bakakong'wa hamò nang'hwe, būlī ng'wene ha nsalaba gokwe, ūmò kū būlyo bokwe, ūngī kū lūmoso.

39Abo babītīlaga haho hihī būyūnsondagūla, kūnū bakūshingishaga mitwe yabo; 40balīhaya, “Ni ginehe ng'wing'wana o kūsambagūla hekalu na kūmala kwīzenga mu shikū idatū. Alik'ipījage shi lūūlū ūlū ūlī Ng'wana o ng'wa Mulungu, wike ho a ha nsalaba!” 41Na a bagabīji bataale bandya kwiyineenelegeja na balangi ba shilagīlo, hamò na banamhala. Būyūhaya gīkī, 42“Walūpījaga bangī dūhū gashi nīyo, ū wei ng'wenekīlī walemeelagwa ū kwipīja. Angū nang'hwe ntemi o Bayudaya ī gīko, ni ikage ho a ha nsalaba ī haha, tūkūnzunya! 43Walihamba hambaga kūnsanya Mulungu, ni ampījage lūūlū ī haha ūlū ng'hana ang'hayile. Īkī walikalaga ūtwilambagūlīla alīhaya gīkī, ‘Nalī Ng'wana o ng'wa Mulungu!’” 44Na a basambo, abo baalī bakong'wa hamò nang'hwe, nabo būyūmbyeedeleja!

Kūcha kwa ng'wa Yesu

Mko 15:33-41; Luk 23:44-49; Yoh 19:28-30

45Ī līīmi aho lyashika ntwe gatī, shūbiza ho giiti; shīkundīkīja pyī ī sī, kūshisha sa kenda. 46Mu sa gītī kenda gīko, ū Yesu ūlīla n'ilaka itaale alīhaya, “Eli Eli, lema sabaktani?” Hū kūhaya, “Mulungu wane, Mulungu wane, nibūlī wanilekaga?” 47Bamò babo abo baalī bīmīīla henaho aho bigwa būhaya gīkī, “Ū munhū ūyū ong'witana Eliya!” 48Hūna ūmò ūpeela haho na haho kūjūsola ibbūpyo, ūlīlobya mu siki ūlītunga kwidete, wiza ūng'winha ang'we. 49Alīyo a bangī būhaya, “Lekaga tūlole, ūlū akwiza ū Eliya ampīje!”

50Hūna ūlīla hangī ū Yesu n'ilaka itaale; ūgūfunya ū moyo gokwe! 51Kūhayimanīla ī lisenge lya mu hekalu lyatandūka kūfuma kwigūlya kūshisha ha sī, lyūlekana habīlī; nguno īkading'hima nyahīnga nhaale kūshisha na mawe gūpaanagūka. 52Na shigila shūkundūka, mibīlī ya beela bingī abo baalī balaalile yūjūūka. 53Būfuma ū mu shigila, aho wajūūka kūfuma mu bafu ū Yesu, bingīla ū mu nzengo ng'wela biyoolecha kū banhū bingī. 54Ū ntaale o bashilikale igana ūyo onang'hanaga ū Yesu, hamò na a babo baalī bīmīīla nang'hwe bakogoha no aho bībona ī nyahīnga pyī nī yīngī īyo īkilonga. Biwīla gīkī, “Bing'we ū munhū ng'wenūyū walī Ng'wana o ng'wa Mulungu ng'hana!” 55Ibita lya bakīma bingī baalī banondeela ū Yesu kūfuma Galilaya, kūlwa kūmanūngunanha; nabo baalīho biloleelaga balī ka kūle. 56Ū mu benabo baalīmo ba Malia Magadalena, nū Malia ū nina o ba Yakobo na Yosefu; hamò na nina o ba ng'wana Zebedayo.

Kūjīkwa kwa ng'wa Yesu

Mko 15:42-47; Luk 23:50-56; Yoh 19:38-42

57Aho yabiza mhīndī, wiza munhū nebe nsabi, muna Alimataya, lina lyakwe Yosefu; nang'hwe walī ng'hemba o ng'wa Yesu. 58Ū munhū ng'wenūyo ūja ū kūlī Pilato ūūkagūlomba ū mīlī go ng'wa Yesu; ū Pilato ūlagīja winhwa. 59Hūna lūūlū ū Yosefu ūgūsola ū mīlī, ūgūlingīīla ng'wenda gwawiza gwa kitaani. 60Hanuma ūūkagūlaaja mu shigila shakwe shipya, walī wasīmba ng'wiwe gīt'ihalo; a ha nyango ūpilingītīja ho iwe itaale lyūchiba; hūna wīnga ho. 61Ū Malia Magadalena nū Malia ū ūngī, baalī bigasha balolelile ū kū shigila.

Kūlang'hanwa kwa shigila

62Aho lwabīta ū lūshikū lwenūlo, ūlo lwalī lwa kūlonja lonja, ū kū ntondo yaho a bagabīji bataale na a Bafalisayo bikobya būja ū kūlī Pilato. 63Būūkang'wīla gīkī, “Baba twizūkwa ūmo walikalaga ūhayīla ū ng'wing'wana ū nomolomo ūyo, aho walī ataalī mpanga, angū gīkī, ‘Ha numa ya shikū idatū nakūjūūka!’ 64Hambū hambū ni walagīja shilugalwe chiza ī shigila shidaame, kūshisha jishike ī shikū ījo idatū. Batiziza a bahemba bakwe bang'wibe, hūna bandye kūbawīla a banhū gīkī, wajūūkile kūfuma mu bafu. Ūlū yūja gīko ū būlomolomo wene būkūbiza būtaale no, kūtinda ū bo kwandya!” 65Nang'hwe ū Pilato ūbawīla, “A balang'hani a bene mulī nabo, bing'we jagi mukalugale ho mudaamye gīt'ūmo mumanīlile.” 66Būja būūkalīzengeela ī liwe, īlo lyalī līchibīgije a ha nyango gwa shigila, lyūdaama. Būlītūūlīla na lūmeng'ho, būleka ho na balang'hani.

Currently Selected:

Matayo 27: SUKBI15

Highlight

Copy

Compare