Matayo 25
25
Shigemeng'hejo sha banhya ikūmi
1“Hūna lūūlū, ū būtemi bo ng'wigūlū būkwikolanījiwa na banhya ikūmi, abo bakasola tala jabo būja kūng'wīma nzīla ntooji. 2A batanò babo baalī babbūūlī, alīyo a bangī a batanò būbiza bachagūku. 3A babbūūlī bakasola ī tala jabo ahene, gwike a maguta a ga kongeja batasolile. 4Alīyo a bachagūku, aho basola ī tala jabo būsola na maguta mu shiseme sha helegeko. 5Ū ntooji akadīla ū kūshika, nose būtindwa tūlo pye a bose, būlaala.”
6“Ū būjikū aho bohuumūlīja, kūhayimanīla yoge na mhūndū jazīlīng'hanya; banhū bandya kwiwīla, ‘Oshika ū ntooji, nsūng'wanhagi.’ 7Hūna lūūlū a banhya ikūmi benabo būgulumūka wangū wangū, bandya kūgūbeeja ū moto gwa tala jabo jibake chiza. 8A babbūūlī būbawīla a bachagūku gīkī, ‘ī tala jise jilīlimalima jilīhaya kūjima, tongejagi nise a maguta ging'we.’ 9Nabo a bachagūku būbashokeja balīhaya gīkī, ‘Gatūtwigela a bise na a bing'we; jagi ū kū bajinja mukagūle ging'we ning'we.’ 10Aho balīja ūshika ū ntooji, abo baalī bamalīīlile bingīla nang'hwe ū mu numba ya būgeni, gūlugalwa ū nyango!
11“Ha numa ya henaho būshika na a banhya a bangī balīhaya, ‘Tūlugūlīlage nise baba!’ 12Nang'hwe ūbashokeja alīhaya gīkī, ‘Nalīmuwīla gwa ng'hana natūmumanaga ū nene a bing'we!’ 13Na lūūlū, ikalagi nzūgūlū matū; nguno mutalūmanile ū lūshikū nūūlū ī likanza.”
Lūsumo lo basese na talanta
Luk 19:11-27
14“Na hangī īkūbiza gītī munhū nebe ūyo akahaya kwīnga ha ng'wakwe, ūleka ogabanhya basese bakwe sabo jakwe. 15Ūng'winha būlī ng'wene gīt'ūmo būlī ū būdūla bokwe; ūmò ūng'winha talanta itanò, ūngī ibīlī, ūngī īmò; hūna ūja ū wei. 16Ūyo akasola talanta itanò haho na haho ūja ūūkandya kūjitūndanya ī sabo jenījo, jibyalana, ūpandīka talanta jingī itanò. 17Nū yūyo akinhwa ibīlī wīta gīko, nang'hwe ūpandīka jingī ibīlī. 18Lelo ūyo akasola īmò, ū ng'wene ūja ūūkasīmba ha sī, wīfukīīla henaho ī sabo ya ng'wa ise būgonzo.
19“Aho jabīta shikū ningī wiza ū saabo būgonzo; ūshikīla kūbaloja a katūmamīle kabo. 20Ūyo walī wasola talanta itanò ūshika; wenha jingī itanò ūhaya, ‘Baba ūkaninha talanta itanò, naapandīkile jingī itanò jiiji.’ 21Ū ise būgonzo ūng'wīla, ‘Būgatū ū bebe ūlī nsese wawiza na ntūngīlīja. Īkī wabizile ng'wishigwa mu shigehu nakūkūtūūla higūlya ya shikolo shingī, ingīlaga mu būyegi bo ng'wa so būgonzo.’ 22Ūshika nū wa talanta ibīlī, nang'hwe ūhaya, ‘Baba ūkaninha talanta ibīlī, naapandīkile jingī ibīlī jiiji.’ 23Nū ng'wene ūng'wīla ū ise būgonzo gīkī, ‘Būgatū; ūlī nsese wawiza na ntūngīlīja. Īkī wabizile ng'wishigwa mu shigehu nakūkūtūūla higūlya ya shikolo shingī, ingīlaga mu būyegi bo ng'wa so būgonzo.’ 24Wahayūkiza ūyo olī opandīka talanta īmò, ū ng'wene ūshikīla kūhaya, ‘Baba nakūdeebile gīkī ū bebe ūlī munhū ngugu, hangī ūkagesaga nū kūko ūtabībile, hama ūkakumingījaga nū kūko ūtahambile. 25Hūna lūūlū nakogoha, nūja nūkīsīmbīla ha sī ī talanta yako nībisa; yīyī ūlīyībona ī sabo yako!’
26“Ū ise būgonzo ūnshokeja alīng'wīla gīkī, ‘Ū bebe ūlī nsese wabūbi, nīyo ūlī ng'oolo; gashinaga ūmanile gīkī nakagesaga nī shisho natashibībile, na gīkī nakakumingījaga kwīngīīla nū kūko natahambile! 27Ūlū chene yalī īkwigeleelilwe kwībīka kū basūlūja ī sabo yane, a ha kūshoka ni nayanukūla ī sabo yane nī mbyalanwa jaho. 28Ntaajagi ī talanta yenīyo mung'winhe ūyo alī najo ikūmi. 29Nguno ūyo alī nasho shingī akongejiwa na kūtinda ho, alīyo ūyo atī na shikolo akūtaajiwa nī shisho alī nasho! 30Ū nsese ūyo atī na ngofyoolo mponyagi kū giiti sha hanze ū ng'wene, ūko kūkūbiza kūlīla na kūshelanya mino.’”
Lūshikū lo kūlamulwa kwa banhū
31“Hūna lūūlū, a ha kūshoka kwakwe ū Ng'wana wa Munhū, akwiza ng'wikūjo lyakwe hamò na bamalaika bakwe. Ūlū ūshika akwigasha h'isumbī lyakwe lya būtemi. 32Hūna a banhū ba mahanga gose, bakwīmīīla kū būtongi bokwe. Nang'hwe akūbakomanya gīt'ūmo ndīīmi akakomanījaga ng'holo na mbūli. 33Ī ng'holo akūjitūūla kū nkono gwakwe gwa būlyo, ī mbūli kū lūmoso lokwe. 34Ha numa ya yenīyo, ū Ntemi akūbawīla abo balī kū nkono gwakwe gwa būlyo gīkī, ‘Nzūgi a bing'we, abo mulī na lubango ja ng'wa Baba. Ingīlagi ū mu būtemi ūbo mulonja longejiwe kūfuma ha kūseeng'wa kwa sī. 35Nguno naalī natuubile ng'ūninha shilīwa, na naalī nakolilwe nota ng'ūninha minzī nūng'wa, na hangī naalī ngeni ng'ūnanukūla. 36Hama naalī dūūhū ng'ūninha shizwalo, naalī nsaatu ng'wiza kūnigīsha, hangī naalī mu jeela, nū ng'wene ng'wiza kūnilola.’
37“Nabo a batūngīlīja bakūnshokeja balīhaya gīkī, ‘Seeba nanalī aho tūkakūbona ūtuubile tūkwinha shilīwa, nūūlū ūkolilwe nota tūkwinha minzī ga kūng'wa? 38Na hangī tūkakūbona nanalī ūlī ngeni tūkwanukūla, nūūlū ūlī dūūhū tūkwinha shizwalo? 39Hangī yalī nanalī aho tūkakūbona ūlī nsaatu, nūūlū ūlī mu jeela twiza kūkūlola?’ 40Nang'hwe ū Ntemi akūbashokeja alīhaya, ‘Nalīmuwīla gwa ng'hana gīkī, ī yose īyo ng'wabīītīlaga a badūgū bane a bado bado aba, ng'wanīītīlaga nene.’
41“Hama na a babo balī kū nkono gwakwe gwa lūmoso akūbawīla gīkī, ‘īngagi a henaha a bing'we nguno muzumilwe, jagi kū moto ūyo gūpembilwe kūlwa ng'wa Shetani na bamalaika bakwe. 42Nguno aho naalī natuubile na nakolilwe nota, mutaninhile shilīwa nūūlū minzī ga kūng'wa. 43Naalī ngeni, nahene mutananukūlile, hangī naalī dūūhū mutaninhile shizwalo; naalī nsaatu, hangī naalī mu jeela, alīyo mutizile nūūlū kūnilola!’ 44Nabo bakūnshokeja balīhaya gīkī, ‘Seeba nanalī tūkakūbona ūtuubile nūūlū ūkolilwe nota, nūūlū ūlī ngeni, nūūlū ūlī dūūhū, nūūlū ūlī nsaatu, nūūlū ūlī mu jeela; nise tūleka ū kūkūgunanha?’ 45A henaho nang'hwe akūbashokeja alīhaya; ‘Nalīmuwīla gwa ng'hana gīkī, ūmo ng'walī mutang'wītīlile mhayo nūūlū ūmò wa bado bado aba, mutanīītīlile nene!’ 46Hūna lūūlū a benabo bakūja mu nsango gwa būja na būja; a batūngīlīja nabo bakūja mu būpanga butashilaga.”
Currently Selected:
Matayo 25: SUKBI15
Highlight
Copy
Compare
Share
Want to have your highlights saved across all your devices? Sign up or sign in
Sukuma Bible © Bible Society of Tanzania, 2019.
