Roma 13
13
‘Ia Usiusita‘i i le Pule
1‘Ia usiusita‘i tagata uma ta‘ito‘atasi i ē ‘ua i ai le pule; auā e leai se pule pe ana lē mai le Atua; o pule uma fo‘i o lo‘o i ai nei na fa‘atūina e le Atua.#Tito 3.1; Ioane 19.11; Fa‘ata 8.15 2O le mea lea, o lē e tete‘e i le pule, ‘ua tete‘e e ia le tofiga a le Atua; o i latou fo‘i o ē e tete‘e e fa‘amasinoina. 3Auā o ali‘i e lē o se fa‘amata‘u i latou i tagata amiolelei, a o tagata amioleaga. ‘E te lē fefe ‘ea i le pule? ‘Ia e amiolelei ‘ona ta‘uleleia lea o oe e ia; 4auā o ia o le ‘au‘auna a le Atua ‘ina ‘ia lelei ai oe. ‘Ae ‘āfai ‘e te amioleaga, ia e fefe ai, auā e lē fo‘i fua lana pelu; auā o le ‘au‘auna o ia a le Atua, na te fa‘ao‘oina atu le to‘asā o le Atua i ē e amioleaga.#Sala 82.6; Roma 12.19 5O le mea lea e tatau ai ‘ona ‘outou usiusita‘i, e lē gata ‘ona o le to‘asā, a ‘ona o le loto fuatiaifo fo‘i.
6O le mea fo‘i lea tou te totogiina atu ai lafoga, auā o ē e pule, o ‘au‘auna i latou a le Atua o lo‘o galulue mo lenei lava mea. 7O lea la, ‘ia avatu i tagata mea uma e pei ‘ona tatau ai: o le lafoga i ē ‘ua tatau i ai le lafoga; o le tiute i ē ‘ua tatau i ai le tiute; o le fa‘aaloalo i ē ‘ua tatau i ai le fa‘aaloalo; o le āva i ē ‘ua tatau i ai le āva.
O Galuega Tau‘ave a Tagata Ta‘ito‘atasi
8‘Aua lava ne‘i ‘iā te ‘outou se mea e tasi a se isi tagata; a ‘ia tau lava o le fealofani; auā o lē e alofa atu i le isi tagata, ‘ua fa‘ataunu‘uina e ia le tulafono. 9Auā o ‘upu nei: “ ‘Aua le mulilua, ‘Aua le fasioti tagata, ‘Aua le gaoi, ‘Aua le tu‘inanau;” ma ‘āfai fo‘i o toe se isi poloa‘iga, ‘ua aofia lava i le ‘upu lenei: “ ‘Ia e alofa atu i lē lua te tuā‘oi e pei o oe lava ‘iā te oe.” 10E lē agaleaga atu le alofa i lē la te tuā‘oi; o lenei, o le alofa o le fa‘a‘ato‘atoaina lea o le tulafono.#1 Kori 13.4; Mata 22.40
11I le ma lea, ‘ua ‘outou iloa lava le taimi ‘ua i ai nei, ‘ua o‘o i aso e ala ai ē na momoe. Auā ‘ua sili ‘ona lata mai nei lo tatou fa‘aolataga i lo aso muamua, ‘ina ‘ua tatou fa‘ato‘ā fa‘atuatua. 12‘Ua leva le po, ‘ua lata mai le ao; o lea ‘ia tatou fa‘ate‘a‘ese ai galuega o le pouliuli, a ‘ia tatou ‘o‘ofu i ‘ofutau o le malamalama. 13‘Ia tatou savavali e pei ‘ona tatau ai i le ao; ‘ua le poula ma ‘onā, ‘aua le faita‘aga ma matāitu, ‘aua le femisaa‘i ma matau‘a. 14A ‘ia ‘outou ‘o‘ofu i le Ali‘i o Iesu Keriso; ‘aua fo‘i le sauniuni mo le tino mea e tupu ai le tu‘inanau.
Currently Selected:
Roma 13: SCNT
Highlight
Copy
Compare
Share
Want to have your highlights saved across all your devices? Sign up or sign in
Samoan Contemporary New Testament © Bible Society of the South Pacific, 2009.
