2 Tesalonia 2
2
O le Tagata Amioleaga
1Uso e, matou te ‘ai‘oi atu ‘iā te ‘outou e uiga i le afio mai o lo tatou Ali‘i o Iesu Keriso, ‘atoa ma lo tatou fa‘apotopoto atu ‘iā te ia.#1 Tesa 4.13-17 2‘Aua ne‘i vave lūlūina o ‘outou loto, pe fa‘aatuatuvaleina i se agaga po o se ‘upu, po o se tusi e peiseaī e avatu mai ‘iā te i matou, e fa‘atupu ai se manatu ‘ua o‘o mai le aso o le Ali‘i. 3‘Aua ne‘i fa‘asesēina ‘outou e se isi i so‘o se mea; auā e lē o‘o mai lenā aso vaganā ‘ua muamua ‘ona o‘o mai le fouvalega tele. ‘Ona fa‘aalia ai lea o le tagata agasala, o le tagata o le malaia, 4o lē e tete‘e atu, ma ‘ua fa‘aeaina o ia e ia lava e sili i lo i latou uma lava ‘ua ta‘ua o atua, po o mea ‘ua ifo i ai tagata. O lea ‘ua nofo ai o ia i le malumalu o le Atua, ‘ua fa‘aalia ai e ia o ia lava o le Atua.#Tani 11.36; Eseki 28.2
5Tou te lē manatua ‘ea sa masani ‘ona ‘ou ta‘uina atu ‘iā te ‘outou lenei mea a o tatou fa‘atasi? 6O lenei fo‘i ‘ua ‘outou iloa le mea o lo‘o tāofi ai o ia i le taimi nei, se‘ia o‘o i le taimi ‘ua filifilia e fa‘aalia ai o ia. 7Auā o lo‘o galulue nei fa‘alilolilo tagata amioleaga, ‘ae lē taunu‘u lea mea, se‘ia vaganā ‘ua ‘ave‘eseina lē o lo‘o tāofia lea mea. 8‘Ona fa‘aalia mai ai lea o le tagata amioleaga, e fano o ia i le mānava mai o le fofoga o le Ali‘i o Iesu, ma fa‘aumatia fo‘i i le malamalama o lona afio mai. 9O le a sau le tagata amioleaga fa‘atasi ma le malosi o Satani, ma faia vāvega ‘ese‘ese ma fa‘ailoga sesē ma mea ofoofogia. 10O i latou ‘ua fa‘amalaiaina o le a fa‘asesēina i mea leaga, auā e le‘i talia lelei e i latou le ‘upu moni ia mafai ‘ona fa‘asaoina ai i latou. 11O le mea ‘ua fa‘apuapuagātia ai i latou e le Atua i le malosi o mea sesē, auā na latou talitonu o le mea sesē o le mea sa‘o lea.#2 Timo 4.4 12O lea, o i latou uma lava e lē talitonu i le ‘upu moni ‘ae fiafia i le agasala, o le a fa‘asalaina.
‘Ua Filifilia ‘Outou mo le Fa‘aolataga
13Uso e, matou te fa‘afetai atu pea lava pea i le Atua ‘ona o ‘outou o ē ‘ua alofaina e le Ali‘i, auā na filifilia ‘outou e le Atua mai le amataga mo le fa‘aolataga, i le fa‘apa‘iaina i le Agaga, ma lo ‘outou fa‘atuatua i le ‘upu moni. 14Na vala‘auina ‘outou e le Atua i lenei mea ‘ona o le Tala Lelei na matou avatu ‘iā te ‘outou, ‘ina ‘ia ‘outou maua le mamalu o lo tatou Ali‘i o Iesu Keriso. 15O le mea lea uso e, ‘ia ‘outou tumau; ‘ia ‘outou tāofi mau i le mea na a‘oa‘oina ai ‘outou i la matou ‘upu po o la matou tusi.
16O lo tatou Ali‘i o Iesu Keriso lava ia, ma le Atua lo tatou Tamā, o lē na alofa mai ‘iā te i tatou, na tu‘uina mai e ia ‘iā te i tatou le fa‘amafanafanaga ma le fa‘amoemoe lelei e fa‘avavau i le alofa tunoa. 17‘Ia fa‘amafanafanaina ma fa‘amalosia ai ‘outou i galuega lelei uma ma ‘upu lelei uma.
Currently Selected:
2 Tesalonia 2: SCNT
Highlight
Copy
Compare
Share
Want to have your highlights saved across all your devices? Sign up or sign in
Samoan Contemporary New Testament © Bible Society of the South Pacific, 2009.