Gadiyeeda Giijasoodiga 23

1Hean gang'ula Baulo fukka bea girgweageedean muuchchi ak gwayeeshsha niny, “Fugeaduupcheewi, aniini geabiideawi gurorooda miy aba madeeda Aseetta ea ghoaw ghamneawa.” 2Ghwalamda ashoohoochcheanda haw suguura Ananiya ak gwayeeshsha fukka miinaada aba murdeadaannyiin, alasa ghuutteaba siisi. 3Ghwalamda Baulo ak gwayeeshsha, “Gayghwalasnyi Aseetta ang'iing'eani uwosi ghamarda siyeasha ronghoodean! Iijea apteada ak girgweaksean aba naweeda deaweeda, nea ang'iing'i giyami deaweeda ak ginung' eabwaran?” 4Gwayeeshsha fukka miinaada aba hooweaniin, “Aba sarean ging'eaway ashoohoochcheanda haw bea Aseetta?” 5Ghwalamda Baulo ak gwayeeshsha, “Fuga eaduupcheewi, miidanal gideaba niny ashoohoochcheanda haw gil; aba gideaba geang'waar, ‘Adirgu ng'asheanda muy aba badayda siida ambal fugaagu.’”

6Hean nea gwajeeng'u Baulo gideaba fukka bea giegweageedean mwaatkwa Sadukkayajeega gil nea mwaatkwa ea Farisayajeega gil, hean goojuur aba madeeda girgweageeda nea gwayi, “Fugeaduupcheewi, aniini geawoschi Farisayajeanda, balleanda Farisayu; ak geandeawi mureeda aba gidaararji ea duunnooda miyeeda ak ghamneawa geergweaksean.” 7Ahiit rukunoodeaba ng'asheesu, hean gwardu jaliida aba heeda fuga Farisayu ea gea Sadukkayo ea ghabwaasha girgweageeda. 8Aba gideaba gwayi fuga Sadukkayo manda duunnooda, ghana malaykajeanda, ghana gurorooda; nea fuga Farisayajeega ghamwas gideaba suu gwanda sean. 9Hean ghoahaada giijuureanda; ak ghamiinaada ng'oorshoodiga mwaatka bea Farisayu ak ghoaniikgh nea gwayi, “Aseasa meadaahi gilimuy aba heedeaba siisi. Siisi ideeppa eaniibalool gurorooda ghana malaykajeanda abeeda gwanda naaha?”

10Geeyibwak ama heedu jaliida ea ghang'ut muuwda shirikkarajeanda haw nea gwayi, eannean Baulo gajeabwaashaada, ak gwayeeshsha shirikkarajeanda eaniyean oappitta jeedeaba fukka ak goong'ng'oonyu Baulo amahit ghoattealdi ghealooniga. 11Hean eaweeda bassa gwadaah Baulo nea ghamiinaada Ng'uttamiida aba murdeadaannyi ak gwayeeshsha, “Adibeali, aba gideaba nimuwwuunean aba Yerusaleemu, ak gaymuwwuuni aba Ruumi.”

Geamwaal eaweega Baulo

12Iimuchchu sakteayda, gaweay gwasin fuga Yahuudi makcheameeda ak ghwaak habeawooda gideaba, “Mwajeayaaga gil nea mwajealeaha gil ea eaghus ea sinuuschi Baulo.” 13Fuga gasa enuus Baulo ghwanaawa haradam. 14Hean geeweay heeda ashoohoodiga hees ea gweargwa ak geeyeeshsha, “Aseasa siyaaji habeawooda gideaba majeayaaga gil ea eaghus ea sinuuschi Baulo. 15Eaniyean agooga ea gweargwa gheeda girgweageeda, ochcheaksiina shirikkarajeanda haw gideaba eanni Baulo heedeang'wa ak goohindi geat giloogasayi anala ng'asheega muuchchi aba headaannyi ak geawoschi hidaat enuusa nea mii gwaneekkiit.”

16Hean ghwayiiy ng'asheesu balleanda huda geennyea Baulo, hean gawa heeda abiitta shirikkara ak gwarukusa Baulo ng'asheesu. 17Hean gaguursa Baulo shirikkarajaanjagi ak gwayeeshsha, “Eaniyea aada balleanji heeda shirikkarajeanda haw gwanda ng'asheanda gasa gwarukusa.” 18Ghwaat balleandida ea ghoahiitta heeda shirikkarajeanda haw ak gwayeeshsha, “Goojeakneani Bauloyda mida ghealooniga deanneey balleanji aba gideaba gwanda ng'asheanda jea gwarukuneey.” 19Hean ghoang'ng'waay shirikkarajeanda haw geattinda balleandida ak ghwaat hichpwa geaw ak ghoannyaash, “Gigasayi rukunean naaha?” 20Ak gwayeeshsha, “Heetta niirgweach fuga Yahuudi ak gwaheelleesa gideaba gajeepka eemusnyi aada Baulo gheeda sirgweachcha nea gaygwahinda geat fukka bea gheeda sirgweachcheen giligasa ghwanal ng'asheega muuchchi aba badaydaannyi. 21Asi adumwasi aba gideaba ghamneawa gwanda fuga abiina haradam jea gwanuus, eaniyaak habeawooda gideaba maygweagischi nea mayghwali gil ea eaghus ea sinuus Baulo; ghamneawa saawa ghoammughu gidajea nyaasha ang'iing'i.” 22Ghwalamda shirikkarajeanda haw ak gwayeeshsha, “Eaniyean adaghwayiiy sih gideaba nihidu rukunean ng'asheanji, asi ng'eada una.”

Baulo geayaat heeda sugoochcheanda suguura Feliksi

23Hean gaguursa shirikkaraji iyyeenya ak gwayeeshsha, “Iibea eaweeda samwagu ghoang'aapchi shirikkaraji bughalaji iyeenya sea shirikkaraji laadam ea damwanamughuush mideawa farasajeega ea shirikkaraji bughalaji iyyeeya ng'uchcheatta ng'utkeakka ak gooweayi ng'eanyiida Gaysariya. 24Ak gigasayi faraaseeda jea gwading'da Baulo, ak giyeadu nea gaba seayu ea ahiinni heeda Feliiseeda was sugoochcheanda haw.” 25Ak ghang'waardunu barawajeanda:

26“Aniini Gilawdiyooyda Lisiya gil, ak geang'oorneey barawajeanji ang'iing'i Sugoochcheanda Mureeda Feliisi. Seayu. 27Siisi ghoang'ng'waay fuga Yahuudi, ak gwaramagu gwanuus, iiduw geawi ronnyeeda nea geadeani shirikkara ak ghaweachchi, ak geegu iitta gideaba siisi gaba ng'eanyiida Ruumi. 28Hean geagasayi danal gidinyeandeaba siisi, ak ghayaachchi madeeda girgweageeda. 29Hean geajeeng'u gideaba geergweaksiina sheang'nyeeda ng'asheega deaweedeeda gheannyaawa, ak ea mwaadaahi ramaseanda sin siisi miisa nuusta ghana gawa ghealooniga. 30Iiduw nea geeyeanean iitta gideaba geesin badiida gichchea gwanuusta, hean geabay deadu headaang'u, gwargu fuga argweaksa gidamideayeesa siisi.”

31Hean gageanu shirikkara aba gitta ghayi sinnaldaan, ak ghwaat Baulo eawa ea ghoahiitta heeda Antipatri. 32Iimuchchu gabiikta shirikkareetta heeda abiitta, nea ghwanung'wa heeda shirikkareeda beawa farasajeega nea ghwaat Baulo. 33Geeweay, ama sihitta ng'eanyiida Gaysariya ak ghoadaw sugoochcheanda barawajeandida, hean geayiin Baulo madeadaannyi. 34Ahiit gisoomandeaba barawajeandida, hean ghoannyaashta gideaba gwaleabu ana daroar. Iiduw ghwanal gideaba gwaleabu ng'eanyiida Gilikkiya. 35Ghwalamda ak gwayeeshsha, “Gaydealeeysiit girgweageadaang'u iihidu fuga ahaaktaneey. Ak gwayeeshsha, ayaada jeeda gheeh Heroode ak goofurji.”

Currently Selected:

Gadiyeeda Giijasoodiga 23: DTGANT09

Highlight

Copy