NÁN RÓMA VɄ 13
13
I kid ı̵́ hág aga vu̵ tɔ́ggú̵
1Nán 'waapád u̵u̵ kid ı̵́ hág aga vu̵ tɔ́ggú̵, moo gbaŋ waalı̵́ 'waapád yaa Tayɨɨ woolı̵́. Nán ku̵u̵ waa gbaŋ máa, vu̵ nuŋ néélȩ́ woo Tayɨɨ woolı̵́. 2Nán a pí moo ı̵́ hág aga voo tée, kɔ́ moo kan dooká Tayɨɨ woo nɔ á̧ḿ. Nán ku̵u̵ kɔ́ ı̵́ yo̧go̧ máa, aga vu̵u̵ soo hȩn si̧'i̧ní gbɔ yúú voolı̵́. 3Nán ku̵u̵ kɔ́ hȩn du̵u̵ máa, vu̵ ndɔgɔn voo ı̵́ hág aga vu̵ né, a̧máa nán ku̵u̵ kɔ́ hȩn ɓı̵́d máa, vu̵u̵ ndɔg. Mɔ́ hí̧í̧ bi ndɔgɔn ı̵́ hág aga vu̵ náa? Tée a̧m kɔ́ hȩn du̵u̵ɨ, tée vú̵ń na'am, 4moo ı̵́ hág aga vu̵ kɔ́d Tayɨɨ wu̵ ba'ad, moo u̵u̵ kɔ́m hȩn du̵u̵ɨ. A̧máa tow a̧m kɔ́ hȩn ɓı̵́d tée, a̧m kɔ́ dú̵ú̵ la ú̵, moo Tayɨɨ pú̵n vu̵ néélȩ́ hȩn si̧'i̧ní yȩ té' né. Vu̵ kɔ́ ba'ad Tayɨɨ woo moo bi si̧'i̧d nán ɓı̵́d vu̵ wu̵lı̵́. 5Moo woo nɔ, i kid ı̵́ hág aga vu̵ tɔ́ggú̵, moo hȩn si̧'i̧níi dágá pɛ́lı̵́, a̧máa moo yɛ́g tóó ka dɨ zó̧ó̧ móólȩ́ yȩ nɔ á̧ḿ.
6Moo woo nɔ ma, ví sú̵ú̵ lámba á̧ḿ, moo nán ku̵u̵ dii ba'ad yȩ, vu̵ nán ba'ad Tayɨɨ woo vu̵ yu̵ á̧ḿ. 7I pú̵ hȩn ka maa vín pú̵ vu̵ máa 'waapád. Nán ku̵u̵ ɓɛ lámba máa, i sú̵ú̵ vu̵ lámba ú̵. Nán ı̵́ ku̵u̵ ɓɛ sɨɨde hȩn hág máa, i pú̵ vu̵ sɨɨde voo ú̵. I ndɔg nán ı̵́ ka maa ndɔggı̵́ máa ó̧. I na' nán ı̵́ ka maa na"ȩ́ máa á̧ḿ.
I hí̧í̧ da ví vu̵ ú̵
8Nán tóó u̵u̵ duu ví ɓoo sá, moo ví dɨ kan ɓoo zó̧ó̧ nán i kɔ́d da ví vu̵ máa á̧ḿ. Nán ka hí̧í̧ daga tée, kɔ́ hȩn dooká Tayɨɨ woo ka o̧ máa si̧' sı̵́ gbuggú. 9Dooká Tayɨɨ woo o̧: “A̧m kɔ́ ɓáa sá; a̧m nɔɔ nɔm sá; a̧m kɔ́ líw sá; a̧m ha' zó̧ó̧ hȩn dam woolı̵́ sá á̧ḿ.” Dooká tóó u̵u̵ dɨlı̵́ si̧', vu̵ dɨ dooká ı̵́ Tayɨɨ woo ka o̧: “A̧m hí̧í̧ dam vu̵ kɔ́ ı̵́ káḿ hí̧í̧ fó̧ó̧ móó wɔgɔ” yȩlȩ́. 10Nán ka hí̧í̧ daga tée, kɔ́nnɔ hȩn ɓı̵́ddɨ né. Moo woo nɔ ma, nán ka hí̧í̧ daga tée, kɔ́ hȩn dooká Tayɨɨ woo ka o̧ máa si̧' sı̵́ gbuggú.
I mbaa laa yaalı̵́ Krístu woo nɔ
11I kɔ́ hȩn yȩ vu̵ la ú̵, moo ví gaa bá' aa níḿ ví nəmmé máa wu̵ yɛ nɔ. Bá' ı̵́ kaa dəŋ 'yɛ́ ví zó̧ó̧ Yesu woolı̵́ wu̵lı̵́ yȩ, zá̧ga̧ nán sənné ká ɗii ú. A̧máa 'ya̧'a̧ yɛ duu ɗiin sı̵́ né. 12Vid sa̧' ɗii sú̵'ú̵. Sey dɨ sı̵́ ya̧a̧lȩ́ȩ, ya túlí dɨ bə́'. Ba gbɔ ví ba'ad vid vu̵, ba ɓɛ ví hȩn sɨɨ ba 'yȩm ví kan vu̵ ya túlílí. 13Ba mbaa ví du̵u̵ na'a kɔ́ ı̵́ ku̵u̵ mbaa ya túlílí máa wɔgɔ. Ba gág ví kan hȩn vó'om lálı̵́ɨ, kan doo kíílí, kan ya tálı̵́ moo hȩn sí̧i̧d vu̵ kɔ́lı̵́, kan moo kɔ́nné, kan sɨg mɔ́nné vu̵ á̧ḿ. 14A̧máa i dɔ́ Yesu Krístu ı̵́ 'yɛ́lı̵́ baa ví kɔ́ ı̵́ sa̧a̧m wɔgɔ. I mbaa kɔ́ ı̵́ ka mbaa wɔgɔ á̧ḿ; i gbɔ hȩn dáń fó̧ó̧ víílí yȩ a dɔd ví hȩn hí̧í̧lí̧ hágá yɛ vu̵lı̵́ sá.
Currently Selected:
NÁN RÓMA VɄ 13: DIINT
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Dii © Bible Society of Cameroon, 2001.
