YouVersion Logo
Search Icon

Debtere ba'ad waa ba'ad voo nɔ 23

23
1Pól tə́g ı̵́ nii moo sə̧"ȩ́ vu̵, o̧d vu̵: “Nán míí vu̵, há̧á̧ 'ya̧'a̧ yɛ, mí mbaa míí pá̧á̧ tíŋ́ Tayɨɨ woolı̵́ yɔ.”
2Ma ı̵́ nii hȩn ha"ı̵́ Ananía o̧d nán ku̵u̵ mbaa dáŋ́ Pól woolı̵́ máa ba u̵u̵ dȩŋŋɔ ya̧gá̧.
3Ka o̧ ná' máa, Pól o̧ddu̵: “Gbɔmvəg hee#23:3 Gbɔmvəg hee Pól haa ı̵́ nii hȩn ha"ı̵́ ı̵́ yo̧go̧; i ho̧ Matío 23:27 á̧ḿ. yȩ mɔ́ yo̧, ı̵́ móó Tayɨɨ wú̵ń dȩgȩm á̧ḿ! Mɔ́ mbaa yɛlı̵́ moo bi sə̧' moo kɔ́ ı̵́ debtere Tayɨɨ woo ka o̧ wɔgɔ, ma mɔ́ kɔ́n hȩn woo né, a̧máa mɔ́ o̧d vu̵ u̵u̵ dȩgȩnɔ́.”
4Ma nán ku̵u̵ mbaa dáŋ́ Pól woolı̵́ pee, vu̵ o̧ddu̵: “Mɔ́ haa ı̵́ nii hȩn ha"ı̵́ Tayɨɨ woo naa?”
5Pól ka ki máa, o̧d vu̵: “Nán míí vu̵, mí gaan ba ı̵́ nii hȩn ha"ı̵́ɨ né, moo debtere o̧: ‘A̧m o̧d gbanaa zig móó woo moo ɓı̵́d sá.’ ”
6Pól gaa woo, sú̵ggı̵́ yȩ, ka' tóó ba nán sadukée voo, ka' ı̵́ tóó ba nán farísa voo nɔ. Ma moo dɔg moo yúba tíŋ́ voolı̵́, o̧: “Nán míí vu̵, mí nán farísaɨ. Mí waa nán farísa voo nɔ á̧ḿ. Moo káń o̧ mí 'yɛ́ zó̧ó̧ míí yúú nímní nɔm voolı̵́ ú̵ máa, vu̵ fá̧n mí moo wu̵ yu̵.”
7Ka o̧ moo yȩ 'waa máa, nán farísa vu̵ bé' moo fá̧né kan nán sadukée vu̵, ma sú̵ggı̵́ pee hı̵́'ı̵́n zu̵u̵ sa̧a̧mé, 8moo nán sadukée vu̵ o̧ voo nɔm ban ním ní, maleeka ba vu̵n pɛ́lı̵́, yigid tóó ba pɛ́lı̵́ á̧ḿ. A̧máa nán farísa vu̵ o̧ voo hȩn yȩ vu̵n dɨlı̵́ 'waapád. 9Vu̵ bé' kɔɔg vu̵ to̧'o̧né mɛ́ń, ma nán moo Tayɨɨ tú"í tóó vu̵ dɨ voo ka' nán farísa voolı̵́, vu̵ lúú dɔg, vu̵ sée hȩn, vu̵ o̧: “Vɔ́ ho̧n vóó hȩn ɓı̵́d tóó nán yȩ woolı̵́ né. Tóó tée yigid tóó, tóó tée maleeka tóó, a wu̵ o̧ddu̵ dɨ moo zulá?”
10Moo fá̧né ka duu ɓu̵u̵ ɓu̵u̵lı̵́ mɛ́ń máa, kolonɛ́l pee ndɔg ba vú̵ń hȩȩ Póllú̵, ma o̧d só̧ó̧ze woo vu̵ ba u̵u̵ ya ɓɛ Pól luu sa̧a̧m nán yȩ voolı̵́, u̵u̵ pa̧ŋŋɔ vȩ' la lig go̧ŋŋı̵́.
11Vid woo máa, ı̵́ 'yɛ́lı̵́ vúd maa Pól, o̧ddu̵: “A̧m ma' zó̧ó̧ la ú̵. Mɔ́ du̵n ya̧g 'waa sı̵́ Yerúsalemmé yɛlı̵́ ú̵. Séý mɔ́ń duu la du̵ ya̧g kaa gbaŋ Rómalȩ́ á̧ḿ.”
Nán vu̵ duu ta ya̧g bi nɔɔ Póllú̵
12Ya̧g ka̧'a̧m woo máa, nán Yúúda vu̵ su̵g ya̧g, vu̵ sa̧a̧ hȩn kan ya̧g talı̵́ bi lán hȩn né, bi zɔn mam né, séý bi nɔɔ Pól pȩ́ń. 13Nán ku̵u̵ ta ya̧g yȩ vu̵ mba fó̧ó̧ vo' ndaddú̵ ú̵. 14Vu̵ la maa ı̵́ nii hȩn ha"ı̵́ vu̵ kan ı̵́ nii Yúúda vu̵, vu̵ o̧d vu̵: “Vɔ́ ta ya̧g vóó dágá moo yɛlı̵́, vɔ́ sa̧a̧ hȩn, vɔ́ń lán hȩn né, vɔ́ń zɔn mam né á̧ḿ, séý vɔ́ń nɔɔ Pól pȩ́ń. 15Ɨ́ víí máa, 'ya̧'a̧ yɛ i mbɔ́g moo kan ı̵́ nii moo sə̧"ȩ́ vu̵, i la o̧d kolonɛ́l yȩ a pa̧n bi ya Pól yɛlı̵́, moo bi soo moo woo ho̧ du̵u̵lı̵́ na'a pȩ́ń. Tée ı̵́ vóó máa, vɔ́ń há̧á̧ nɔɔwo̧ daa vóó. Wú̵ń ya̧n ya yɛlı̵́ né á̧ḿ.”
16Ku̵u̵ dɨ moo yȩ moolȩ́ máa, Pól pa̧a̧ wə̧ə̧ ki ma, daa laa lig go̧ŋŋı̵́, dɔ́ la o̧d Pól. 17Ma Pól bee ı̵́ nii só̧ó̧ze tóó, o̧ddu̵: “A̧m pa̧ŋ náásaa yɛ laan kolonɛ́l woolı̵́, moo hí̧í̧ bi o̧d kolonɛ́l moo tóó nɔ.”
18Ɨ́ nii só̧ó̧ze pee ɓɛ waa pee pa̧ŋ la kolonɛ́l woolı̵́, o̧ddu̵: “Púúsina Pól been, o̧n ba a̧n pa̧ŋ ya náásaa yɛ víílí, ba dɨ kan moo tóó bi o̧d ví ú.”
19Kolonɛ́l pee ka ya náásaa pee nagá, daa dɔ́nna ya tóólı̵́, vu̵ idú, vigi: “Mɔ́ dɨ kan moo tóó bi o̧nnáa?”
20Náásaa pee hí̧i̧du̵: “Nán Yúúda vu̵ mbɔ́g moo bi ya vi ví yɔ́gɔ́ i pa̧n bi la Pól ı̵́ nii moo sə̧"ȩ́ voolı̵́ tíŋ́, bi la soo moo woo ho̧ du̵u̵ na'a pȩ́ń. 21A̧máa i fȩȩ moo voo sá, moo nán vu̵ mba fó̧ó̧ vo' ndaddú̵ ú̵, vú̵ń dɨ yú̵ggı̵́ hi̧naalȩ́ moo bi ma"o̧ ó̧. Vu̵ sa̧a̧ hȩn kan ya̧g talı̵́, bi lán hȩn né, bi zɔn mam né, séý bi nɔɔ Pól pȩ́ń. Vu̵ mbɔ́g fó̧ó̧ 'waa sú̵'ú̵, vu̵ laa moo i o̧d vu̵ má nɔ.”
22Kolonɛ́l ka ki sú̵'ú̵ máa, gagad náásaa pee, o̧ddu̵: “Moo káḿ o̧n yɛ, a̧m duu o̧d nán tóó sá. A̧m laa la sı̵́ mɔ́ ó̧.”
Vu̵ pa̧ŋ Pól laan guvɛrnə́ər Felíg woolı̵́
23Pig woolı̵́ máa, kolonɛ́l bee ı̵́ nii só̧ó̧ze tóó vu̵ idú, o̧d vu̵: “I yee só̧ó̧ze vu̵ tȩmɛre idú, gbaŋ ı̵́ go'oy u̵u̵ vo' gúndɛm, ı̵́ táa u̵u̵ tȩmɛre idú. Ví mbaa bə́', moo víń dɨ lúúlí zamndi kɛ́gdágá viddí, víń zu̵u̵ kaa Sezaréelı̵́. 24I ta go'oy pú̵ Pól, a ɗáá á̧ḿ. A ya̧ guvɛrnə́ər Felíg woolı̵́ kan fó̧ó̧ ká̧'a̧dɨ.”
25Ma kolonɛ́l duu bíńda ɗerwəl ba' pú̵ guvɛrnə́ər Felíg, o̧: 26“Mí Kolonɛ́l Kolóod Lizía wu̵, mí vá' ví ba' naa, guvɛrnə́ər Felíg. 27Nán yɛ, nán Yúúda vu̵ ma"o̧, bi nɔɔwo̧ ó̧, ma sey káń ki ba waa hág Rómaɨ máa, mí pa̧ŋ só̧ó̧ze míí vu̵, ma vɔ́ la vbiddu̵ nag voolı̵́. 28Káń hí̧í̧ bi gaa moo nán Yúúda ku̵u̵ doowu̵ wu̵lı̵́ yȩ nɔ máa, mí pa̧ŋŋɔ la tíŋ́ ı̵́ nii moo sə̧"ȩ́ voolı̵́. 29Ma káń ki moo woo máa, mí ho̧ gaa sı̵́ wu̵lı̵́ ba vu̵n doowu̵ moo moo fanné yúú dooká dáń voo vu̵lı̵́, a̧máa kɔ́n hȩn tóó ba maan nɔɔné né, tóó tée ban dɔddu̵ lig púúsinalȩ́ máa pɛ́lı̵́ á̧ḿ. 30A̧máa mí ki nán Yúúda vu̵ su̵g ya̧g yúú woolı̵́ bi nɔɔwo̧ ó̧, ma mí ba"u̵ la víílí vaŋná yɔ. Mí o̧d ı̵́ dom woo pee vu̵ u̵u̵ la doowu̵ víílí pi nu á̧ḿ.”
31Só̧ó̧ze vu̵ ɓɛ Pól viddí wu̵lı̵́, vu̵ daa zu̵u̵ kaa Aŋtípatríilí kɔ́ ı̵́ kolonɛ́l ba o̧d vu̵ pee wɔgɔ.
32Ya̧g ka̧'a̧m woo, só̧ó̧ze ı̵́ ku̵u̵ 'yȩm kan doo máa, vu̵ vȩ́' ya voo lig go̧ŋŋı̵́. Gbaŋ ı̵́ go'oy vu̵ daa pa̧ŋ Pól laan voo. 33Vu̵ ya̧ la kaa Sezaréelı̵́ ná', só̧ó̧ze vu̵ ɓɛ ɗerwəl pú̵ guvɛrnə́ər, vu̵ ɓɛ Pól pú̵gu̵ nagá á̧ḿ. 34Guvɛrnə́ər záŋ́ga ɗerwəl 'waa, ma vi Pól: “Mɔ́ waa hág ȩná?”
Ka ki ba waa hág Silisíi máa, o̧ddu̵: 35“Nán dom móó u̵u̵ yaa pȩ́ń, tée míń ki moo móó.”
Ma o̧d só̧ó̧ze vu̵ u̵u̵ la tu̵ Pól kíi gbo̧o̧ gbanaa Heeród ka yo̧o̧ gbɔ máalȩ́.

Highlight

Share

Copy

None

Want to have your highlights saved across all your devices? Sign up or sign in