2 NÁN TESALONÍI VɄ 2
2
Ɨ́ disa̧nne
1Dan kirtȩ́n vu̵, moo fíiní ı̵́ 'yɛ́lı̵́ baa ví Yesu Krístu woo, aa sú̵g ví kannɔ máa, 2i gbɔ nán tóó a hɨ'ɨ moo taalı̵́ víí sá; zó̧ó̧ a tó̧' ví sá á̧ḿ. Kóó anábi tóó a wu̵ o̧d ví, kóó nán moo tú"í tóó a wu̵ o̧, kóó u̵u̵ o̧d ví ba vɔ́nnɔ bíńda dɨ ɗerwəllı̵́, zá̧ga̧ ı̵́ 'yɛ́lı̵́ woo ba ya̧ sú̵'ú̵ tée, i ki sá. 3I gbɔ nán tóó a zo' ba̧a̧ ví sá sá̧ḿ, moo zá̧ga̧ nán u̵u̵ kéé moo Tayɨɨ woo gbɔ máa, wú̵ńnɔ dəŋ ya̧ tíŋ́, kan “ı̵́ disa̧n” á̧ḿ, wú̵ń ya̧ tíŋ́. Tayɨɨ wú̵ń sə̧' moo yúú ı̵́ disa̧n yȩ woolı̵́, moo bi tuddu̵ ú̵ á̧ḿ. 4Ɨ́ disa̧n yȩ wú̵ń há' hȩn nán ku̵u̵ na' vu̵ máa 'waapád, kan tayɨɨ nán ku̵u̵ duu vu̵ yȩ á̧ḿ. Wú̵ń lúú moo kan hȩn yȩ vu̵ 'waapád, há̧á̧ wú̵ń dɔ́ la lig hȩn ha"ı̵́lı̵́, wú̵ń ká̧ḿ zu̵u̵ wu̵lı̵́, wú̵ń o̧ ba binnɔ Tayɨɨ.
5Ká mí mbaa víílí máa, mí o̧n ví lá moo yȩ náa? 6'Ya̧'a̧ yɛ máa ví gaa hȩn tóó ba há' hȩn yȩ vu̵ kɔ́lı̵́ sú̵'ú̵, moo zá̧ga̧ “ı̵́ disa̧n” woo ya̧n ná né. 7A̧máa ı̵́ disa̧n yȩ dəŋ sı̵́ moo Tayɨɨ woo lı̵́nné yú̵ggı̵́ná ó̧. Hȩn ı̵́ ka há"u̵ máa dɨlı̵́; hȩn woo wú̵ń lúú laa pȩ́ń. 8Sey woo tée “ı̵́ disa̧n” yȩ wú̵ń gbɔ vúd. Tée ı̵́ 'yɛ́lı̵́ baa ví Yesu wú̵ń yaa kan na"ȩ́ woo, wú̵ń tuddu̵ kan wə̧m woo. 9“Ɨ́ disa̧n” yȩ wú̵ń yaa kan néélȩ́ Seeɗán woo, wú̵ń kɔ́ hȩn sa̧ga̧ vu̵, kan hȩn dú̵ú̵ zálı̵́ vu̵ kə́dkə́d vbádná. 10Wú̵ń ɓɛ hȩn ɓı̵́d kə́dkə́d, wú̵ń zo' nán ı̵́ u̵u̵ ti máa vu̵. Tée vú̵ń ti, moo ku̵u̵ sɛ́n moo yȩ́ń a sən vu̵ né, ku̵u̵ fȩȩn moo woo né á̧ḿ má nɔ. 11Moo woo nɔ Tayɨɨ ba'ad vu̵ hí̧í̧lí̧ moo vbád kilí, moo u̵u̵ 'yɛ́ zó̧ó̧ voo vbád yȩlȩ́, 12moo bi si̧'i̧d nán ı̵́ ku̵u̵ sɛ́n moo yȩ́ń né, ku̵u̵ dȩ' zó̧ó̧ yúú hȩn ɓı̵́d kɔ́lı̵́lı̵́ máa vu̵ yu̵.
Tayɨɨ ká yee ví, bi səd ví ú
13Séý vɔ́ń baa dȩn Tayɨɨ nag gən yúú víílí ní, dan kirtȩ́n Tayɨɨ ka hí̧í̧ ví yȩ víw. Tayɨɨ yee ví, mbɔ́g ví nán woo vu̵ kan yigid woo, pú̵ ví zó̧ó̧ 'yɛ́lı̵́ yúú moo yȩ́ńné, moo i mbaad bi kɔ́ ı̵́ hȩn 'maŋ ka dəŋ sə́d wɔgɔ. 14Tayɨɨ bee ví kan moo to̧o̧ 'maŋ kóó pad ví yȩ, moo i nuŋ na"ȩ́ ka' ı̵́ víí ı̵́ 'yɛ́lı̵́ baa ví Yesu Krístu woolı̵́ á̧ḿ. 15Moo woo nɔ, dan kirtȩ́n vu̵, i nda doo, i 'yɛ́ zó̧ó̧ víí yúú moo kóó tú'ud ví yɛlı̵́, kóó ı̵́ kóó o̧d ví kan ya̧g, kan ı̵́ kóó bíńda ví ɗerwəllı̵́ vu̵ á̧ḿ.
16Ɨ́ 'yɛ́lı̵́ baa ví Yesu Krístu, kan Ba' baa ví Tayɨɨ ka hí̧í̧ ba ví na'a, ka kɔ́d ba ví zó̧ó̧ nán, ka zigid ba ví zó̧ó̧, ka mbɔ́gɔd ba ví ya mbaalı̵́ du̵u̵ woolı̵́ káákáá yȩ, 17u̵u̵ zigid ví zó̧ó̧, u̵u̵ pú̵ ví néélȩ́ i kɔ́ hȩn du̵u̵, kan moo to̧o̧ moolȩ́ á̧ḿ.
Nouveau Testament en Dii © Bible Society of Cameroon, 2001.