Romanos 3

1Qaq ÿoqo'oyi ¿huá'ague ca 'eetec ca lataxac da ñapagaqlec ca qadÿa da qomi' judío lashi'? qataq ¿négue't cam qaÿachigoxotaigui da qaÿauo'o ca n'anaxat ca shiÿaxaua? 2Qomyi qalota, qataq qalota na lataxaguesat da namayipi napacalec ca lÿa. Cha'ayi da hua'auchiguiñi 'eeta': Ñi Dios ipataxalec co'ollaxa na judiopi da l'aqtac. 3Qalaxayi ¿huá'ague ca 'eetec namayipi da huo'otaq sa ipaguelec de'eda n'aqtac? Qaq ¿peta'a ñi Dios nachi ÿaxaañi da sa ishit da ipaguelec da l'aqtac? 4¡'A'i, sa ishit! Chaqdata da ñi Dios ÿataqta 'eesa da ipacchiguilo naua l'aqtaqa, qaq nai'ctaxa da 'enauac na shiÿaxauapi shipecaicpi. Cha'ayi nachi 'enapec naua ñiyigui'shi l'aqtaqa, 'eeta':

Da 'autaqa, nachi qaila'a da ÿataqta 'eesa da qonapec,

qataq 'anachatteec qome da qaica ca 'adasouaxashit,

qom 'am qanmit.

5Qalaxayi nam qayi'itaxaloxosat da chigoqchigui da i'axat da ñi Dios i'ot ca ÿaÿamaqchiguiñi, qaq ¿huá'ague ca shinaqtec? ¿Peta'a ñi Dios ishit da sa ÿaÿamaxañi ca i'ot, da huo'otaq qomi' iuaxa'n? (De'eda i'aqtac 'eeta'am da l'aqtac na chochi shiÿaxauapi.) 6¡'Eesa mque' da sa nachi 'eetec de'eda! Cha'ayi da huo'otaq ñi Dios sa ishit da ÿaÿamaqchiguiñi ca i'ot, nachi ¿huá'aguectoxo' ca 'eetec da ishit da nmit ca lasouaxashit na shiÿaxauapi?

7Qalaxayi de'eda ÿatenataxanaxac da huo'otaq ichoxot da nquicteec da lli'oxoyic de'eda 'eesa lataxac mayi chigoqo'ot ñi Dios, qanachi ¿tá'ainco' qone' da aÿim qanmit da shiita'am qanqoÿin ca huo'o ca lasouaxashit? 8Qaq da nachi 'eetec de'eda, qaq ¿tá'ainco' qone' yi sa qai'ot cam sa ÿaÿamaxañi, yaqto' ishit da anac cam ÿaÿamaqchiguiñi? Qaq 'eda dam huo'o na 'eetega da sapaxaguenataxanaqtapeguec, cha'ayi qauem da lhuennataxa. Qaq ÿoqo'oyi ne'ena shiÿaxauapi no'on qome da qaÿauo'o ca nhuaxanaguec.

'Enauaque qomi' huo'o da qadasouaxashit

9Qaq ÿoqo'oyi ¿chaq huá'ague ca 'eetec? ¿Peta'a da qomi' judío lashi' nachi ishit da ñapagaqlec namayipi? ¡'A'i, sa ishit da nachi 'eetec de'eda! Cha'ayi mashi ime da sa'axatta da qomi' judío lashi' qataq nam saq judío l'ecpi da 'enauac souaqto'ot da lamaxasoxonaxac da ñi'itaxaloxo. 10Cha'ayi naua ñiyigui'shi l'aqtaqa ñi Dios 'eeta':

Qaica da huo'o ca chochi 'oonolec shiÿaxaua da no'on ca i'ot;

11qataq sa ishit da huo'o ca chochi 'oonolec da nshitaique da huo'o ca ÿaÿaten,

qataq sa ishit da huo'o ca nmitaique ñi Dios.

12'Enauac namayipi isomtac, qataq 'enauac daqat.

Sa ishit da huo'o ca i'ot ca ÿaÿamaqchiguiñi,

ÿataqta imauec da qaica.

13Naua ala'pi qalaq 'eeta'am aca huachiqui mayi qaÿauattangui;

naua l'aqtaqa qalaq datenataxa'n,

qataq 'eeta'am na n'adaxanaq lshinataxanaxa na huetaiguilo.

14Da detaqa, qalaq ndoteec da ÿayiita'a da qaÿauo'o ca nhuaxanaguec ca lÿa, qataq qaica ca lamai'c naua l'aqtaqa.

15Naua lchil qalaq sa ilaua'aguelo da dalaataxan,

16da lataxac qalaq nlaxajñi ca lÿa, qataq ÿachoxoden,

17qataq sa ishit da ÿauatton ca llic da nlagaxayic.

18Qataq sa ishit da chochi cada'ac da taÿapigui lauel da ñi'iÿa ñi Dios.

19Cha'ayi qomi' saÿajnaq da 'enauac nam 'enapec nam nqataxacpi mayi chigoqo'ot so Moisés, ÿalamaqchigui da 'enapega nam hueto'ot ne'ena nqataxacpi, da yaqto' sa ishit da huo'o ca 'eetega qaica ca ÿasouaxat, qataq yaqto' 'enauac na shiÿaxauapi ishit da huo'ot da 'eetec qom ñi Dios nmit 'enauac na shiÿaxauapi. 20Cha'ayi qaica ca ishit da ÿaÿamaxadeeta ñi Dios souaxat da i'ottac nam damaxasoxoolec na nqataxacpi, cha'ayi ne'ena nqataxacpi, namayipi chaqdata da i'ot da qomi' ÿaÿajnaxanaxanque da qomi' huo'o cam qadasouaxashit.

Da nca'alaxa chigoqchigui da npi'iÿaxac

21Qaq ÿoqo'oyi nagui ñi Dios ishit da qomi' ÿaÿajnaxanaxanque da 'eetec da lataxac da ishit da qomi' ÿaÿamaxadeete' ñimayi, qaq sa ishit da chigoqchigui naq'en na nqataxacpi. Qaq damayi ishit da selaqa'a da qomi' setaxaÿaxanaqtac nam qoÿittañi nqataxacpi qataq naua l'aqtaqa som n'aqtaxanaxanecpi. 22De'eda 'eetec da ñi Dios ishit da qomi' ÿaÿamaxadeete', damayi chigoqchigui da qaipi'iÿa'a so Jesucristo, qaq ÿanem 'enauac nam da'amqajnataxan. Qaq sa ishit da lca'atagui na shiÿaxauapi, 23cha'ayi 'enauac nam shiÿaxauapi huo'o da ÿasouaxat, qataq ÿataqta qaÿoqta ñim Dios mayi ishit da deca'alaqtaxan. 24Qalaxayi ñi Dios dam lauotaxanaqtaic i'oteguet namayipi da ishit da ÿaÿamaxadeeta. Qaq sa ishit da huo'o aca lashiue naq'en, cha'ayi ñimayi ÿachigoxotchigui naq'en so Jesucristo da nca'alaxateec namayipi. 25Ñi Dios ÿan so Cristo, da yaqto' da l-leuaxa chigoqchigui naq'en da ishit da ÿapalaxat na nasouaxashitpi. Qaq damayi chigoqchigui da qaipi'iÿa'a somayi. Qaq de'eda 'eetec ñimayi, nshitaique da qaÿaÿaten da ishit da i'ot ca ÿaÿamaqchiguiñi, cha'ayi da lhualaxavic ñimayi ÿataqta sa ishit da ilogui som hua'au nasouaxashitpi. 26Qaq de'eda 'eetec ñimayi, nshitaique da ÿachaxan da ishit da i'ot ca ÿaÿamaqchiguiñi. Qaq ñaq queta nagui da ñimayi ishit da i'ot ca ÿaÿamaqchiguiñi, souaxat da ishit da ÿaÿamaxadeeta cam i'amaqten so Jesús.

27Qaq ÿoqo'oyi ¿huá'ague ca taigue que'eca n'amqajnaxac na shiÿaxauapi? Qomyi camayi qaipa'axanauec. Qaq ¿chaq tá'ainco' yi qaipa'axanauec? Cha'ayi da qaipacchigui na 'enapecpi na nqataxacpi, nachi i'ot da 'amqajnaxac, qaq dam npi'iÿaxac qalaxayi sa ishit. 28Qaq ÿoqo'oyi qomi' selaqa'a da ñi Dios ishit da ÿaÿamaxadeeta cam shiÿaxaua mayi huo'o da lpi'iÿaxac, qaq sa ishit da ilotapigui camayi da huo'otaq i'ottac cam 'enapec na nqataxacpi, huo'otaq da sa ishit da i'ot.

29Qaq ¿peta'a ishit da nachaqnata nam judiopi da lta'a ñi Dios? Qaq ¿sa ishit peta'a da nataq'en lta'a na saq judiopi? Aja', namayipi nataq'en lta'a ñimayi. 30Cha'ayi sa ishit da huo'o ca lÿa, ñi Dios ÿataqta 'oonolec. Ñim Dios mayi ishit da ÿaÿamaxadeeta cam huo'o da lpi'iÿaxac, sa ishit da ilogui da huo'otaq qaÿauo'o ca n'anaxat, huo'otaq da sa ishit da qaÿauo'o. 31Qaq ¿peta'a chigoqchigui da qadpi'iÿaxac da qaica ca naigui ñaq'enaq na nqataxacpi? ¡'A'i, sa ishit! Chaqdata da ÿataqta 'itchiguiñi ñaq'enaq dam 'enec na nqataxacpi.

Currently Selected:

Romanos 3: TBSNT

Highlight

Copy

Compare