Romanos 16
16
Da lquinaxanaxac so Pablo
1Huo'o da ÿaqataxac aca qadqaÿa Febe mayi itauaatac nam 'amqajnataxanaicpi mayi netaña yi Cencrea, 2da ÿataqta qauacoñiiguet, cha'ayi acamayi lalamaqte so qadataxala'. 'Eeta'am qanqashiñi da 'eetec na nqaÿañicpi da ÿaconguet ca l'amqajnataxanaxaua. Qataq ÿataqta qautauañi da huo'o ca iueetac, cha'ayi acamayi ÿataqta qalota na itauan, ivida'a nataq'en aÿim.
3Samaxa da iquinaxanaxac aca Priscila qataq ca lhua Áquila mayi ita'u da so'onataxanaqtacot so Cristo Jesús. 4Cha'ayi caamayi ÿataqta nañangueta co'ollaxa da lchic, da yaqto' aÿim nca'alaxatreec. Qaq ÿoqo'oyi saatac da ñi'achiquiaxac. Qalaxayi sa ishit da nachaqaÿimta, cha'ayi nataq'en 'enauac na qadqaÿañicpi mayi sa ishit da judiopi. 5Nataq'en samaxa da iquinaxanaxac ca qadqaÿañicpi mayi natamnaqa' yi lma' aca Priscila qataq ca Áquila, qataq nataq'en ca ñauochaxaua ÿaqaÿa Epéneto mayi nachica ca l'auaxanec da i'amaqten so Cristo nam lma' yi Acaya. 6Nataq'en samaxa da iquinaxanaxac aca María mayi ÿataqta qalota da l'onataxanaxac da qoñiita. 7Nataq'en samaxa da iquinaxanaxac caua maichi iuo' lashi' Andrónico qataq aca Junias mayi ñicoñitaxa'u co'ollaxa. Caamayi ÿataqta qaÿauattoote', 'eeta'ama qanqoÿin soua lamaxa'shi so Jesús, qataq hua'auchiyiñi co'ollaxa da i'amaqte'n so Cristo, qaq aÿim qalaq ñica'ataxanauo.
8Nataq'en samaxa da iquinaxanaxac ca ñauochaxaua Ampliato cam n'attau'a so qadataxala'. 9Nataq'en samaxa da iquinaxanaxac ca Urbano cam qad'onataxanaxaua da so'onataxanqot so Cristo Jesús qataq ca lÿa ñauochaxaua Estaquis. 10Nataq'en samaxa da iquinaxanaxac ca Apeles mayi ÿataqta qalotacnaxa da ÿachaxaata da lpi'iÿaxac so Cristo, qataq nataq'en cam llalaqpi ca Aristóbulo. 11Nataq'en samaxa da iquinaxanaxac ca iuo' l'ec Herodión, qataq cam llalaqpi ca Narciso mayi i'amaqteetac so qadataxala'. 12Nataq'en samaxa da iquinaxanaxac aca Trifena qataq aca Trifosa mayi do'onataxaatracot so qadataxala', qataq nataq'en aca qanauochaxaua qadqaÿa Pérside mayi qalota da ldaxac da i'ottac da l'onataxanaxac so qadataxala'. 13Nataq'en samaxa da iquinaxanaxac ca Rufo cam nauattonatac mayi i'amaqteetac so qadataxala', qataq acam late'e mayi nataq'en 'eeta'am ñaq'en aca maichi ÿate'e. 14Nataq'en samaxa da iquinaxanaxac ca Asíncrito, Flegonte, Hermes, Patrobas, Hermas, qataq ca qadqaÿañicpi mayi hueta'agueta caamayi. 15Nataq'en samaxa da iquinaxanaxac ca Filólogo qataq aca Julia, Nereo qataq aca lqaÿa, qataq ca Olimpas qataq 'enauac ca qadqaÿañicpi qad'amqajnataxanaxauapi mayi hueta'agueta caamayi.
16Nataq'en ñi 'oonolec qome da qoñiita napigoq ca lÿa da nquine', ÿataqta qanchoxonñiÿa't. Qataq 'enauac nam 'amqajnataxanaxaicpi mayi quetague' so Cristo qami' ÿamaxalo da lquinaxanaxac.
17Qami' ÿaqaÿa't, qami' ñachoxodeetoiguilo da ÿataqta qauloiteguet qome nam huesogui naq'en na shiÿaxauapi, qataq 'ico' qui'aqañi naq'en. Cha'ayi namayipi ÿataqta npa'aguene' nam napaxaguenataxanaxacpi mayi mashi qauaÿajñi. Ÿoqo'oyi qoquiÿa'ai qome namayipi. 18Cha'ayi ne'ena shiÿaxauapi sa ishit da do'onataxaatacot so qadataxala' Jesucristo, chaqdata da maichi lsoxo. Qataq namayipi ÿatenachit da lquiyaqteÿaxac nam shiÿaxauapi mayi qaica ca ÿaÿajnapec, idolguete naua l'aqtaqa isotta'pe qataq amai'. 19Qaq 'enauac qaÿaÿaten da qami' ÿataqta qaualaqai. Ÿoqo'oyi aÿim ÿataqta samachiguiñi. Qalaxayi ñishitaique da ÿataqta qami' lhuotte' da qau'ochi ca no'on, qaq cam qauem qalaxayi sa ishit. 20Qaq ñim Dios mayi chigoqo'ot da nlagaxayic saqaÿaloq qome da nlaxajñi da l'añaxac so Satanás da ÿacho'oto na qadapia'chilli', da yaqto' qauapiilec. Qaq so qadataxala' Jesucristo qami' ÿanema qome ca qanchoxonnataguiiqui.
21Nataq'en qami' ÿamaxalo da lquinaxanaxac ñi Timoteo mayi ñitaunaxaua, qataq ñi Lucio, Jasón qataq ñi Sosípatro nam iuo' lashi'.
22Qataq aÿim Tercio mayi settapiguiñi ana'ana nede, nataq'en qami' samaxalo da iquinaxanaxac, cha'ayi nataq'en sa'amaqteetac so qadataxala'.
23Qaq aÿim Pablo ñi sootaña na lma' Gayo, ñim natamnaqa' na lma' na 'amqajnataxanaxaicpi, nataq'en qami' ÿamaxalo da lquinaxanaxac. Nataq'en qami' ÿamaxalo da lquinaxanaxac ñi Erasto ñim ilotague' ana alom na la ciudad, qataq ñim qadqaÿa Cuarto.
24Qaq so qadataxala' Jesucristo 'enauac da qoñiita qami' ÿanema qome ca no'on. Aja', nachi 'eetec.
So Pablo ÿi'oxoden ñi Dios
25Qaq ÿoqo'oyi nagui shi'oxodenaq qome ñi Dios ñim ishit da ÿataqta da'añi naq'en da qadpi'iÿaxaqui, da yaqto' nateeteguet naq'en dam sa'axattac n'aqtac mayi chigaqaigui da nca'alaxa qataq da napaxaguenataxanaxac mayi n'aqtaguec so Jesucristo. Cha'ayi damayi ÿataqta nateeteguet dam saq cha'a 'eetapeguec ñi Dios mayi qomi' ÿaÿajnaxanaxanque. Damayi chochi saq cha'a naq'en ñimayi co'ollaq saxanaqaca ana 'alhua. 26Qalaxayi nagui mashi qaichoxot, chigoqchiguilo qanqoÿin naua ñiyigui'shi l'aqtaqa ñi Dios mayi ÿilyiñi da n'onaxatrañi som hua'au l'aqtaxanaxanecpi. Qaq damayi nateeteguet dam lamaxasoxonaxac ñim Dios mayi chochaq tateec. Qaq de'eda saq cha'a mayi 'eetapeguec ñi Dios, damayi ÿauattonaxanaxanec nagui naq'en na ÿotta'a't shiÿaxauapi, da yaqto' i'amaqten ñimayi qataq ÿalaxaguet.
27¡Qaq ñim Dios, mayi qaica ca lÿa qataq ÿajnaxanaxaic, nachi 'eetai' qome da qaÿi'oxodeetac, souaxat so Jesucristo! Aja', nachi 'eetec.
Currently Selected:
Romanos 16: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
