Lucas 24
24
So Jesús qaltaq nca'aleec qanqoÿin
(Mateo 28.1-10; Marcos 16.1-8; Juan 20.1-10)
1Qaq co'ollaq ña nte'etom so l'auaxanec soua na'axa'te, nachi som 'alpi nqo'oneuga aso huachiqui, qaÿachitac som codaxat mayi qaÿaqataxaatapigui'. Qataq huo'o so laÿipi 'alpi qannaictague'. 2Qaq co'ollaq qaiviteuga asomayi, nachi qailalec so coma' mayi lapoxot da sa ishit da huetaña so lma'. 3Nachi qainoxonoigui asomayi, qalaxayi sa ishit da qaÿanata da l'oquiaxac so qadataxala' Jesús. 4Nachi ÿataqta huo'o da lcolanqa' soomayi, qataq sa ÿaÿate'n ca 'eeteque co'ollaq qaila'alo soua dos shiÿaxa'u nachattrañi, huaqta'ato soomayi. Soua alogo ÿataqta qashilectrapiguiñi. 5Qaq soomayi yi i'alyiñi naua l-llicte, nachi ÿataqta ividaxata'agueta naq'en na 'alhua naua lata'pi souaxat da lcolanqa'. Nachi se'esoua shiÿaxa'u 'ena'po':
–¿Tá'ainco' yi qanmichiitapigui na leuaxaicpi da qanmichiitaique som nca'altauec? 6Sa ishit da hueta'a ne'ena somayi, cha'ayi mashi qaltaq nca'aleec qanqoÿin. Qauennachi dam l'aqtac co'ollaq hueta'a yi Galilea, 'eeta'; 7“Na shiÿaxaua llalec qoÿanoigui qome na 'itaxaloxoicpi, da yaqto' qaiuaxaneuo, qalaxayi qom mashi ivi' naua tres na'axa'te, nachi qaltaq nca'aleec qanqoÿin.”
8Nachi soomayi tachiguilo lauel da l'aqtac co'ollaxa so Jesús. 9Qaq co'ollaq chigoqojdelec aso huachiqui da ÿi'iguelaxadeuo, nachi co'ollaq ivildeuo, nachi da'aqtaxanem 'enauac de'eda soua once namaxa'shi, nataq'en 'enauac so laÿipi. 10Qaq soua idodeuo da l'axaÿaxa'c soua once namaxa'shi, nachaso aso María mayi Magdala lashi, qataq aso Juana, qataq aso María mayi late'e so Santiago, qataq so laÿipi 'alpi. 11Qalaxayi soua namaxa'shi 'eeta'am naq'en da chochi naÿaquiaxac da i'axattrac soomayi, nachi sa ishit da i'amaqte'n.
12Qalaxayi so Pedro nachi nqalgoq da demejnaxaneuga aca huachiqui. Qaq co'ollaq ÿalliguingui na lauel asomayi, nachi ndoteec so hualoq lapagaxaic huetau'a na laÿi asomayi. Ime, nachi ÿi'iguelaxau'a ca lma', ÿataqta huo'o da l'aalaxa dam qanayiuaigui.
Da nachaxanaxac so Jesús co'ollaq huangui so nqa'aic mayi taÿa'ague da Emaús
(Marcos 16.12-13)
13Qaq nachiso se'eso na'a'q, qaq dos somayipi soua taÿa'aguelo da pueblo, l'enaxat da Emaús, huo'o ca once kilómetros da qaÿachigoqteu'a yi Jerusalén. 14Qaq co'ollaq quete' soomayi nachi n'aqtaxaatrapigui 'enauac de'eda qanayiuaigui. 15Qaq co'ollaq n'aqtaxaatega't qataq ncotatega't, nachi so Jesús ca'atalo soomayi, nachi nnaictagueto. 16Qaq nai'ctaxa da qailoto'ot somayi, qalaxayi huo'o som 'ico' npaxattac da huo'o mshi sa ishit da ÿauatto'n somayi. 17Nachi so Jesús inatta'pe soomayi, 'eeta':
–¿Négue't cam qancotaitapigui can huangui na nqa'aic? qataq ¿tá'ainco' yi qauaquicoita?
18Nachi so 'oonolec soomayi, l'enaxat Cleofás, ÿasat, 'eeta':
–'Enauac nam shiÿaxauapi mayi hueta'a na Jerusalén qaica ca sa ÿaÿaten da qanayiuaigui se'esoua na'axa'te. Qaq ¿chaq 'amto' da qonetaña yimayi da sa 'auaÿaten de'eda?
19Nachi somayi 'enapeco':
–¿Négue'to' camaxa?
Nachi soomayi 'ena'po':
–Qomyi dam huaigui so Jesús mayi l'ec yi Nazaret som l'aqtaxanaxanec ñi Dios. Se'eso shiÿaxaua qaica ca ÿaqalanapec cam l'aqtac qataq cam i'ot, qaq ÿataqta ÿaÿamaxadeeta somayi ñi Dios qataq 'enauac na shiÿaxauapi. 20Qalaxayi nam lataxala'pi na ntaxaÿaxanaxanecpi da qaitaxaÿapegue' ñi Dios qataq nam maichi qadta'alpi qoÿanguet somayi da nalaataguec qataq da qaiuaxaneuo. 21Qalaxayi qomi' huo'o da qanaquitaxac da nachiso somayi som nca'alaxateec qome na llalaqpi so Israel. Qaq nagui mashi ivi' na tres na'axa'te da qanayiuaigui de'eda. 22Qaq 'eesa da huo'oi soua 'alo mayi qomi' huetaiguilo da qomi' icolanaqchi't, cha'ayi so ña qaÿata'aguet so na'a'q, nachi nqo'oodeuga aso huachiqui. 23Qaq co'ollaq sa ishit da qaÿanata ca l'oquiaxac somayi, nachi ñi'iguelaxadeuo da i'axattrac da lauanaqchi'c co'ollaq iloda'a soua namaxa'shi piguem lashi' i'axatta'pe da so Jesús nca'altauec. 24Ime, nachi je'c soua maichi qadÿa't da demejnaxaadeuga aso huachiqui. Qaq co'ollaq ivildeuga, nachi ilodalec da qui'itchigui. Qaq ipacchigui dam 'enapec soua 'alo, qalaxayi sa ishit da qaila'a ca Jesús.
25Nachi so Jesús 'enapeco':
–¡Ÿataqta qaico' ca qauaÿajñiÿapec qami', qataq qaÿaloqta da qau'amaqchiñi 'enauac nam l'aqtaxanaxacpi som l'aqtaxanaxanecpi ñi Dios! 26¿Sa qauaÿajñiÿo' peta'a da que'eca nta'a nca'alaxaqui hua'auñi qome da huo'o da nque'ejnaxac qom saxanaxa da inoxoneu'a ca lli'oxoyic?
27Ime, nachi da'aqtaxanema soomayi 'enauac nam n'aqtaguec somayi nam nanettañi naua ñiyigui'shi l'aqtaqa ñi Dios, ÿachigoxottot aso hua'auchiguiñi lliyiguishi so Moisés, ividaxatta'a asom pa'ateec lliyiguishi som l'aqtaxanaxanecpi ñi Dios.
28Qaq co'ollaq ivilda som pueblo mayi taida'a, nachi so Jesús i'enaxat da 'ico' nachi ÿapactauec da queta. 29Qalaxayi ÿataqta qaipactega somayi da n'onañi. Nachi qoÿiitega, qoÿiita':
–Ña qomi' 'an'onaisopactaxa. Ten, yi mashi avit, qataq yaqta'a da pe.
Nachi so Jesús ca'ateu'oguelo soomayi da n'onaisopa. 30Nachi co'ollaq mashi nso'oota'ai'salo soomayi da datatralec so nqui'axala', nachi somayi ÿacona aso pan da nqouagaxaueelec. Ime, nachi ÿanoiguilo soomayi. 31Huaña, nachi soomayi 'ico' da qaÿauatoiguilo naua l'ai'te, nachi ÿauatto'n somayi, qalaxayi somayi nachi pal. 32Nachi soomayi detaxaÿapega't, 'eeta':
–¡Qachi ÿoqta 'eesa caillayi da 'ico' dato'm naua qadquiyaqte, can ñanaguenaqta na nqa'aic, can qomi' i'axattapeguema naua ñiyigui'shi l'aqtaqa ñi Dios!
33Huaña, nachi sa ishit da huo'o ca iuattra'a soomayi, nachi je'c da ÿi'iguelaxadegue da Jerusalén. Huaña, nachi qanauaneto soua once namaxa'shi qataq 'enauac so laÿipi'. 34Nachi somayipi da'aqtaxaatac, 'eeta':
–Ÿoqta 'eesa da qaltaq nca'aleec qanqoÿin so qadataxala', qataq so Simón mashi nauane'.
35Nachi soomayi nataq'en da'aqtaxaata'pe, i'axattrac da 'eetec da huedaigui co'ollaq quetrague' so 'eetec da huedaigui co'ollaq ÿauattoodelec so Jesús co'ollaq ncolaxattapiguiñi aso pan.
So Jesús nachaxana so lapaxaguenatacpi
(Mateo 28.16-20; Marcos 16.14-18; Juan 20.19-23)
36Qaq ña qan'aqtaxaatapigui de'eda, co'ollaq so Jesús nachatchiguingui na laiñi somayipi. Nachi iquin, 'eeta':
–Ÿataqta huo'o da qadlagaxayiqui qome.
37Nachi somayipi ÿataqta ñi'i, qalota da lcolanaxa, ipi'itaxaatega da chochi nqui'i ca ilota'a. 38Qalaxayi so Jesús 'enapeco':
–¿Tá'ainco' yi qayi'ii? qataq ¿tá'ainco' yi huo'o da lqolguetaxanaxa'c naua qadquiyaqchilli'? 39Ña qaumijñi naua iua'q qataq naua ichil. Ñaq aÿim qaupochiu'a qataq aÿim qaumijñi, cha'ayi cam nqui'i qaica cam lapat qataq cam lpi'inec, qaq sa ishit da 'eetec nagui da aÿim qauloito'ot.
40Qaq co'ollaq 'enapec de'eda, nachi ÿachaxa'n naua lhua'q qataq naua lapia'te. 41Qalaxayi somayipi saxanaxa da i'amaqten de'eda souaxat da ntonaxac qataq dam l'aalaxa. Nachi so Jesús 'enapeco':
–¿Huo'o peta'a ca qonoqoi ne'ena?
42Nachi qoÿanem so laÿi so nÿaq qataq so lli'ac lte' na te'esaq lta'a. 43Nachi somayi ÿacongueta. Ime, nachi chi'c, ÿauaachigui naq'en somayipi. 44Qaq co'ollaq ime, nachi 'enapega somayipi, 'eeta':
–De'eda souaigui, nachida dam sa'axattac co'ollaq ña qami' soota'agueta: da ipacchigui qome 'enauac na ñi'aqtaguec mayi i'axat nam nqataxacpi mayi ÿiyiñi co'olloxochiyi so Moisés qataq nam lliyigui'shi som l'aqtaxanaxanecpi ñi Dios qataq nam ñiyiguishicpi l'enaxat Salmos.
45Huaña, nachi ÿanem somayipi da ÿaÿate'n naq'en naua ñiyigui'shi l'aqtaqa ñi Dios. 46Nachi 'enapeco':
–Dam nanettañi i'axat da ca nta'a mayi nca'alaxaqui hua'auñi qome da qaÿalauat. Qaq qom mashi inoxoodeec caua tres na'axa'te, nachi qaltaq nca'aleec qanqoÿin. 47Nachi de'eda l'enaxat qai'axateec qome, qai'aqtaxanoigui na ÿotta'a't shiÿaxauapi, qaq qoÿinapega 'enauac namayipi da ca'aisalo naua n'onataxaco, yaqto' naua n'onataxaco ishit da qaÿapalaxa't, qaq qaÿachigoqchiguiña qome na Jerusalén. 48Qaq nachi qami' qome mayi qau'axachiiuec 'enauac de'eda qadauanaqchiqui. 49Qaq aÿim qome qami' ñamaxalo cam ÿachaxanapec co'olloxochiyi ñi ita'a. Qalaxayi nachi qoviita'a qome na la ciudad Jerusalén, to' qom mashi qauacoñiiguet cam n'añaxac mayi chigaqshiguem.
So Jesús taigue da piguem
(Marcos 16.19-20)
50Nachi so Jesús nqateeguesop somayipi so la ciudad da ÿauegueuga yi Betania. Ime, nachi ÿachaxaayishigue'm naua lhua'q da ÿanem da nqouagaxa somayipi. 51Qaq co'ollaq mashi ÿanem da nqouagaxa somayipi, nachi ca'ai da qaÿaueegue da piguem. 52Nachi somayipi co'ollaq imat da natameetacot somayi, nachi ÿi'iguelaxague da Jerusalén, ÿataqta machiguiñi. 53Nachi sa i'atai' da hueta'a aso n'onaxanaxaqui late'edai da ÿi'oxodeetac ñi Dios. Aja', nachi 'eetec de'eda.
Currently Selected:
Lucas 24: TBSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.