Juan 2
2
So nadonaxac mayi huaña yi Caná mayi huaigui yi 'alhua Galilea
1Qaq co'ollaq mashi inoxoodeec soua tres na'axa'te, nachi huo'o so nadonaxac huaña yi pueblo Caná huaigui yi 'alhua l'enaxat Galilea. Qaq aso late'e so Jesús nachi hueta'a yimayi. 2Nachi so Jesús qataq soua lapaxaguenataqa, soomayi nataq'en qaicoyigue'n da yaqto' ÿalectrau'a se'eso nadonaxac. 3Qaq imeuo so lataxa, nachi aso late'e so Jesús 'enapega somayi, 'eeta':
–Mashi imeuo so lataxa.
4Nachi so Jesús 'enapega asomayi, 'eeta':
–'Am 'alo, ¿tá'ainco' yi qonetec de'eda da aÿim qonapega? Yi aÿim saxanaxa da ivita yi ÿaloqo'.
5Qalaxayi asomayi 'enapega som huetapecpi, 'eeta':
–Qau'ochi qome 'enauac cam 'enapec damayi.
6Qaq huo'oi soua seis naco'oña coma' mayi laÿi' naxa na 'etaxat mayi lÿoxonaxat na judiopi da i'ot da n'onataxac da iÿo na nqui'axaquipi. Qaq añi 'oonole se'esoua naco'oña, na l'ec ivi' ochenta litros na 'etaxat, huo'otaq cien. 7Nachi so Jesús 'enapego' se'eso nlatacpi, 'eeta':
–Qauÿoqoiguilo qome na 'etaxat ñi'iñiua naco'oña.
Nachi qaiÿoxoguilo soomayi, ÿataqta qanlaxatchiguilo. 8Nachi so Jesús qataq 'enapegalo soomayi, 'eeta':
–Nagui qataq huo'o qome ca qanqachiishiguem na 'etaxat. Ime, nachi qaudoiua'a qome ñim ilotague' ne'ena nadonaxac.
Nachi qai'ot da 'enapec somayi. 9Nachi se'eso ilotague' so nadonaxac co'ollaq ÿi'iguen se'eso 'etaxat mayi nañigui na lataxa mayi sa ÿaÿaten ca chigaqa'ague, chaqsota som allippi mayi ÿaÿaten, cha'ayi somayipi nqatshiguem co'ollaxa se'eso 'etaxat. Nachi se'eso ilotague' so nadonaxac iÿaxana som huotaique da huadon. 10Nachi 'enapega, 'eeta':
–'Enauac na shiÿaxauapi i'auaxaachiguiñi naxa da nÿomaxangui na no'on lataxa na namaxasoxoic, qaq da mashi qaÿoqtegue da nÿomaxac, nachi qaltaq qanÿomaxangui na lataxa mayi saqalligueme da no'on. Qalaxayi 'am chochi ivitta'a nagui da ña 'auaÿamaxattac na no'on lataxa.
11Qaq de'eda i'ot so Jesús huaña yi Caná mayi huaigui yi 'alhua Galilea. Qaq damayi nachida da hua'auchiguiñi nam i'otpi n'anec mayi sa qaÿauanapigui co'ollaq ÿachaxan da lli'oxoyic. Nachi so lapaxaguenatacpi ÿataqta i'amaqten somayi.
12Qaq co'ollaq ime de'eda, nachi somayi taÿa yi pueblo l'enaxat Capernaum, lÿatac aso late'e, nataq'en soua lqaÿa't, qataq soua lapaxaguenataqa. Nachi ÿataqta huo'oi soua na'axa'te da hueta'a yimayi.
So Jesús do'otaxaalec aso n'onaxanaxaqui
(Mateo 21.12-13; Marcos 11.15-18; Lucas 19.45-46)
13Qaq co'ollaq mashi sa qaÿapeque so laloxoqui da na judiopi iuennate so na'a'q co'ollaq ca'ai qanqoÿin yi Egipto, nachi so Jesús nqo'oneu'a yi la ciudad Jerusalén. 14Qaq co'ollaq ivideu'a aso n'onaxanaxaqui late'edai, nachi ilalec na imeetac na huacapi qataq ana qaguetapi, qataq na qoto'pi. Nataq'en ilalec na nso'ootañipi, datatalec na nmenaxala'pi, nmenaxanaxaatega't ana alom na shiÿaxauapi. 15Qaq co'ollaq ilalec ne'enapi, nachi so Jesús ÿacona so nañic da ÿauo'o lalashinaxanaxat. Nachi i'odauec 'enauac na nmenaxaicpi, lÿaueegue' naq'en ana lmena qaguetapi, qataq na huacapi. Qataq icodeec ana alom na nmenaxanaxaatega't ana alom na shiÿaxauapi, qataq ÿamaxañi na nmenaxala'pi. 16Nachi 'enapega na imeetac na qoto'pi, 'eeta':
–¡Qanqachiiuec qome 'enauac ne'enapi! ¡Sa ishit da qau'ochiic na lma' ñi ita'a da menqa' qanqashiñi!
17Nachi soua lapaxaguenataqa iuennatre naua ñiyigui'shi l'aqtaqa ñi Dios, mayi 'eeta': “Ÿataqta 'ico' aÿim ÿavic naq'en da shiita lta'adaic na 'adma'.”
18Nachi na judiopi inattac somayi, 'eeta':
–¿Négue't ca n'anec qomi' 'auachaxanalo, da yaqto' ishit da 'am sa'amaqtenaq da ÿoqta 'eesa huo'o ca qonec da 'au'ot de'eda?
19Nachi so Jesús 'enapeco':
–Qomyi qanlaxachiiñi ana n'onaxanaxaqui, nachi aÿim qaltaq ñi'oxooshiguem qome; tres na'axa'te, nachi qaltaq semat.
20Nachi na judiopi 'enapeco':
–Ivi' naua cuarenta y seis vi'iyi da qan'oxootapiguishiguem ana'ana n'onaxanaxaqui, nachi qaimat. ¿Qalaq 'am qonapec yi tres na'axa'te, nachi 'amat da 'an'oxooshiguem?
21Qalaxayi aso n'onaxanaxaqui mayi detaqtega so Jesús, nachida da maichi lalamaxat l'oquiaxac. 22Qaq ÿoqo'oyi so Jesús co'ollaq mashi qaltaq nca'aleec, nachi soua lapaxaguenataqa tachiguilo yi lauel de'eda l'aqtac somayi. Huaña, nachi ÿataqta i'amaqte'n naua nanettrañi l'aqtaqa ñi Dios, qataq naua l'aqtaqa somayi.
So Jesús ÿauatto'n naua lhuennataxaco na shiÿaxauapi
23So Jesús co'ollaq hueta'a yi Jerusalén da ÿalectaigui so na'a'q mayi huetoigui da qaiuennate co'ollaq qanayica'ai yi Egipto, nachi ÿataqta qalota na i'amaqten somayi, souaxat da ÿauaatapigui na i'otpi n'anecpi mayi sa qaÿauanapigui. 24Qalaxayi so Jesús sa ishit da ÿoqta i'amaqten namayipi, cha'ayi ÿaÿaten na lhuennataxac 'enauac namayipi. 25Qaq sa ishit da iuen da huo'otaq huo'o ca da'aqtaxanem somayi da lataxac na shiÿaxauapi, cha'ayi somayi maichi ÿaÿateetac na lhuennataxacpi na shiÿaxauapi.
Currently Selected:
Juan 2: TBSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.