Colosenses 3
3
1Qaq ÿoqo'oyi da qami' sogote da qadÿaitchiguem so Cristo co'ollaq qami' qanca'alaxatreec, nachi qanmichiÿaique cam hueta'ague da piguem dam neta'ague so Cristo da nso'ootau'a na aloic ñi Dios. 2Qaq ÿataqta tatapigui qadvilli cam pa'ata'ague da piguem, qaq sa ishit da qauennachiitapega nam huetalec ana 'alhua. 3Cha'ayi qami' mashi qadleuaxauai so Cristo, qaq nagui da qanachaalataxaqui hueto'ot somayi da n'attau'a ñi Dios. 4Cha'ayi so Cristo nachiso so qanachaalataxac. Qaq qom ivita da ñi'iguelaq da nachaxan, nachi qami' nataq'en qanachaxañi. Nachi qanhuañiÿau'a da lli'oxoyic somayi.
Da toguishic achaalataxac qataq da dalaxaic
5Qaq ÿoqo'oyi qami' ÿataqta imeuo qanqashiñi 'enauac na qan'onataxaqui mayi huetalec ana 'alhua. Qaica qome ca huetapeeguet aca sa lhua, qataq sa ishit da qau'ochi cam ishit da deshipaxanaqtaxan, qataq sa ishit da qoquiitagueto naua qadqopitaxanaqtaicolli' qataq naua qauema qadhuennataxacolli'. Qataq sa ishit da qami' qopitaxanaqtaqaiqa, cha'ayi damayi 'eeta'am da qanatamnot ca nqolac. 6Cha'ayi nachinaua na chigoqchiguilo dam qaica ca 'en'am da lchic layiloxo ñi Dios da ÿauo'o da nhuaxanaguec nam sa ishit da ÿalaq. 7Qaq qami' qau'ochiitac co'ollaxa 'enauac ne'ena som toguishic qadataxaqui. 8Qalaxayi nagui qai'axañiiuec qome 'enauac ne'ena 'onataxacpi: nalemataic, nayiloxo, sa ÿaÿamaxañisat, nnogoqtaxanaxac, qataq naua qauema n'aqtaqa mayi ishit da qanasaxadeec. 9Qataq sa ishit da huo'o ca ÿatenachit ca lÿa, cha'ayi qami' mashi sogote da qaualachi da toguishic qadataxaqui qataq 'enauac nam lataxacpi mayi qau'ochiitac co'olloxochiyi. 10Qataq mashi sogote da qai'añiiñi da dalaxaic nataxac mayi nquictashiguem, chochi ivitta'a da 'eeta'am da lataxac ñim Dios mayi maichi l'onatac, da yaqto' ÿataqta ÿauattoota ñimayi. 11Qaq damayi sa ishit da huo'otaq nachida da yi'oqchigui da judío l'ec ca shiÿaxaua huo'otaq da sa ishit da judío l'ec, huo'otaq ca huo'o ca n'anaxat na l'oc huo'otaq ca qaica ca n'anaxat, qataq ca ÿaqa'a ca chigaqa'ague, huo'otaq nam sa naÿamaxatapec, huo'otaq ca nlatac huo'otaq ca sa nlatac. Cha'ayi so Cristo nachisota 'oonolec, imata 'enauac na shiÿaxauapi.
12Cha'ayi ñi Dios ÿataqta qami' ÿauoteque, qataq qami' lca'agui'shi, da yaqto' qami' lalamqa'te. Qaq ÿoqo'oyi ÿataqta qai'añiiñi qome da qami' choxonnataxanaxaiqa, huotaxanaqtaqaiqa, qataq sa qami' n'amqajnaxaiqa, qataq huosotta da qadataxaqui, qataq qami' hualaxaunaxaiqa. 13Ñi 'oonolec da qoñiita ÿataqta nhualaxaune' ca lÿa qataq ichoxoden da huo'otaq huo'o ca ÿasouaxat. Da 'eetec so Cristo da qami' ichoxode'n, qaq nachida qau'ochi. 14Qalaxayi ÿataqta ÿacteec qome da qalota qanqashiñi da qadsoxoyiqui, cha'ayi nachida da n'atta't naq'en na shiÿaxauapi, qataq ÿataqta naloqchiichiguiñi naq'en 'enauac na lataxaguesat. 15Qataq da nlagaxayic mayi chigoqo'ot ñi Dios ilo'ogue qome da qadquiyaqteÿaxaqui, cha'ayi nachida da huo'o mshi qami' iÿaxanalo ñi Dios, da ÿauotaique da 'ico' 'oonolec n'oquiaxac naq'en da qoñiita. Qaq ÿoqo'oyi ÿataqta qauamaichiguiñi qome.
16Qataq da lapaxaguenataxanaxac so Cristo ÿataqta nlaqchiguilo qome naq'en naua qadquiyaqchilli'. Qataq ÿataqta qanaÿajnaxanaqchiñi da qauapaxaguiñi qataq da qau'añaqchichi ca qadÿai. Qataq da qau'onaxañi, qalaq qau'oñi na ÿotta'a't n'onecpi mayi chigoqo'ot so Espíritu Santo. Qataq ÿataqta imauec da qadquiyaqteÿaxaqui da qai'añiitacot da qan'achiquiaxaqui ñi Dios. 17Qataq 'enauac nam qau'ochi huo'otaq cam qanasaqaiuec, qalaq qauachiitoigui da l'enaxat so qadataxala' Jesús. Qataq chigoqchigui qanqashiñi somayi da qai'añiitacot da qan'achiquiaxaqui ñi qadta'a Dios.
Da lataxac ca 'amqajnataxanaxaic da iloteguet ca lÿa
18Qaq qami' 'alpi mayi mashi qauadoñi, ÿataqta qaualaqaiguet qome na qadamoxouaipi, cha'ayi nachida da qad'onataxanaxaqui, cha'ayi qau'amaqchiñiitac so qadataxala'. 19Qataq qami' ÿallippi mayi mashi qauadoñi, ÿataqta qauauochiic aca qadhuai. Qataq sa ishit da sa qauchiyiÿapec acamayi. 20Qataq qami' ñaqpiolec, ÿataqta qaualaqaiguet ca qadta'ai, cha'ayi damayi ÿataqta ÿaÿamaxadeeta ñi qadataxala' Dios. 21Qataq qami' ÿallippi mayi huo'o da qadco'oxoqui, sa ishit qome da qaunogoqchichi ca qai'alquii, yaqto' qom sa ishit da 'aloxogui yi lauel. 22Qataq qami' nlatacpi, ÿataqta qaualaqaiguet qome ca yi'oqchigui qan'aco'oi. Sa ishit da chaqdata da qami' ilotaguilo da yaqto' qami' ÿaÿamaxadeete', chaqdata da ÿataqta huosotta da qadquiyaqteÿaxaqui, souaxat da qayi'iitega ñi Dios. 23Qaq camachaqca ca qau'ochi, qalaq ÿataqta qanasapachiita, 'eeta'am qanqashiñi da nachiñi ñi qadataxala' da qau'onataxañiitacot. Qaq sa ishit da nachica ca shiÿaxaua. 24Cha'ayi qami' mashi qauaÿajñi da ñi'iñi qadataxala' qami' ÿanema qome cam ÿaÿamaxattac da ÿauotaique da ÿami' na lalamaxatpi. Cha'ayi qami' qau'onataxañiitacot so Cristo mayi nachiso so ÿoqta qadataxala'ai. 25Qalaxayi cam i'ottac ca sa ÿaÿamaxañi, qalaq qaishiitenguet cam naigui cam qauem mayi i'ottac. Cha'ayi ñi Dios sa ishit da lca'atagui na shiÿaxauapi.
Currently Selected:
Colosenses 3: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
