Colosenses 1
1
So Pablo ÿamaxa aso lede so 'amqajnataxanaxaicpi mayi netaña yi Colosas
1Aÿim Pablo, da ñamaxasaguec chigoqtot ñi Dios da ÿauo'o aÿim lamaxashic naq'en so Jesucristo. Aÿim soota'aguet ñi Timoteo, 2qaq aÿim qami' ÿaqaÿañicpi mayi qoñiitaña yi la ciudad Colosas, qami' samaxalo ana ÿide, qami' qau'amaqchiñiitac so Cristo, qataq qami' lalamqa'te ñi Dios. Ñishitaique da qami' qauacoñiiguet qome da lqouagaxanaqtaic ñi qadta'a Dios qataq da l-lagaxayic.
So Pablo nqouagaxaueetapeguelec na 'amqajnataxanaxaicpi
3Qomi' naxa da ivita da ñoqouagaxaunaqtapeguelec da qoñiita, nachi sanaqtacot da qan'achiquiaxac ñi Dios ñim lta'a so qadataxala' Jesucristo. 4Cha'ayi co'ollaq huo'o da qad'axaÿaxac da qadpi'iÿaxaqui so Cristo Jesús qataq da qadauotaxanaqtaiqui 'enauac nam lalamaxatpi ñi Dios, 5souaxat da qanaquitaxaqui cam ÿaqataxaatapigui' da qami' ÿanema ñi Dios qom qoviita'ague da piguem. Qaq qami' qauacoñiiguet de'eda aquitaxac co'ollaq qan'axaÿaxañiÿa dam n'aqtac mayi 'eesa, dam no'on qad'axaÿaxac mayi chigaqaigui da nca'alaxa. 6De'eda n'aqtac mayi qami' qai'axatema co'ollaxa, damayi ÿataqta nquictashiguem qataq huo'o da alaÿaxac 'enauaque naua 'ale'u, da 'eeta'am da qoñiita co'ollaq qan'axaÿaxañiÿa da lqouagaxanaqtaic ñi Dios, huaña, nachi qauaÿajñi da de'eda nqouagaxanaqtaic ÿataqta 'eesa. 7Qaq damayi qami' ÿapaxaguenque so qanauochaxaua qadqaÿa Epafras. Somayi maichi qad'onataxanaxaua, qaq do'onataxaatacot so Cristo, da yaqto' qami' itaua'n. 8Qaq somayi qomi' nda'alo da qad'axaÿaxac da qoñiita qataq dam qadsoxoyiqui mayi qami' ÿanema so Espíritu.
9Qaq ÿoqo'oyi qomi' se'eso na'a'q can huo'o da qad'axaÿaxac, nachi qolaqtot da qami' ñoqouagaxaunaqtapeguelguete, seÿaxanaqtacot ñi Dios da ña qami' ÿauattonaxanaxanque cam 'eetapeguec ñimayi, qataq da qami' ÿanema na ÿotta'a't naÿajneguesat qataq da nauattonaxanaxac mayi chigoqo'ot so Espíritu. 10Qaq yaqto' qami' ishit da no'on da qadataxaqui, 'eeta'am da lataxac na quetague' so qadataxala', qataq yaqto' qau'ochiitac cam ÿaÿamaxadeeta somayi. Huaña, nachi huo'o da alaÿaxac 'enauac nam ÿaÿamaqchiguiñisat mayi qau'ochi, qataq qaviyiita'a da ÿataqta qauauattoñiita ñi Dios. 11Qataq seÿaxanaqtacot ñimayi, da yaqto' ÿachigoxotchigui da l'añaxac mayi qaica ca 'en'am da lli'oxoyic da qami' 'añaxaiqa naq'en, da yaqto' huo'o da qanhualaxaunaxaqui qataq da qantonaxaqui da qanaloÿa'aguet 'enauac na chochaqna, 12qataq da qai'añiitacot da qan'achiquiaxaqui ñi qadta'a Dios, cha'ayi ñimayi ÿaqataxaatapigui' cam qomi' ÿanema mayi ÿachaxanapeguem da ÿanem 'enauac nam lalamaxatpi, qom ivita da souaqtaigui cam l'edaxa ñimayi. 13Cha'ayi ñimayi qomi' nca'alaxateeguesopa co'ollaxa da lamaxasoxonaxac na napalaxa, huaña, nachi qomi' inoxonaqchiteu'alo da lamaxasoxonaxac so lauotaxat llalec, 14ÿachigoxotchigui da l-leuaxa somayi da qomi' nca'alaxatreec, qataq da ÿapalaxat 'enauac na qadasouaxashitpi.
Chigoqchigui da l-leuaxa so Cristo da qanmane' ñi Dios
15Ñim Dios mayi sa ishit da qaila'a, ñimayi nactaigui da yi'oqchigui lataxac so llalec, som l'auaxanec da huo'o co'ollaq saxanaqca 'enauacna. 16Qaq ÿachigoxotchigui somayi co'ollaq i'ot 'enauac nam hueto'ot na piguem qataq nam huetalec ana 'alhua, qataq 'enauac nam sa ishit da qaila'a, qataq nam ishit da qaila'a. Nataq'en nam nta'alpi, damaxasoxonapecpi, nataxala'pi qataq na 'añaxaicpi mayi saq cha'a, 'enauac chigoqchigui somayi. Qaq 'enauac maichi lalamaxatpi. 17Qaq so Cristo nal'ena da huo'o co'ollaq saxanaqca 'enauacna. Qaq somayi nachiso so nllitañi 'enauac namayipi. 18Qataq so Cristo nachiso so lqaic da n'oquiaxac mayi nachina na 'amqajnataxanaxaicpi. Somayi nachiso so ÿanem da lca'alaxa de'eda n'oquiaxac. Somayi l'auaxanec da qanca'alaxateeguesop na leuaxaicpi, da yaqto' somayi nachisota 'oonolec nataxala'. 19Cha'ayi ñi Dios nshitaique da so Cristo ÿataqta imatta't 'enauac da lataxac ñimayi. 20Qataq nshitaique nataq'en da ÿachigoxotchigui so Cristo da nmane' ñimayi 'enauac nam huetalec ana 'alhua qataq nam hueto'ot na piguem. Qaq i'ot de'eda nlagaxayic, ÿachigoxotchigui naq'en da l-leuaxa so Cristo co'ollaq qaiuaxanguet so npe'enaxaqui.
21Qaq qami' co'ollaxa 'eeta'am da ÿaqa'a ca qauachigoqÿa'ague qataq ÿataqta npa'aguene' ñi Dios da qadquiyaqteÿaxaqui, souaxat nam qau'ochiitac sa ÿaÿamaxañisat. Qalaxayi nagui ñi Dios qaltaq qami' nmaneto, 22ÿachigoxotchigui naq'en da l-leuaxa so Cristo co'ollaq huo'o da nque'ejnaxac da l'oquiaxac. Qaq 'eetec de'eda ñimayi, cha'ayi nshitaique da qami' nachaalataxaneu'alo cam hueta'a, qalaq qami' qui'itte' qataq qaica ca 'ico' qadshipaxanaxai qataq ca qadasouaxashichi. 23Qalaxayi damayi iuen da qami' sa ishit da qai'axañiiuec da qadpi'iÿaxaqui, qoñiita'am aca qo'ipaq mayi ÿataqta qaÿoqchiguingui ca lpa'a'q. Qataq sa ishit da qai'axañiiuec da qanaquitaxaqui mayi qauachigoxochiichigui da n'aqtac mayi chigaqaigui da nca'alaxa mayi qan'axaÿaxañiÿa. Qaq de'eda n'aqtac nachida da qai'axattac 'enauaque naua 'ale'u. Qaq aÿim Pablo nachida da sa'axattac.
So Pablo qaipataxalec da do'onataxaalec na 'amqajnataxanaxaicpi
24Qaq nagui aÿim ÿataqta samachiguiñi, cha'ayi huo'o da ñique'ejnaxac souaxat da qoñiita. Cha'ayi de'eda nque'ejnaxac da ÿalamaxat i'oquiaxac, damayi naigui da yaqto' nalochiguiñi naq'en na nque'ejnaxacpi so Cristo souaxat na 'amqajnataxanaxaicpi mayi nachina na 'ico' l'oquiaxac somayi. 25Qaq maichi chigoqchigui ñi Dios da aÿim ÿanagui da i'onataxanaxac da yaqto' so'onataxaalec da qoñiita, qami' 'amqajnataxanaxaicpi, qataq da sa'axatta 'enauac da l'aqtac ñimayi, 26dam l'aqtac mayi sa ishit co'ollaxa da huo'o ca ÿaÿajnaxanaxanec som shiÿaxauapi soua hua'a'u vi'iyi. Qalaxayi nagui ñimayi ÿaÿajnaxanaxanec nam lalamaxatpi. 27Qaq ñimayi ÿauotaique da ÿaÿajnaxanaxanec namayipi dam lsallaxa mayi huo'o da lli'oxoyic da ÿauotaique ÿami' na sa ishit da judiopi. De'eda n'aqtaxanaxac 'eeta': So Cristo qami' hueta'agueta, qataq somayi nachiso so i'ot da qanaquitaxaqui, yaqto' qauacoñiiguet qominchiyi ca ñi'oxoyic.
28Qaq qomi' nachiso so Cristo sa'axataqtac. Qaq saqataqtega 'enauac na shiÿaxauapi, qataq sapaxaguenaqtac 'enauac, yaqto' ÿaÿateeta ca lataxac, qataq yaqto' ñi 'oonolec ÿataqta nquictashiguem, souaxat da n'attau'a so Cristo. 29Qaq nachida da huo'o mshi aÿim ÿataqta imauec ñaq'en da ñi'añaxataxac mayi aÿim ÿami' so Cristo da so'onataxaatac.
Currently Selected:
Colosenses 1: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
