Hechos 27
27
So Pablo qaÿamaxague da Roma
1Qaq co'ollaq mashi qanasachigui da qomi' qaÿamaxadegue da Italia. Nachi so Pablo qataq so laÿipi ncoñitaguishicpi qoÿanot so huataxanaq lta'a, l'enaxat Julio, som ilotague' so huataxanaqpi mayi qaÿamata'ac nallippi so nta'a Augusto. 2Nachi qomi' senotaxau'a aso barco mayi lashi yi ñigaxasom Adramitio, asomayi taÿa'a na ñigaxasompi yi Asia. Qaq qomi' ÿalectaiguilo nataq'en so Aristarco, som lma' yi Tesalónica mayi huaigui yi 'alhua Macedonia. 3Qaq so lÿa na'a'q, nachi sovidaxa yi ñigaxasom l'enaxat Sidón. Qaq yimayi nachi huaña da so Julio da ÿataqta ÿaÿamaxatta so Pablo, nachi ÿanem somayi da yaqto' namaqtega na nauattonaxauapi da yaqto' qaitauan. 4Nachi qaltaq soqolqa'ai yi Sidón, ñilegaqtelec yi 'alhuolec Chipre, pa'aÿa'ague da qan'emaq, cha'ayi souaxat so l'at da sataqta'aguet. 5Nachi soqolaqtangui aso auaxai, qalaxayi soqolaqto'ot na loigue, ÿoqo'oyi ñilegaqtot yi Cilicia qataq yi Panfilia, nachi sovidaqta'a yi la ciudad Mira huaigui yi 'alhua Licia.
6Qaq huaña yimayi, nachi so huataxanaq lta'a ÿanata aso barco lashi yi Alejandría, asomayi taÿa'ague da Italia. Qaq nachaso aso qomi' inotaxanaxaneu'alo, nachi qaltaq qolaq. 7Qaq ÿataqta huo'oi soua na'axa'te da soqolaqta, saualgoxosoqtom, qataq ÿataqta huo'o da qancotaxac, chochi sovidaqta'a yi naloteuga yi Cnido. Qaq cha'ayi ñaq huo'o so l'at sataqta'aguet, nachi saqteuga yi naloteuga yi Salmón, nachi chochi ñiconnaqteu'a yi 'alhuolec Creta. 8Nachi ÿataqta huo'o da qanqalligotaxac can soqolaqto'ot so loigue, chochi sovidaqta'a yi l'enaxat 'Onaxaic Ñigaxasom. Yimayi nachi sa qaÿapeque yi pueblo Lasea.
9Qaq mashi ÿataqta qaÿoqteguelo soua daqa't na'axa'te da qoyiquiaxac, qataq mashi huo'o da lchiquiaxac da qanayictangui aso auaxai, cha'ayi mashi nayiitauo so n'omaxa. Qaq ÿoqo'oyi so Pablo huo'o da lqataxac, 10'eeta':
–Qami' ÿallippi, aÿim sela'a de'eda qoyiquiaxac da ÿataqta huo'o da lchic. Ishit qome da huo'otaq daqat ana qannotaxaqui qataq na lli'ac, qataq ivida'alo qomi' ishit qome da saqataq.
11Qalaxayi so huataxanaq lta'a sa ishit da ÿalaxaguet so Pablo, nda'a't da ÿapagaqnauec dam l'aqtac som lalamaqte aso barco qataq som l'o asomayi. 12Cha'ayi yi'iyi ñigaxasom ÿataqta qauem da qanayiuta'a yi n'omaxa, nachi somayipi huac da 'eeta'a't da nhuennataxac da qanayica'ai yimayi, nachi qaÿi'iguen da qanqo'ona yi Fenice, ñigaxasom yi Creta, da yaqto' qanayiua'a yimayi da n'omaxa. Cha'ayi yimayi datategue da avit qataq da taguiñi.
So l'at lta'adaic mayi huangui aso auaxai
13Qanachi lapaxauo so l'at nte, qalaxayi saq chaxaguet. Nachi somayipi ipi'itaxano' da ishit da mashi qaltaq jec. Nachi qaltaq jec, qanayicto'ot na loigue yi Creta. 14Qalaxayi co'ollaq qaÿata'ague, nachi lapaxauo so l'at lta'adaic quenaquiaxaic, nachi ÿataqta iuaxanot aso barco. 15Nachi ÿataqta ivida'a da ÿachi. Qaq cha'ayi sa ishit da ñaloxoguet so l'at, nachi sauaxasoqta'a da qomi' ÿachi'. 16Nachi chochi qomi' ividaxattra'ague da laÿi so ÿaqauga 'alhuolec l'enaxat Cauda. Nachi huaña, qaq saqalligueme da chaxaguet so l'at. Huaña, nachi ÿataqta ñaqalligotaqtague' aso secoñidaqtauo qadellicta da sepenaxangui aso qannotaxaqui. 17Qaq can ime da sepenaqshiguem asomayi, nachi somayipi ÿacona so nañic, nachi qoÿaxata'ague na lasot aso barco, da yaqto' i'añaxatta'a't. Qaq can ime, nachi ÿataqta huo'o da ncolanaxa da huo'otaq qotajlec aso da'añaalec l'enaxat da la Sirte. Qaq ÿoqo'oyi qanqajyiñi soua l'at l'ol, nachi qoÿaxaneueegue aso barco da ÿaÿoxonaqchit so l'at. 18Qaq so lÿa na'a'q, cha'ayi ñaq queta som l'at lta'adaic, nachi somayipi ÿasaxauec na lli'ac aso barco, qaÿasaxangui aso auaxai. 19Qaq can mashi ivi' soua tres na'axa'te, nachi sauoqta'ai naua qadhua'q da sasaxasoqtangui na 'etaxat na maichi logoxoshitpi aso barco. 20Qaq mashi qaÿoqteguelo soua na'axa'te da sa ishit da ñauanaxai' aso nala' qataq ana huaqajñipi, qataq souaxat so l'at mayi qomi' ÿaÿoxonaqchitta'pe, nachi mashi imeuo 'enauac da qanaquitaxac da ñica'alaxauec.
21Qaq mashi qaÿoqtegue da sa ishit da sequi'aq, nachi so Pablo nachajñigui na laiñi somayipi, nachi 'enapega, 'eeta':
–Qami' ÿallippi, 'onaxáictoxo' co'ollaxa da aÿim qaualaqaiguet da sa soqolqa'ai yi Creta, da yaqto' sa ishit da ñique'etaxanaxagui de'eda, qataq da huo'o na daqatpi. 22Qalaxayi nagui qami' shinapegalo da qan'añaxachi qome, cha'ayi sa ishit da huo'o ca 'oonolec da qoñiita da ileu, nai'ctoxo' da huo'otaq daqat ana qannotaxaqui. 23Cha'ayi ne'ena pe aÿim nachaxana so chigaqshiguem lamaxashic ñi Dios mayi sooto'ot qataq so'onataxaatacot. 24Qaq somayi aÿim 'eetega, 'eeta': “Sa ishit qome da 'ayi'itac, 'am Pablo, cha'ayi 'am 'anachaateu'a qome ñi nta'a mayi neta'ague da Roma. Qaq souaxat da qoneta, nachi ñi Dios nca'alaxateeguesop qome da l-leuaxa 'enauac nam 'anqotta'ai'pi ana barco.” 25Qaq ÿoqo'oyi qami' ÿallippi, qan'añaxachi qome, cha'ayi aÿim ÿataqta huo'o da ipi'iÿaxac ñi Dios, qataq ÿataqta 'eesa ñaq'en da ipacchigui dam 'enapec so namaxashic piguem l'ec. 26Qalaxayi qomi' saÿoxonaqlec qome aca ÿaqa'ata 'alhuole.
27Nachi huo'o so 'oonolec pe can mashi inoxoodeec soua dos semanas da soqolaqta, qaq ñaq souaqtangui aso auaxai l'enaxat Adriático, chochi qomi' ÿaÿoxonaqchitta'pe so l'at. Qaq can mashi laiñi so pe, nachi so l'opi aso barco noma da mashi sa qaÿapeque ca 'alhua. 28Nachi qanaloqten yi lshicchiguiñi na 'etaxat, nachi mashi ivi' treinta y seis metros. Qaq can qaltaq qanaloqten, nachi mashi ivi' veintisiete metros. 29Nachi ÿataqta huo'o da ncolanaxa da huo'otaq aso barco huo'o ca ÿi'iguenguet na coma'. Huaña, nachi qaÿasaxayiñi soua cuatro lca'chi anam nllañi ana barco. Nachi somayipi ÿataqta huo'o da lcolanaxa, nachi qaiuatta'a da yi'oxoñi. 30Huaña, nachi som ltauapi so l'o aso barco, somayipi huotaique da n'otauec. Qaq ÿoqo'oyi somayipi nachi huotaique da ÿasaxangui so 'etaxat aso l-llicota, qaq chochi datenataxangui da huotaique da ÿasaxayiñi cam nllidañi aso barco na hua'auta. 31Qalaxayi so Pablo icoyiguen som huataxanaq lta'a qataq so nallippi, 'eeta':
–Ne'enapi da huo'otaq sa ishit da netangui ana barco, nachi qami' sa ishit qome da qadca'alliiuec.
32Nachi so huataxanaqpi ichigueec so lquet aso nllicota, nachi tangui qanqoÿin so 'etaxat.
33Qaq so mashi qaÿata'aguet so na'a'q, nachi so Pablo huaqattegoigui 'enauac so laÿipi da yaqto' deque'e, 'eeta':
–Nagui mashi ivi' naua dos semanas da qami' sa ishit da qau'ochi qataq da qauqui'i. 34Qaq ÿoqo'oyi nagui qami' ñachoxonnoiguilo da no'on da qauqui'i. Qami' iuen da qauqui'i, yaqto' ishit da qadca'alliiuec, cha'ayi ÿataqta sa ishit qome da huo'o ca 'oonolec da qoñiita da huo'otaq daqat.
35Qaq co'ollaq 'enapec de'eda so Pablo, nachi ÿacona aso pan, nachi ÿaatacot da n'achic ñi Dios, ÿauaachigui 'enauac somayipi. Ime, nachi ncolaxajñi aso pan, nachi deque'e. 36Ime, nachi 'enauac somayipi huo'o da l'añaxac, nachi nataq'en deque'e. 37Qaq yi lcata 'enauac qomi' mayi sonaqtangui aso barco sovidaq doscientos setenta y seis. 38Qaq can ime da lqui'axac somayipi, nachi na trigo qaÿasaxangui aso auaxai, cha'ayi qaÿauotaique da sa desalli aso barco.
Iyiiñi aso qannotaxaqui
39Qaq can mashi yi'oxoñi, nachi som l'opi aso barco ÿataqta lhuala'a so 'alhua. Qalaxayi qailota'ata aso lallimaqhuo huo'o so l-lagaqa' delec. Nachi qaÿauotaique da huo'otaq ishit da ividau'a qanqoÿin ca loigue aso barco. 40Nachi qaichiguedec soua lque'te soua nllitrañi aso barco, nachi qan'onaxatranguilo aso auaxai, qataq qaisodeec soua lque'te soua nlloctaxanqa'te soua ishit da ÿashaxaatreguiñi aso barco, qataq qaÿaviguishiguem aso l'at l'o mayi hua'auta. Nachi aso barco ishit da nqochiita so loigue. 41Qalaxayi qotajlec som huaña da huo'oi soua dos l'auaxaco. Huaña, nachi aso barco ÿi'igueelec aso delec, nachi nam lqaic ÿataqta llapchiguiñi, nachi sa ishit da dedaÿapigui'. Nachi na nca'ataxaata aso barco ÿataqta colaqtac, souaxat ana lapaxa. 42Nachi so allippi huotaique da ÿalauat na ncoñitaguishicpi, da yaqto' sa ishit da huo'o ca daloxoneec da n'otauec. 43Qalaxayi som lta'a so huataxanaqpi huotaique da nca'alaxateec so Pablo, nachi sa ishit da ÿashinem somayipi da dalaataxan; chaqdata da ÿan da l'aqtac da ca ÿaÿaten da laloxonaxac nachi ishit da hua'auta'ata so 'alhua daloxoota. 44Qaq na laÿipi qalaq ishit da nca'attauo, daloxoolec na qo'ipaq laÿipi, huo'otaq na laÿipi aso barco. Qaq 'eda da 'eetec somayipi da ivida'ata so loigue, 'enauac nca'aleec.
Currently Selected:
Hechos 27: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
