Hechos 25
25
So Pablo qaÿataxanot so Festo
1Nachi so Festo co'ollaq mashi qoÿanagui da nta'a, nachi co'ollaq ivi' soua tres na'axa'te nachi chigoqchiguiña yi Cesarea da taigue da Jerusalén. 2Qaq huaña yimayi, nachi na lataxala'pi na ntaxaÿaxanaxanecpi da qaitaxaÿapegue' ñi Dios qataq na judiopi mayi ÿi'oxodaicpi nachi nachaateu'a somayi da qaiquictapegueu'a so Pablo. 3Nachi qanachoxodeetacot somayi da ishit da nqouac da damaxasoxona so Pablo da qanauega yi Jerusalén. Qaq da lhuennataxac somayipi nshitaique da damaxasoxoolec somayi da qaÿachangui na nqa'aic da qaÿalauat. 4Qalaxayi so Festo i'axat so Pablo da qaicoñittai', neta'ague da Cesarea, qataq somayi nachi lhuennataxa da saqaÿaloq da taigue damayi. 5Nachi 'enapeco':
–Qaq ÿoqo'oyi no'on da na nta'alpi da qoñiita ishit da ñinaicapegue' da saxague da Cesarea, yaqto' que'eca shiÿaxaua da huo'otaq 'eesa da huo'o ca lasouaxashit, nachi ishit da maichi qoicñiÿapec ca qoñiitec.
6Nachi so Festo huac da ivi' naua ocho huo'otaq diez na'axa'te da hueta'a yi Jerusalén. Ime, nachi ÿi'iguelaxague da Cesarea, qaq so lÿa na'a'q nachi nqo'oneu'a aso l'onataxanaxaqui, nachi damaxasoxoneuga so Pablo. 7Nachi co'ollaq nvideuo so Pablo, nachi anac so judiopi mayi chigaqa'ague da Jerusalén. Nachi ÿataqta qalota na qaÿasaxalec lasouaxashitpi somayi, qalaxayi sa ishit da huo'o ca 'en qanqoÿin. 8Nachi so Pablo i'ot da ltaxaÿaxac, 'eeta':
–Aÿim sa ishit da huo'o ca ÿasouaxashit, sa ishit da huo'otaq ñipa'agueetague' na nqataxacpi mayi chigoqo'ot so Moisés, qataq sa ñipa'agueetega añi n'onaxanaxaqui, qataq cam nta'a mayi neta'ague da Roma.
9Qalaxayi so Festo, yi nshitaique da qaica ca da naq'en na judiopi, nachi inat so Pablo, 'eeta':
–¿'Anshitaique peta'a da 'aigue da Jerusalén, da yaqto' hua'ague damayi da 'am ñomit da huo'otaq 'en da huo'o ca 'adasouaxashit?
10Nachi so Pablo 'enapeco':
–Aÿim mashi sootaigui mque' ana l'onataxanaxaqui ca nta'a mayi neta'ague da Roma, qaq namayi nachina na huaña da ishit da aÿim qanmit. Cha'ayi 'am mashi 'auaÿateeta da aÿim qaica ca ÿasouaxashit da huo'otaq huetaigui na judiopi. 11Cha'ayi da ÿoqta 'eesa da huo'o ca ÿasouaxashit mayi naigui ca ñalaataguec, qaq aÿim sa ishit da ñillitac da aÿim qaÿalauat. Qalaxayi da huo'otaq sa ishit da huo'o ca 'en nam aÿim qaÿasaqtapeguelecpi, qaq nataq'en sa ishit da huo'o ca chochi aÿim ÿanoigui namayipi. Qaq ÿoqo'oyi aÿim seÿaxaneu'a da no'on da nachica ca nta'a mayi neta'ague da Roma da aÿim nmit.
12Nachi so Festo co'ollaq ime da detaxaÿapegue' so ltauapi, nachi 'enapego' so Pablo, 'eeta':
–'Am 'auÿaxaneu'a da 'am nmit ca nta'a mayi neta'ague da Roma. Qaq nagui nachica ca 'anqo'ona, da yaqto' 'am nmit.
So Pablo qaÿataxanot so nta'a Agripa
13Qaq co'ollaq mashi qaÿata'aguelo soua na'axa'te, nachi anac so nta'a Agripa qataq aso lhua Berenice da nqo'ooda yi Cesarea da dequinaxaada so Festo. 14Nachi ÿataqta huo'oi soua na'axa'te da huetra'a yimayi, nachi so Festo da'aqtaxaatapeguem so Agripa da 'eetec da huaigui so Pablo, 'eeta':
–Huo'o ñi shiÿaxaua hueta'a ne'ena mayi damaxasoxoolec co'ollaxa so Félix da nachi 'eetai' da qaicoñittai'. 15Qaq can soota'ague da Jerusalén, nachi na lataxala'pi na ntaxaÿaxanaxanecpi qataq nam lquedoxonecpi na judiopi nachi aÿim qaiquictacot da huo'otaq ishit da sashiita da yaqto' qaÿalauat. 16Nachi aÿim sa'aqtaxaatapeguem namayipi da na nta'alpi mayi chigaqa'ague da Roma sa ishit da nai'ac da ÿanguet da nalaataguec ca ncoñitaguishic da huo'otaq saxanaxa da natai'ai' da ncotaÿapegue' cam decoñitaxanpi. 17Qaq ÿoqo'oyi somayipi can anac da naÿa ne'ena, nachi aÿim sa saÿaloxonai' da so lÿa na'a'q nachi sau'a añi i'onataxanaxaqui, nachi samaxasoxoneuga ñi'iñi shiÿaxaua. 18Qalaxayi som nachaateuopi da i'axat na qoÿiitega lasouaxashitpi ñimayi, yi sa ishit da huo'o ca natenguet nam qoÿiitega lasouaxashitpi nam sepettegapi. 19Chaqdata da qancotatapigui dam maichi n'amqajnataxanaxac, qataq cam l'enaxato' Jesús mayi qaÿalauat co'ollaxa, qalaxayi ñi Pablo 'eetega camayi da qaltaq nca'aleec. 20Qaq aÿim yi sa ishit da saÿaten ca sataxaateuga ca 'eeta'am de'eda, nachi senattac ñi'iñi Pablo da huo'otaq nshapeque da taigue da Jerusalén, da yaqto' hua'ague damayi nachi ishit da qanmit damayi. 21Qalaxayi ñimayi maichi iÿaxaneu'a da yaqto' nmit cam nta'a Augusto mayi na'ague da Roma. Nachi aÿim samaxasoxoolec ñimayi da yaqto' nachi 'eetai' da qaicoñitai', maichiyi da ivita da samaxa que'eca nta'a.
22Nachi so nta'a Agripa 'enapego' so Festo, 'eeta':
–Aÿim nataq'en ñishitaique da ñi'axaÿaxana que'eca shiÿaxaua.
Nachi so Festo 'enapeco':
–Qome nte', qaq 'an'axaÿaxana ñimayi.
23Qaq so lÿa na'a'q co'ollaq nvildeuo so Agripa qataq aso Berenice, nachi ÿataqta qalota da lli'oxoyic qanqoÿin, lÿatreuo so huataxanaq lta'alpi qataq nam nta'alpi yim la ciudad da qotaigui aso ntaxaÿaxaqui. Nachi so Festo damaxasoxoneuga so Pablo. 24Nachi 'enapeco':
–'Am nta'a Agripa, qataq 'enauac nam qomi' ÿalectaiguilo, 'eda dam ÿale mayi ÿataqta qalota na judiopi mayi netaña yi Jerusalén qataq nam netaña na Cesarea da dequictapegueu'a. Qaq namayipi ÿataqta aÿim ÿi'iguelaqto'ot da de'eda ÿale sa ishit da nachi 'eetai' da nca'altauec. 25Qalaxayi aÿim sa ishit da sela'a da huo'o ca lasouaxashit da yaqto' naigui ca nalaataguec damayi. Qalaxayi damayi yi maichi iÿaxaneu'a da yaqto' nmit cam nta'a Augusto, qaq aÿim mashi sasateguet damayi, da yaqto' samaq. 26Qalaxayi aÿim ña saqalaataique ca i'aqtac da yaqto' samaxa cam qadta'a mayi neta'ague da Roma, da sa'axat ca lasouaxashit damayi, qaq ÿoqo'oyi damayi qami' ñauegueu'alo. Qaq aÿim ÿataqta 'am salamaxatchigui, 'am nta'a Agripa, da yaqto' 'aunat damayi, yaqto' aÿim qome ishit da huo'o ca shiyiñi i'aqtaxanaxac da samaq. 27Cha'ayi aÿim sela'a da sa ÿaÿamaxañi da chochi samaq ca ncoñitaguishic da huo'otaq sa ishit da shiyiñi ca qoÿiitega lasouaxashit.
Currently Selected:
Hechos 25: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
