Hechos 20
20
Da lliquiaxac so Pablo da taigue da Macedonia qataq da Grecia
1Qaq co'ollaq mashi ime se'eso cotaxac, nachi so Pablo iÿaxanoigui na 'amqajnataxanaxaicpi, da yaqto' ÿanem da lqataxac. Ime, nachi ncoyigueetague' somayipi, nqapaltague', nachi taigue da Macedonia. 2Nachi quetaguilo 'enauaque se'esoua 'ale'u, ÿataqta qalota da l'añaqtaxanaxac da i'añaqchittac na 'amqajnataxanaxaicpi, chochi ivitta'a yi Grecia. 3Huaña yimayi, nachi ivi' tres ca'agoxoiqa da naña. Qaq co'ollaq mashi huotaique da huenoteu'a aso barco da taigue da Siria, nachi somayi l'axaÿaxac da na judiopi ÿauotaique da ÿalauat. Nachi somayi ÿi'iguelaqtegue na llic, tajlec yi Macedonia. 4Nachi nnaictagueto soua Sópatro lma' yi Berea, qataq so Aristarco qataq so Segundo mayi lma't yi Tesalónica, qataq so Gayo mayi lma' yi Derbe, qataq so Timoteo, nataq'en so Tíquico qataq Trófimo mayi chigoqda'ague da 'alhua Asia. 5Nachi se'esoua nqaÿa't hua'a'u, qaq co'ollaq ivilda yi la ciudad Tróade, nachi qomi' iuatapigui. 6Cha'ayi qomi' can ime so na'a'q naponaxaqui mayi huetoigui da qanallic ana pan mayi sa qaÿauo'o ana lalecte, nachi senoxonaxauec, sachigoxosoqchiguiña yi Filipos, senotaxau'a aso barco. Qaq ivi' soua cinco na'axa'te, nachi sovitaxa yi Tróade yim huetra'a soomayi. Huaña yimayi, nachi ivi' soua siete na'axa'te da souaqta'a.
So Pablo hueta'a yi Tróade
7Qaq so l'auaxanec na'a'q naua na'axa'te, nachi huo'o so qalaponaxac, da yaqto' sachiguenaq ana pan. Nachi so Pablo ÿapaxagueetac na 'amqajnataxanaxaicpi. Qaq cha'ayi somayi huotaique da jec so lÿa na'a'q, nachi ÿataqta quetot da l'aqtaxanaxac, chochi ivitta'a da laiñi so pe. 8Qaq se'eso qalaponaxac huashiguemec so pa'atchiguem noÿic, ÿataqta qalota ana coÿadaxanaxaquipi 'ettaigui. 9Qaq huo'o so nsoq, l'enaxat Eutico, somayi nso'ootañi, netaigui so nalloxoc. Qaq cha'ayi so Pablo ÿataqta qaÿoqteec da ltaxaÿaxac, nachi somayi huo'o na l'ochaxa, ivitta'a da ÿataqta lta'adaic na l'ochaxa. Nachi najñi, chigoqotchiguemec so qanayiitashiguema noÿic, nachi qaÿacoosop, cha'ayi ÿoqta ileu. 10Nachi so Pablo huenoteec, nachi nqapaxangue, nachi nsoxouo se'eso nsoq. Nachi 'enapego' so nqaÿañicpi, 'eeta':
–Sa ishit qome da qayi'ii; namayi ña nca'altauec.
11Nachi so Pablo qaltaq ÿi'iguelaxashiguem. Ime, nachi ncolaxajñi aso pan, nachi deque'e. Qataq quetot da l'aqtaxanaxac, chochi ivittalec da yi'oxoñi, nachi jec. 12Qaq so nsoq qaÿauega ca lma', cha'ayi nca'aleec. Nachi 'enauac somayipi ÿataqta machiguiñi.
So Pablo chigoqchiguiña yi Tróade da taigue da Mileto
13Qaq qomi' nachi qaltaq ñoqotaqhua'a aso barco da sa'auaqta'a yi Asón. Qaq huaña yimayi, nachi seuataqa'aguet so Pablo, cha'ayi nachi qadhuennataxa, cha'ayi so Pablo maichi lhuennataxac da petañi. 14Qaq can ñauanaxai' somayi yi Asón, nachi ñoqotaqa'ai' aso barco, nachi saxague da Mitilene. 15Nachi sachigoxosoqchiguiña yimayi da ñoqo'onaxa yi Quío, nachi souaqa'a yi naloteuga. Qaq so lÿa na'a'q, nachi sovitaxa yi ñigaxasom l'enaxat Samos. Nachi qanmataqa' yi Trogilio. Qaq so lÿa na'a'q, nachi sovitaxa yi Mileto. 16Qaq 'eda da 'eetec da qoyiquiaxac, cha'ayi so Pablo nachi lhuennataxac co'ollaxa da sa ishit da ÿoqta hua'a yi Asia, nachi sa ishit da ipagueu'a yi Éfeso. Cha'ayi somayi nshitaique da saqaÿaloq da ividegue da Jerusalén, da yaqto' hueta'a yimayi ca na'a'q Pentecostés, da huo'otaq ishit da ÿañoxot.
Da ltaxaÿaxac so Pablo co'ollaq hueta'a yi Éfeso
17Qaq so Pablo co'ollaq hueta'a yi Mileto, nachi damaxasoxoneu'a na lataxala'pi na 'amqajnataxanaxaicpi mayi netaña yi Éfeso. 18Qaq co'ollaq mashi lapoota'a't, nachi 'enapego', 'eeta':
–Qami' qauaÿajñi da 'eetec da ÿataxac chigoqchiguiña so l'auaxanec na'a'q co'ollaq chita'ague da ñiviteu'a na Asia. 19Qaq 'enauaque se'esoua na'axa'te da qami' soota'agueta da so'onataxaatacot so qadataxala', qalaq qaica da ñapagaqchiitac. Nda'a't da qalota da ñineenaxac, qataq qalota na ñi'iguenataguecpi mayi aÿim i'otec na judiopi. 20Qalaxayi aÿim sa ishit da saxaañi da qami' sa'axattapeguema 'enauac nam qami' i'oteque ca ÿaÿamaqchiguiñi, qaq qami' sapaxagueeta'pe da huo'o na naponaxac qataq da huañalo naua qadma'chilli'. 21Qaq 'enauac nam judiopi qataq nam sa ishit da judiopi shiitega da ca'aisalo naua n'onataxaco, nachi quegue ñi Dios, qataq i'amaqten so qadataxala' Jesucristo. 22Qaq nagui aÿim saigue da Jerusalén, cha'ayi aÿim ÿauec so Espíritu Santo. Qaq aÿim sa ishit da saÿaten ca 'eetec ca souaigui qom sovi'. 23Cha'ayi chaqdata da saÿaten da huo'otaq huo'o yi sovita nam la ciudatpi mayi sovida'a, nachi so Espíritu Santo aÿim da'aqtaxaatapeguem da huo'o qome ca ñicoñitaguec, qataq ÿataqta qalota da ñique'ejnaxac. 24Qalaxayi 'enauac namayipi qaica ca soqocha'a, ivida'a da maichi ñachaalataxac 'eeta'am ñaq'en da qaica ca naigui. Chaqdata da ñishitaique da samachiguiñi qom sematta da ñamaxasaguec qataq da sepaquejlec dam i'onataxanaxac mayi aÿim ÿami' so qadataxala' Jesús, da yaqto' sa'axat da no'on qad'axaÿaxac mayi lqouagaxanaqtaic ñi Dios.
25Qaq nagui yi'oqta da 'enauac da qoñiita nam sa'aqtaxaatapeguem co'ollaxa da l'onataxanaxac ñi Dios da ilo'ogue 'enauacna, da nachi tachiguiña nagui da aÿim sa nauane'. 26Qaq ÿoqo'oyi nagui qami' sa'aqtaxanema da qaica ca ÿasouaqtac da qoñiita. 27Cha'ayi aÿim ÿataqta sa'axatta 'enauac nam 'eetapeguecpi ñi Dios, qaica ca soxottapiguiñi. 28Qaq ÿoqo'oyi ñi 'oonolec da qoñiita ÿataqta ntel-la't qome, qataq nataq'en qadchilliÿa'a qome 'enauac na 'amqajnataxanaxaicpi mayi qami' ipataxagueta so Espíritu Santo da yaqto' qauloÿigue. Namayipi maichi lalamaxatpi so qadataxala', lshijnaxanaxatpi, lashiue soua maichi ltago'q co'ollaq qaÿalauat. 29Cha'ayi aÿim saÿateeta da qom shica'ai ne'ena, nachi huo'o qome ca lÿa anac da huotaique da nlaxajñi na 'amqajnataxanaxaicpi, 'eeta'am da 'eetec ca dequi'iÿapec da detoxongui ana qaguetapi. 30Qataq da qoñiita huo'o qome ca maichi qami' chigoqchiguinguilo, nachi dapaxaguenataxanec na chochi ashipegaxanaxac, qaq sa ishit da i'axat cam ÿoqta 'eesa, cha'ayi nshitaique da na 'amqajnataxanaxaicpi quegue camayi. 31Qaq maxatchaxa qome, qanloishiguem, qauennachiÿo' qome soua tres vi'iyi, da ica'n naua na'axa'te qataq naua pe' da qami' saqattegalo, ñoÿiitalec ñi 'oonolec da qoñiita.
32Qaq nagui qami' ÿaqaÿa't, qami' sepataxagueta da ltelaxa ñi Dios qataq dam n'aqtaguec da lchoxonnataxanaxa mayi ÿataqta huo'o da l'añaxac, da yaqto' qami' 'añaxaiqa naq'en, qataq da yaqto' qauacoñiiguet cam ÿaqataxaatapigui' da ÿami' ñi Dios 'enauac nam lalamaxatpi. 33Aÿim sa ishit da chochi ñaquitta'a co'ollaxa aca alom huo'otaq ca logoxot ca camachicague't shiÿaxaua. 34Chaqdata da qami' qauaÿajñiita da aÿim ÿataqta so'onataxaatac, da yaqto' ñauec cam seueetac qataq naua iÿa't. 35Qaq nachi 'eetai' da qami' sapaxagueetapegueeque de'eda, da ca shiÿaxaua do'onataxan, yaqto' ishit da itauan cam huo'o da lhuenaxanaxa. Qaq ñitounaqta'ac qome da l'aqtac co'ollaxa so qadataxala', mayi 'eeta': “Ÿataqta machiguiñi ca shiÿaxaua qom dachitaqtaxan, qaq saq 'en'am cam chochi qaÿachit.”
36Qaq co'ollaq ime da ltaxaÿaxac so Pablo, nachi i'alyiñi naua l-llicte da nqouagaxaunaxaua 'enauac somayipi. 37Nachi 'enauac somayipi noÿiitagui, nachi qanqapaltapegue' somayi, qataq qanapigoq. 38Nachi somayipi ÿataqta daquico, cha'ayi so Pablo 'enapec yi nachi tachiguiña da sa ishit da qaltaq qanauane'. Ime, nachi qannaicapegue', qaividaxattauga aso barco.
Currently Selected:
Hechos 20: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
