Hechos 16

So Timoteo lÿata'pe so Pablo qataq so Silas

1So Pablo qataq so Silas ivitra yi pueblo l'enaxat Derbe qataq yi Listra. Qaq huaña yimayi, nachi nateedalec so 'amqajnataxanaxaic l'enaxat Timoteo. Somayi llalec aso judío lashi 'amqajnataxanaxai, qaq so lta'a qalaxayi griego l'ec. 2Qaq so nqaÿañicpi mayi netaña yi Listra qataq yi Iconio ÿataqta no'on naq'en da n'aqtaguec somayi. 3Nachi so Pablo ÿauotaique da lÿatac so Timoteo. Nachi i'auaxaañi da qaÿauo'o naq'en so n'anaxashit na l'oc, cha'ayi nshitaique da na judiopi mayi netañalo se'esoua 'ale'u ishit da ÿaÿamaxadeeta somayi, cha'ayi 'enauac qaÿaÿaten da so lta'a griego l'ec. 4Nachi 'enauac nam pueblopi mayi tajdelec, da'aqtaxaatrapeguem dam lqataxa'c soua Jesús lamaxa'shi qataq soua lÿa't nataxala'te mayi netraña yi Jerusalén. 5Huaña, nachi na 'amqajnataxanaxaicpi ÿataqta huo'o da l'añaxac da lpi'iÿaxac, nachi naua na'axa'tesa'chi ÿataqta nquictauec yi lcata na da'amqajnataxan.

Da lauanaqchic so Pablo co'ollaq ila'a so shiÿaxaua naña yi Macedonia

6Qaq so Espíritu Santo sa ÿashinema soomayi da i'axa't da n'aqtac yi 'alhua l'enaxat Asia. Qaq ÿoqo'oyi soomayi napactralec yi 'alhua Frigia qataq yi Galacia, 7chochi ivittra'a ca loga't yi 'alhua l'enaxat Misia. Huaña, nachi nshitaique da inoxoodeu'a yi 'alhua l'enaxat Bitinia, qalaxayi so Espíritu Santo mayi chigoqo'ot so Jesús sa ishit da ÿashinema soomayi da nqo'oodeu'a. 8Nachi soomayi napactralec yi 'alhua Misia, nachi nachiyiña yi ñigaxasom l'enaxat Tróade. 9Qaq huaña yimayi, nachi so Pablo huo'o so lauanaqchic se'eso pe: iloto'o' so shiÿaxaua mayi naña yi 'alhua Macedonia. Somayi nachattañi, nachi nachoxodeetacot somayi, 'eeta': “Ña 'ananaita qome na Macedonia, qomi' 'autaua'n.” 10Qaq co'ollaq chochi huo'o da lauanaqchic so Pablo, nachi qomi' ñaÿamaxataq da saxatague da Macedonia. Cha'ayi ÿoqta da 'eesa da nachiñi ñi Dios ñi qomi' nÿaxaategalo, da yaqto' sa'axataxam camayipi dam no'on qad'axaÿaxac.

So Pablo qataq so Silas huetra'a yi Filipos

11Nachi senotaxauo, sachigoxosoqchiguiña yi Tróade, salamaxataqchigui yi 'alhuolec l'enaxat da Samotracia. Qaq so lÿa na'a'q nachi sovitaxa yi ñigaxasom Neápolis. 12Qaq huaña yimayi, nachi saxague da Filipos. Qaq ÿataqta ndochiguiñi na chigaqa'ague da Roma na netalec da ilotague' yimayi, qaq nachiyi yim la ciudad mayi ÿataqta ÿi'oxodaic yim 'alhua Macedonia. Huaña yimayi, nachi ÿataqta huo'oi soua na'axa'te da souaqta'a. 13Qaq huo'o so na'a'q mataxaqui, nachi saxaueegue da laÿi yi la ciudad, ñoqo'onaqaama so loigue so tala yim huaña naxa da qai'ot da nqouagaxaunaxac. Huaña, nachi ñiso'onaqtañi, nachi sa'axataqtapeguem da n'aqtac na 'alpi mayi lapoota'a't. 14Qaq huo'o aso 'oonole 'alo, l'enaxat Lidia, chigaqa'ague co'ollaxa da la ciudad Tiatira. Qaq asomayi imeetac ana ÿataqta no'on npotoyic nauedalec na ltogaxa. Asá'aso 'alo nachi 'eetai' da quetague' ñi Dios. Nachi asomayi n'axaÿaxaatac, nachi so qadataxala' ÿauatoigui da lquiyaqteÿaxac da yaqto' ÿaconguet dam i'axattac so Pablo. 15Ime, nachi asomayi qanachilaxan, nataq'en 'enauac so llalaqpi. Qaq co'ollaq ime, nachi asomayi qomi' nachoxonnoto, 'eeta':

–Qami' qom ÿoqta 'eesa da qauauattoñi da aÿim sa'amaqten so qadataxala', qaq no'on da qanqo'oñiÿa yi ima' da qad'ochaqa'ai.

Nachi asomayi ÿataqta qomi' 'enapegalo da ñi'onaqaña so lma'.

16Qaq can qomi' qaltaq ñoqo'onaxauga som qouagaxaunaqa', nachi ñatenaqa'aguet aso qa'añole nlata mayi huo'o so l'ec leguemaxaic mayi ishit da ilaviigui ca lÿa. Qaq asomayi ÿataqta qalota naq'en añi laueque so n'aco'pi, chochi qaÿauegaxaatapigui da ilaviigui ca lÿa. 17Qaq asa'aso qa'añole nachi ca'attapiguiñi' so Pablo, nataq'en qomi'. Nachi i'alaqtai', 'eeta':

–Ne'enaua shiÿaxa'u, naamayi do'onataxaatacoto ñim Dios mayi 'amaqtaqaic, qaq naamayi qami' i'axattapeguema da llic da nca'alaxa.

18Qaq ÿataqta huo'oi soua na'axa'te da nachi 'eeta'ac de'eda. Qaq chochi ivitta'a da ÿataqta sa ÿaÿamaxaden so Pablo. Nachi somayi ÿi'iguelaxaguet asomayi, nachi 'enapego' som n'ec mayi netaigui asomayi, 'eeta':

–'Am sedolec da l'enaxat so Jesucristo da qoca'ai ana'ana qa'añole.

Nachi som n'ec ca'ai asomayi.

19Qalaxayi so n'aco'pi aso qa'añole co'ollaq ila'a da mashi qaica som dauegaxaatapigui n'onataxac asomayi, nachi qaÿaconeu'a so Pablo qataq so Silas, nachi qaÿauegueu'a ca ltaxaÿaqa' so nta'alpi mayi huangui na laiñi so la ciudad. 20Nachi qaÿataxanoto soua nta'al mayi nmi't na nasouaxashitpi, nachi qoÿinapeco':

–Ne'enaua shiÿaxa'u, naamayi judío lashi'. Qalaq naamayi ÿataqta sa ÿalemaxa't na shiÿaxauapi na qadma', 21qataq dapaxaguenataxaatrapeguec na 'onataxacpi mayi qomi' sa ishit da saconaxaguet da so'otaq, cha'ayi qomi' romano lashi'.

22Nachi na shiÿaxauapi ÿataqta npa'aguenalo soomayi, nachi soua nta'al damaxasoxoolec da qanqa't naua alogo soomayi, nachi qaiuaxa'n, qaidota'alo na nhuaxanaxanaxat qo'ipaq. 23Qaq co'ollaq mashi qalota da nhuaxanague'c, nachi qaÿamaxadoigui aca ncoñitaxanaxaqui. Nachi qoÿinapega som ilotague' aso ncoñitaxanaxaqui da ÿataqta ilo'oguelo. 24Nachi se'eso ilotague' aso ncoñitaxanaxaqui co'ollaq huo'o da n'aqtac, nachi ÿanau'alo ca ÿataqta pa'auo aso ncoñitaxanaxaqui soomayi, nachi ÿanaguilo naua lapia'te ca ncoñitaxaqui' 'ipaq.

25Qalaxayi co'ollaq mashi laiñi na pe, nachi so Pablo qataq so Silas, soomayi nqouagaxaueeta'pe qataq do'onaxaata'pe, ÿi'oxodeetrac ñi Dios. Nachi som laÿipi ncoñitaguishicpi n'axaÿaxaategalo soomayi. 26Nachi nque'elaxatta da huo'o so nacholaxanaxa, nachi ÿataqta ÿacholaxanapec aso ncoñitaxanaxaqui, ivida'a naq'en na pa'aguiñi. Huaña, nachi maichi nauatoiguilo naua laso'mi, qataq maichi huesodeec naua lque'te na ncoñitaguishicpi. 27Nachi som ilotague' aso ncoñitaxanaxaqui nlouec. Qaq co'ollaq ila'a da nauattaigui 'enauac nam lasompi aso ncoñitaxanaxaqui, nachi somayi nqatshiguem so lainec da huotaique da maichi nalajla't, cha'ayi ipi'itaxano' da so ncoñitaguishicpi n'otauec. 28Qalaxayi so Pablo i'alaxalec somayi, 'eeta':

–Sa ishit da maichi 'analajla't, cha'ayi qomi' 'enauac ñaloqta't.

29Nachi som ilotague' aso ncoñitaxanaxaqui iÿaxanaique aso coÿadaxanaxaqui, nachi ÿataqta nqalgoqta da tau'a so pa'auo, ÿataqta iviloxolaqchit da lcolanaxa. Nachi i'adoto na l-llicte so Pablo qataq so Silas. 30Ime, nachi nqatreec soomayi, nachi inatta'pe, 'eeta':

–Qami' ÿaqaÿa't, ¿chaq huá'ague ca shiitec, da yaqto' aÿim qanca'alaxateec?

31Nachi soomayi 'ena'po':

–Qomyi 'au'amaqten so qadataxala' Jesucristo, yaqto' 'am 'anca'aleec, qataq 'enauac ca 'ai'alaqpi.

32Nachi qai'aqtaxaatapeguem somayi da l'aqtac ñi Dios qataq 'enauac som netañapi so lma'. 33Qaq nachiso se'eso pe da so ilotague' aso ncoñitaxanaxaqui iÿota'pe naua nhuaxanqa soomayi. Ime, nachi somayi qataq 'enauac so llalaqpi qanachilaxan. 34Qaq co'ollaq ime, nachi ÿauegueu'alo soomayi ca lma', nachi iqui'axaata'pe. Nachi somayi nataq'en so llalaqpi ÿataqta machiguiñi, souaxat da i'amaqten ñi Dios.

35Qaq so lÿa na'a'q nachi soua nta'al ÿamaxa so huataxanaqpi som ilotague' aso ncoñitaxanaxaqui, da yaqto' 'enapega da isodeec soomayi. 36Nachi so ncoñitaxanaxaqui l'o 'enapego' so Pablo, 'eeta':

–Huo'o da l'aqtac nam nta'alpi, da yaqto' aÿim qami' saxaadeec. Qaq ÿoqo'oyi nagui qami' ishit da qaunoxoñiiuec, qaica ca qami' idaxaatapigui'salo.

37Qalaxayi so Pablo 'enapego' so huataxanaqpi, 'eeta':

–Qomi' maichi qomi' romano lashi'. Qalaq qomi' qauaxañiita'pe, 'enauac qomi' qaÿauaachiguilo, qamaq saxanaxa da qaÿaÿaten ca qadasouaxashit. Qataq qomi' qaÿamaxaiguilo añi ncoñitaxanaxaqui, qaq ¿nagui, qalaq qanshiitaico' da chochi qomi' qai'oxochiitrañi da qomi' qausoideec? ¡'A'i, sa ishit! No'on da npacai' camayipi, da yaqto' qomi' nqatreec.

38Nachi soua huataxanaq lashi' i'axatema so nta'alpi da l'aqta'c soomayi. Nachi somayipi co'ollaq ÿaÿaten de'eda, nachi ÿataqta ñi'i, cha'ayi qaÿaÿaten da romano lashi' soomayi. 39Nachi somayipi anac, nachi nmaatacoto so Pablo qataq so Silas. Ime, nachi nqatreec soomayi, nachi nachoxodeetacoto, da yaqto' soomayi queda'ai yi la ciudad. 40Nachi soomayi co'ollaq queda'ai aso ncoñitaxanaxaqui, nachi nqo'oodeuga ca lma' aso Lidia. Qaq co'ollaq ima't da nauaneto na nqaÿañicpi qataq da i'añaqchittrac, nachi soomayi je'c.

Currently Selected:

Hechos 16: TBSNT

Highlight

Copy

Compare