Hechos 12
12
Da nalaataguec so Santiago qataq da ncoñitaguec so Pedro
1Qaq se'esoua na'axa'te nachi so nta'a Herodes damaxasoxoolec da huo'o na qaicanapec na 'amqajnataxanaxaicpi. 2Nachi damaxasoxoolec da qaÿalauat so Santiago som lqaÿa so Juan, qaidolec ca ÿiilonec. 3Qaq somayi co'ollaq ila'a da na judiopi ÿataqta ÿaÿamaxadeeta de'eda, nachi nataq'en damaxasoxoolec da qaicoñi' so Pedro. Qaq de'eda nachi huetoiguilo soua na'axa'te da qanallic ana pan mayi sa qaÿauo'o ana lalecte. 4Qaq co'ollaq mashi qaÿaconeu'a so Pedro, nachi so Herodes ÿanaigui somayi aso ncoñitaxanaxaqui. Nachi nauaatalec naq'en so dieciseis huataxanaqpi, cuatro naq'en naua huaxaÿapega't, cha'ayi somayi ÿauotaique da qom ime so naponaxac, nachi nqateec so Pedro da ÿachaxana 'enauac na shiÿaxauapi da ÿalauat. 5Qaq ÿoqo'oyi so Pedro netaigui aso ncoñitaxanaxaqui, ÿataqta qanauaatalec. Qalaxayi na 'amqajnataxanaxaicpi ÿataqta huo'o da l'añaxac da queto'ot da nqouagaxaueetacot ñi Dios, da nqouagaxaueetapeguelec somayi.
Ñi Dios nca'alaxateeguesop aso ncoñitaxanaxaqui so Pedro
6Qaq se'eso pe mayi huetoigui so lÿa na'a'q da so Herodes nqateec so Pedro da ÿachaxana na shiÿaxauapi. Nachi so Pedro do'ochito', huetanguilo soua dos huataxanaq lashi', qaicoñitta'aque soua dos lque'te, qaq soua lÿa't huataxanaq lashi' nauaata'pe so lasom aso ncoñitaxanaxaqui. 7Nachi nque'elaxatta da nachatteuo so piguem l'ec lamaxashic ñi qadataxala', nachi ÿataqta yi'oqchiguiñi na pa'auo aso ncoñitaxanaxaqui. Nachi som namaxashic i'adeu'a na laÿi so Pedro da nqotoxon. Nachi 'enapego', 'eeta':
–Qoñishiguem, 'anque'emgue.
Nachi soua lque'te naua lhua'q so Pedro ñideec. 8Nachi so namaxashic 'enapego' somayi, 'eeta':
–'Ansauat qome, nachi 'ai'aayiñi caua 'adapela'te.
Nachi so Pedro naÿamaxat, nachi so namaxashic 'enapego' somayi, 'eeta':
–'Anapogoña na 'adpo', nachi aÿim 'auca'ategue.
9Nachi so Pedro huenoxoneec, ca'atteueegue so namaxashic. Qalaxayi sa ÿaÿaten da ÿoqta 'eesa de'eda, huo'otaq saq 'en. Cha'ayi somayi 'eeta'am naq'en da huo'otaq chochi lauanaqchic de'eda. 10Qalaxayi co'ollaq napacdalec caua hua'auchiyiñi nauanaxanaxanqa qataq jec napactalguete caua lÿa't, chochi ivittrauga so lasom mayi ima'a't lcat mayi pa'aiguet so nqa'aic. Nachi se'eso lasom maichi nauatoigui, nachi inoxoodeec, nachi je'c. Qaq co'ollaq napacdalec ca 'oonolec nqa'aic, nachi so namaxashic piguem l'ec ca'ai somayi da ndoqteeteec. 11Huaña, nachi so Pedro chita'ague da ÿoqta i'amaqten de'eda. Nachi 'enapeco':
–Nagui saÿaten da qachi ÿoqta 'eesa de'eda, da ñi qadataxala' namaq so lamaxashic da aÿim nca'alaxateeguesop ñi Herodes qataq 'enauac dam nshitaique da aÿim i'otec nam judiopi.
12Qaq tatapigui lauel de'eda so Pedro, nachi nqo'ona ca lma' aso María mayi late'e so Juan, da lÿa l'enaxat Marcos. Qaq somayi nachi hueta'a so qalota shiÿaxauapi lapoota'a't, nqouagaxaueetac. 13Qaq somayi co'ollaq iuaxaatapegueu'a so lasom som qasoxoc, nachi huo'o aso qa'añole, l'enaxat Rode, npa'auga da chochi nalliuga. 14Nachi co'ollaq ÿauatto'n naua l'aqtaqa so Pedro, nachi sa ishit da ÿauatoigui so lasom, cha'ayi ÿapac da ntonaxac. Nachi nqalgaqhua'a ca pa'auo da decoyiguenataxanec so Pedro da hueta'a so lasom. 15Nachi qoÿiitego' asomayi, qoÿiita':
–¡Ÿoqta huo'o da 'oic peta'a!
Qalaxayi asomayi ÿoqta 'eesa naq'en da nachiso. Qalaxayi somayipi 'enapeco':
–¡'A'i, sa ishit da nachida; souaxai' chochi lqui'i da nachaxan!
16Qalaxayi so Pedro lamaaxa iuaxaatapegueu'a so lasom. Qaq co'ollaq qaÿauatoigui so lasom, nachi qailauga somayi, nachi ÿataqta ñi'i somayipi. 17Qalaxayi somayi ÿauota'a na lhuaq da nhuogaxa somayipi da de'enaxaatai'. Ime, nachi i'axat da 'eetec ñi qadataxala' da nqateeguesop somayi añi ncoñitaxanaxaqui. Ime, nachi 'enapego' somayipi, 'eeta':
–Qau'axachiim qome 'enauac de'eda ca Santiago qataq 'enauac na qadqaÿañicpi.
Ime, nachi somayi jec da taÿa ca lÿa 'alhua.
18Qaq co'ollaq mashi yi'oxoñi, nachi ÿataqta sa ÿaÿaten ca 'eetec som huataxanaqpi, cha'ayi sa qaÿaÿaten ca 'eetec so Pedro. 19Nachi so Herodes damaxasoxoolec da qanmitaique somayi. Qaq co'ollaq sa ishit da qaÿanata, nachi ichimaxattega som huataxanaqpi mayi ilotague' somayi. Ime, nachi damaxasoxoolec 'enauac somayipi da qaÿalauat. Qaq co'ollaq ime de'eda, nachi so Herodes ca'ai yi Judea da taÿa yi Cesarea.
Da l-leuaxa so Herodes
20Qaq so Herodes ÿataqta dalemataÿa nam shiÿaxauapi mayi netaña yi Tiro qataq yi Sidón. Qalaxayi somayipi co'ollaxa huaxaÿa't da qaÿauotaique qanqo'oneu'a somayi da qaitaxaÿapegue'. Qalaxayi qai'auaxaañi da qaitaxaÿapegue' so Blasto som nta'a lta'adaic mayi ltaua so Herodes, da yaqto' somayi detaxaÿapegue' so nta'a, da yaqto' ÿanem da l-lagaxayic somayipi. Cha'ayi somayipi da lqui'axac nachi ÿachigoxottapiguiña yim n'alhua so nta'a. 21Nachi so Herodes ÿauo'o so na'a'q mayi laloqnec da anac naq'en so shiÿaxauapi. Qaq co'ollaq ivita se'eso na'a'q, nachi somayi ÿaayiñi soua alogo mayi lalegaxaqui', nachi nso'oongui aso nso'onaxaqui da nta'a, nachi ÿauo'o so ltaxaÿaxac. 22Nachi na shiÿaxauapi i'alaqtagui, 'eeta':
–¡Ñi'iñi shiÿaxaua mayi detaqtac sa ishit da chochi shiÿaxaua, ñimayi 'eeta'am na saq cha'a ntaxaÿaxaua!
23Lcopata, nachi anac so lamaxashic piguem l'ec ñi qadataxala', nachi dalola naq'en so Herodes, cha'ayi somayi sa ishit da ÿi'oxoden ñi Dios. Nachi anac na qochi'l, chic, chochi ivitta'a da ileu.
24Qalaxayi da l'aqtac ñi Dios lamaaxa nqochiitauec qataq qai'axattac 'enauaque naua laÿil ana 'alhua.
25Qaq so Bernabé qataq so Saulo co'ollaq ima't da l'onataxanaxa'c, nachi ÿi'iguela'q, chigoqchiguiña yi Jerusalén. Qaq qannaictague' so Juan, da lÿa l'enaxat Marcos.
Currently Selected:
Hechos 12: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
