Hechos 10

So Pedro qataq so Cornelio

1Qaq yim la ciudad Cesarea nachi netaña so shiÿaxaua, l'enaxat Cornelio. Somayi lta'a na huataxanaq, nachi ilotague' som cien huataxanaqpi mayi qaÿamata'ac chigaqa'ague da Italia. 2Qaq se'eso shiÿaxaua qataq 'enauac so llalaqpi quetague' ñi Dios qataq ÿataqta ñi'iÿa ñimayi. Somayi nataq'en ÿataqta qalota añi ÿaneec alom da itauaatac na judiopi qataq nachi 'eetai' da nqouagaxaueetacot ñi Dios. 3Qaq huo'o so na'a'q mashi dashichiguiñi aso nala', nachi somayi huo'o so lauanaqchic: ila'aguet so namaxashic piguem l'ec da taÿau'a ca hueta'a somayi, nachi 'enapego', 'eeta': ¡Cornelio!

4Nachi somayi ÿamato'ot se'eso namaxashic piguem l'ec, qalaxayi ÿataqta ñi'i. Nachi inattac, 'eeta':

–¿Négue't ca, 'am ÿataxala'?

Nachi som namaxashic piguem l'ec 'enapego' somayi, 'eeta':

–Ñi Dios ÿataqta ÿaÿamaxadeeta da 'anqouagaxaunaxac qataq dam 'adtaunaxanaxac da 'autauaatac nam huo'o da lhuenaxanaxa. 5Qaq huo'oi qome caua 'adamaxa'shi da tadegue da la ciudad Jope, da yaqto' ÿi'igueeda'a ñi l'enaxat Simón, da lÿa l'enaxat Pedro. 6Ñimayi netaña yi lma' ñi l'enaqteua Simón, l'oc l'o, yi lma' neto'ot so loigue aso auaxai. Qaq ñimayi qome 'am i'axatem ca llic cam 'au'ot.

7Qaq co'ollaq jec so namaxashic piguem l'ec mayi da'aqtaxaatac, nachi so Cornelio iÿaxaneugalo soua dos soua lamaxa'shi qataq so 'oonolec huataxanaq l'ec mayi nataq'en quetague' ñi Dios qataq ÿataqta lpe'et. 8Nachi ÿataqta da'aqtaxaatem somayi 'enauac dam lauanaqchic. Ime, nachi ÿamaxadegue da Jope.

9Nachi so lÿa na'a'q co'ollaq mashi quete' soomayi. Qaq mashi qanayiitau'a so la ciudad Jope, nachi so Pedro tashiguemo' ca noÿic l-laq da nqouagaxauen. Qaq mashi yaqta'a da na'a'q laiñi se'eso na'a'q. 10Nachi somayi ÿataqta huo'o na lqouaxa, nachi huo'o da lyaxa da deque'e. Qalaxayi ña qai'ottac so aloq, nachi somayi huo'o so lauanaqchic. 11Ila'a na piguem da 'eeta'am da qanauatoigui, nachi ÿauaateguet so 'eeta'am na hualoq laÿi lta'adaic qoÿaxatta'a't naua cuatro ltela da naÿaña ana 'alhua. 12Qaq somayi nachi huetagui 'enauac na ÿotta'a't shiguiÿacpi: huo'o na cuatro naua lapia'te, qataq na hualectapigui', qataq na maÿopi. 13Nachi somayi hua'axaÿa so n'aqtac 'eeta':

–Pedro, 'anachajñi, 'auauo'o ca 'aualauat ne'enapi, nachi qollic.

14Nachi so Pedro 'enapeco':

–'A'i, 'am ÿataxala', aÿim ÿataqta sa ÿauanaga da sachic ca qaÿamata'ac nshipaxan, huo'otaq cam sa qaishitapec da qanallic.

15Qalaxayi se'eso n'aqtac qataq ÿi'iguelaxalec da 'enapec, 'eeta':

–Cam mashi qui'itta naq'en ñi Dios, camayi sa ishit da 'auamata'ac da nshipaxan.

16Qaq se'eso n'aqtac tres da qaÿi'iguelaxalec, nachi se'eso qoÿaxatta'a't qaltaq ÿi'iguelaxague da piguem. 17Qaq co'ollaq ña deuennataxaatac so Pedro da chaq 'eetec ca naigui se'eso lauanaqchic, nachi mashi nvildeu'a so lasom soua shiÿaxa'u mayi lamaxa'shi so Cornelio mayi denataxaatraique ca lma' ca Simón mayi l'oc l'o. 18Qaq co'ollaq nvildeuo, nachi ÿataqta ala'm naq'en naua l'aqtaqa da qainataxaatapeguec da huo'otaq hueta'a se'eso nma' ca l'enaxat Simón, da lÿa l'enaxat Pedro. 19Qaq so Pedro ñaq iuennatapega som lauanaqchic, nachi so Espíritu Santo 'enapego' somayi, 'eeta':

–Huo'oi daua tres shiÿaxa'u 'am nmittapigui. 20Qoñishiguem qome, 'aunoteec, nachi qoqueguelo daamayi. Sa ishit da huo'o ca 'ictega, cha'ayi daamayi maichi ÿamaxa'shi.

21Nachi so Pedro huenojña ca huetra'a soua lamaxa'shi so Cornelio, nachi 'enapegalo, 'eeta':

–Nachaÿim mayi aÿim qanmichiitaique. ¿Négue't ca huo'o mshi qauanaqui?

22Nachi soomayi 'ena'po':

–Qomi' lamaxa'shi ñi huataxanaq lta'a, l'enaxat Cornelio. Ñimayi no'on da lataxac qataq ÿataqta ñi'iÿa ñi Dios. Ÿoqo'oyi 'enauac na judiopi ÿataqta huo'o naq 'enec naq'en qataq lauotaxat. Qaq huo'o so chigaqshiguem Dios lamaxashic 'enapega da 'am namaxasoxona, da yaqto' 'anqo'ona yi lma', nachi ñimayi ishit da n'axaÿaxana cam 'ad'aqtaxanaxac.

23Nachi so Pedro ipa'axaadeuo, nachi soomayi l'ochaqa't ca hueta'a somayi se'eso pe. Qaq so lÿa na'a'q nachi so Pedro ca'ateguelo soomayi, nataq'en huo'oi soua lÿata'pe nam 'amqajnataxanaxaicpi mayi netaña yi Jope.

24Qaq so lÿa na'a'q nachi qaivita yi Cesarea yim netaña so Cornelio deuataxaatac, qataq 'enauac som lauo' l'ecpi ÿalecta'aguet, qataq 'enauac nam nauochaxauapi mayi icoyiguen co'ollaxa. 25Qaq so Pedro co'ollaq iviteu'a ca noÿic, nachi so Cornelio nqo'onguet somayi, nachi i'adoto naua l-llicte da huotaique da natamnot. 26Qalaxayi so Pedro ÿanaxanaxaashiguem somayi, nachi 'eetega, 'eeta':

–'Anachajñi qome, cha'ayi aÿim nachi'am shiita'am, qomi' shiÿaxa'u.

27Nachi n'aqtaxaatapegue' somayi, nachi so Pedro pa'auo, nachi ilalec som ÿataqta qalota shiÿaxauapi mayi lapoota'a't. 28Nachi so Pedro 'enapego' somayipi, 'eeta':

–Qami' qauaÿajñi da na judío l'ecpi ÿasouaxat da l'amqajnataxanaxac, nachi ÿataqta sa qaÿashinguet da ÿaleeguet ca sa lauo' l'ec, huo'otaq da chochi pa'aigui ca lauo' camayi. Qalaxayi ñi Dios aÿim ÿapaxaguenec da sa ishit da huo'o ca samata'ac da nshipaxan, huo'otaq sa qaishiteguet. 29Qaq ÿoqo'oyi ÿataqta qaica ca shiga da ñanac co'ollaq aÿim qauÿaxañiÿa. Qaq ÿoqo'oyi nagui aÿim ñishitaique da saÿaten da chaq 'eetec ca huo'o mshi aÿim qauÿaxañiÿa.

30Nachi so Cornelio 'enapeco':

–Nagui mashi ivi' naua cuatro na'axa'te da 'eeta'am peta'a nagui yi ñichiguiña aso nala' co'ollaq aÿim soota'a na ima', ñoqouaqchittac qataq ñoqouagaxaueetac. Nachi aÿim nachaxana so shiÿaxaua soua alogo ÿataqta qashilectrapiguiñi. 31Nachi somayi aÿim 'enapega, 'eeta': “Cornelio, ñi Dios mashi hua'aqtega da 'anqouagaxaunaxac, qataq iuennate dam 'adtaunaxanaxac da 'autauaatac nam huo'o da lhuenaxanaxa. 32Qaq nagui 'auauo'o qome ca 'auamaxa yi la ciudad Jope, da yaqto' ÿi'iguena'a ñi Simón, da lÿa l'enaxat Pedro. Ñimayi hueta'a yi lma' ñi l'enaqteua Simón, l'oc l'o. Ñimayi neto'ot so loigue aso auaxai yi lma'. Qaq ñimayi qom noviyi', nachi 'am da'aqtaxanem.” 33Qaq ÿoqo'oyi ÿataqta sa saÿaloxonai' da 'am samaxasoxona. Qaq nagui no'on, cha'ayi mashi 'anoviyi'. Qaq nagui qomi' souaqta'a ne'ena, sataqtau'a ca Dios, cha'ayi sauoqtaique da qomi' ñi'axaÿaxanaxa 'enauac cam 'am ÿamaxalec ñi qadataxala' da qomi' 'au'axatema.

Da l'aqtaxanaxac so Pedro co'ollaq huaña yi lma' so Cornelio

34Huaña, nachi so Pedro da'aqtaxan, 'eeta':

–Nagui aÿim saÿaten da ñi Dios ÿoqta 'eesa da sa ishit da lca'atagui 'enauac na shiÿaxauasat. 35Chaqdata da ñimayi ÿataqta ÿaÿamaxadeeta ca camachicague't nam ÿotta'a't shiÿaxauapi da huo'otaq ÿataqta ñi'iÿa ñimayi qataq i'ot ca ÿaÿamaqchiguiñi. 36Ñi Dios namaxa co'ollaxa na llalaqpi so Israel da l'aqtac, dam l'aqtac mayi i'ot da nlagaxa, chigoqchigui so Jesucristo som lataxala' 'enauac na shiÿaxauapi. 37Qaq qami' qauaÿajñiita 'enauac dam huaña nam 'alhua mayi lma' na judiopi, chigoqchiguiña co'ollaxa yi Galilea, co'ollaq so Juan mashi imat da l'aqtaxanaxac qataq da nachilaxaatac na shiÿaxauapi. 38Qataq qami' qauaÿajñiita da 'eetec ñi Dios da ÿanem co'ollaxa so Jesús mayi Nazaret l'ec da l'añaxac so Espíritu Santo, qataq da 'eetec co'ollaq somayi queuotac nachi i'otec da ÿaÿamaqchiguiñi 'enauac na shiÿaxauapi mayi huetaigui da lque'ejnataxanaxac so shiÿaxaua lma'na. Qaq i'ot de'eda, cha'ayi ñi Dios hueta'aguet somayi. 39Qaq qomi' mayi nachiqomi' sauanaqchigui 'enauac nam i'otpi so Jesús co'ollaq somayi coleetapeguelec yi 'alhua Judea qataq yim la ciudad Jerusalén. Qaq co'ollaq ime, nachi somayi qaÿalauat, nachi qaiuaxanguet so npe'enaxaqui. 40Qalaxayi ñi Dios qaltaq nca'alaxateec somayi co'ollaq mashi ivi' soua tres na'axa'te, nachi qaltaq qomi' ÿachaxangueta. 41Qaq somayi sa ishit da imauec da nachaxana 'enauac na shiÿaxauapi, nachiqomaqta da ñauanaxai'. Cha'ayi ñi Dios qomi' lca'agui'shi co'ollaxa, da yaqto' qomi' sa'axataq da qadauanaqchic. Qaq qomi' ÿataqta qadqui'axaua somayi qataq qanÿomaxaua co'ollaq mashi qaltaq nca'aleec qanqoÿin. 42Nachi somayi qomi' ÿamaxalguete da sa'aqtaxanaxam 'enauac na shiÿaxauapi, da sa'axataq da ñi Dios ÿanagui somayi da nachiso so nmit qome na lasouaxashitpi nam ña nca'altauecpi qataq nam mashi ileu. 43Nataq'en som hua'a'u vi'iyi 'enauac co'ollaxa som l'aqtaxanaxanecpi ñi Dios i'axatta'aguet so Jesús, da ca i'amaqten somayi, nachi qaÿapalaxat na lasouaxashitpi, chigoqchigui da l'enaxat somayi.

Ÿaconguet so Espíritu Santo nam saq judiopi

44Qaq ña detaqtac so Pedro co'ollaq so Espíritu Santo anac, nachi tanguit 'enauac so n'axaÿaxaatega da l'aqtaxanaxac. 45Nachi som 'amqajnataxanaxaiqa judío lashi' mayi nnaictagueto so Pedro, soomayi ÿataqta huo'o da l'aalaqa' da so Espíritu Santo nataq'en ishit da qoÿanem nam sa ishit da judío l'ecpi. 46Cha'ayi souaxat da hua'aqtrega namayipi da detaqtegoiguilo naua n'aqtaqa mayi sa qaÿauanapegalo qataq ÿi'oxodeetac ñi Dios. 47Nachi so Pedro 'enapeco':

–¿Peta'a ishito' da qaillapeguem da huo'otaq qanachilaxan ne'ena shiÿaxauapi mayi tanguit so Espíritu Santo, 'eeta'ama qomi' co'ollaxa?

48Nachi damaxasoxoolec da qanachilaxan somayipi, qaÿachilaxanataxana da l'enaxat so Jesucristo. Ime, nachi qanachoxonnot so Pedro da cada'ac huo'oi na'axa'te da hueta'aguet somayipi.

Currently Selected:

Hechos 10: TBSNT

Highlight

Copy

Compare