1 Timoteo 5
5
Da 'eetec ca nataxala' da ilo'ogue na 'amqajnataxanaxaicpi
1Sa ishit da 'audolec ca ntaxaÿaxac sa nsatta ca nquedoxonec. Chaqdata da 'auchittot da qonapega, 'au'enaxatchigui ca yi'oqchigui 'adta'a. Qataq da qonapega ca nsoq, 'au'enaxatchigui ca maichi 'adqaÿa. 2Qataq da qonapega aca nquedoxona, 'au'enaxatchigui aca yi'oqchigui 'adate'e. Qataq da qonapega aca qa'añole, 'au'enaxatchigui aca maichi 'adqaÿa, yaqto' qaica ca 'an'aqtaguec sa ÿaÿamaxañi.
3'Autauan aca pa'ai da ÿataqta qaica ca pi'iÿa'a. 4Qalaxayi aca pa'ai da huo'o ca llalec huo'otaq laual, caamayi mayi hua'auyiñi ÿaÿate'n da ilodeguet qataq itaua'n aca maichi l'ac, ishiitenguet da ltaunaxanaxac soua chigoxogueta lta'al. Cha'ayi de'eda ÿataqta no'on, qataq ÿaÿamaxadeeta ñi Dios. 5Cha'ayi da huo'o aca pa'ai da huo'otaq ndoguiñi qataq qaÿalata'a't, qalaxayi mashi hueto'ot ñi Dios da naquitaxac, qataq queto'ot da nqouagaxaunaxac na na'axa'tesat qataq na pesa'chi. 6Qalaxayi aca pa'ai da nañanguet da sa ntel-la't, 'eeso'yi da ña nca'altauec, qalaxayi mashi 'ico' da ileu. 7Ÿoqo'oyi 'auamaxasoxoolec de'eda shiitega, yaqto' aca pa'ai sa ishit da huo'otaq sa ÿaÿamaxañi ca n'aqtaguec. 8Cha'ayi ca shiÿaxaua da sa ishit da huapegue' na maichi lauo' l'ecpi, que'eca shiÿaxaua sa natenguet da 'eetega lpi'iÿaxac. Lamaaxa da huo'otaq sa ishit da huapegue' ca maichi lalamaxat llalaqpi. Camayi ÿoqta napaquejlec ca saxanaxa da da'amqajnataxan.
9Qaq aca lmalate na l'enaxat ana pa'ai, ndoteec qanqoÿin ana mashi ivi' naua sesenta vi'iyi, qataq 'oonolec naq'en ca chigoxoguet lhua. 10Qataq qaÿauattoota da l'onataxanaxac ÿaÿamaqchiguiñi. Qaq 'eda da n'aqtaguec acamayi: Da ÿataqta no'on da lco'oxoc, qataq da ilo'oguet ca namaxasoxoic, qataq qaica ca huotaique da huapegue' na 'amqajnataxanaxaicpi, qataq da huo'otaq mashi itauaatac da huo'o ca huetapigui ca lÿa, qataq da huo'o ca lÿa l'onataxanaxac ÿaÿamaqchiguiñi.
11Qalaxayi sa ishit da 'edeu'a aca lmalate na n'enaxat aca pa'ai da saxanaxa da ivi' naua sesenta vi'iyi. Cha'ayi sa iuena'a da queueegue da lqopitaxanaqtaic, nachi ÿaxaañi da quegue so Cristo, cha'ayi nshitaique da qaltaq huadon. 12Qanachi huo'o da lasouaxashit, cha'ayi sa ipaguelec da nañanot so Cristo. 13Qataq taÿa da tateu'alo naua noiqa, chochi ivitta'a da qaica ca i'ot. Qaq saqdata da qaica ca i'ot, nataq'en taÿa da n'aqtaqa l'o' qataq nshiguenaxai, qataq sa ilo'oguelo naua ltaxaÿaxaco. 14Ÿoqo'oyi ana pa'ai mayi saxanaxa da ÿi'axaina', 'onaxaic da qaltaq huadon, yaqto' huo'o ca llalaqpi, qataq ishit da ilo'ogue ca lma'. Yaqto' qaica ca lligueuo ca depa'aguenataxaatac da huo'otaq ÿasaxalec ca sa ÿaÿamaxañi. 15Cha'ayi mashi huo'o ana pa'ai mayi ca'ai so Cristo da quegue so Satanás.
16Ca 'amqajnataxanaxaic, huo'otaq aca 'amqajnataxanaxai, da huo'o aca lauo' lashi pa'ai, nachi 'onaxaic da itauan qome, yaqto' acamayi sa ishit da nsallaxaune' 'enauac na 'amqajnataxanaxaicpi, yaqto' namayipi ishit da itauan aca pa'ai mayi ÿoqta qaica ca pi'iÿa'a.
17Ca nataxala' da ÿataqta ÿaÿaten da ilo'ogue na 'amqajnataxanaxaicpi, camayi ÿataqta qaÿauotec qome qataq qaitauan. Lamaaxa da nañanguet da da'aqtaxan qataq dapaxaguenataxan. 18Cha'ayi nachi nanettrañi naua ñiyigui'shi l'aqtaqa ñi Dios, 'eeta': “Sa ishit da 'ai'axattagui na lmic ca 'adauegaxanaxala' huaca da 'auapiaxanaxaalec na trigo da qanqattac ana ala.” Nataq'en 'eeta': “Qaishiiten ca 'onataxanaxaic aca maichi laueque.”
19Sa ishit da 'auqocha'a ca chochi npa'aguenataguec ca lataxala' na 'amqajnataxanaxaicpi, chaqdata da huo'otaq dos, huo'otaq tres, caua da'aqtaxa'n. 20Qalaxayi ca saq ÿaxaañi da lli'itaxaloxo, qalaq camayi ÿataqta 'auaconeu'a, ÿauaachigui naq'en 'enauac na laÿipi da qonapega, yaqto' namayipi nal'en da ñi'i. 21Da ÿaqataxac 'am sami' nagui ÿataqta qomi' ÿauaachiguilo ñi Dios qataq so qadataxala' Jesucristo nataq'en na chigaqshiguem Dios lamaxashicpi lca'aguishicpi. Ÿataqta 'aualaxalco' qome da ÿaqataxac. Sa ishit da huo'o ca 'aumatalec da 'adauotaxat, qataq sa 'alca'agui na ÿale. 22Sa ishit da 'auÿalapegue' da 'edeuo ca lataxala' na 'amqajnataxanaxaicpi, cha'ayi sa iuena'a da 'am ishipaxanaqchit ca ñi'itaxaloxoshit ÿaqa'a. 'Antela'agueto' 'enauac qome na sa ÿaÿamaxañi.
23Cha'ayi sa i'atai' da 'auet na 'adhuel, nagui sa ishit da ndoteec da 'anÿomgui na 'etaxat, chaqdata da 'anÿomgui na lataxa, qalaxayi saq 'amaqtaq naq'en.
24Cha'ayi mashi huo'o na yi'aqlec da lli'itaxaloxoshit, ichiÿa'a da qanmit. Qalaxayi huo'o na saxanaxa da yi'oq da lli'itaxaloxoshit, to' qom mashi ime da qanmit. 25Qaq nachi 'eeta'am ca ÿaÿamaqchiguiñi n'onataxanaxac yi'oqta. Qalaxayi da huo'otaq saxanaxa da yi'oq, qalaxayi sa ishit da nachi 'eetai' da saq cha'a.
Currently Selected:
1 Timoteo 5: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
