1 Tesalonicenses 1
1
So Pablo qataq soua lÿa't ÿamaxada aso lede so 'amqajnataxanaxaicpi Tesalónica l'ecpi
1Aÿim Pablo, aÿim soota'agueta naua Silvano qataq Timoteo. Qaq nagui qami' samaxalo ana ÿide, qami' ÿaqaÿañicpi 'amqajnataxanaxaicpi mayi qoñiitaña na la ciudad Tesalónica. Qami' mashi qan'ayiitau'a ñi qadta'a Dios qataq so qadataxala' Jesucristo. Ñishitaique da qauacoñiiguet da nqouagaxanaqtaic qataq da nlagaxayic mayi chigoqo'ot ñi qadta'a Dios qataq so qadataxala' Jesucristo.
Da lpi'iÿaxac so netaña yi Tesalónica ÿataqta naloqnaxanaxat
2Nachi 'eetai' da sanaqtacot da qan'achiquiaxac ñi Dios, cha'ayi ñitonaqtapeguec 'enauac da qoñiita. Ÿoqo'oyi da ñoqouagaxaunaqtac, nachi qaltaq tachigui qadhuel da qoñiita. 3Qaq ñim qadta'a Dios mayi souaqto'ot, ñimayi mayi ÿaÿateeta da qadhuennataxa da tachigui qadhuel da l'onataxanaxac da qadpi'iÿaxaqui, qataq da qadsoxoyiqui da qoviitague' na qadqaÿañicpii, qataq da qoquiito'ot qanaquitaxaqui ñi qadataxala' Jesucristo. 4Qami' qadqaÿa't, ñim Dios ÿataqta qami' ÿauoteque, qataq saÿajnaqta da ñimayi qami' lca'agui'shi. 5Cha'ayi qomi' co'ollaq qami' sa'axataxama da n'aqtac mayi chigaqaigui da nca'alaxa, qalaq sa ishit da ndoxoiqa naua qadtaxaÿaxac. Cha'ayi qomi' hueta'agueta da l'añaxac so Espíritu Santo, qataq saÿajnaqta da ÿataqta 'eesa dam sa'axataqtac. Qataq qami' ÿataqta qauaÿajñiita da qadataxac no'on co'ollaq qami' souaqta'agueta. Qaq damayi naigui da maichi qanaÿamaxataxaqui.
6Qaq qami' da machi qoñiitec co'ollaq qoquiigue da no'on qadataxala' Jesús. Co'ollaq qauacoñiiguet da n'aqtac, nachi so Espíritu Santo qami' ÿanema da qantonaxaqui. Qaq ÿoqo'oyi nai'ctaxa da saqalota da qanque'ejnaxaqui. 7Qaq nachida da 'eetec da huo'o mshi qami' ilolguete qataq qami' i'enaxa't 'enauac nam 'amqajnataxanaxaicpi mayi netalguete yiua 'ale'u Macedonia qataq yi Acaya. 8Cha'ayi qami' chigoqtoiguilo da huo'o mshi saqaÿoqtegue da n'aqtaguec so qadataxala' Jesús. Qaq sa ishit da chaqyita yi Macedonia qataq yi Acaya. Nataq'en na shiÿaxauapi mayi netalguete naua saqaÿoqtalo 'ale'u, namayipi ÿaÿaten da huo'o da qadpi'iÿaxaqui ñi Dios. Qaq ÿoqo'oyi qomi' sa iuen da qaltaq sa'axataq de'eda. 9Cha'ayi namayipi maichi n'aqtaxaatapigui da 'eetec so hua'auchiguiñi qoyiquiaxac co'ollaq qami' souaqta'agueta. Nataq'en n'aqtaxaatapigui da qadsoxosoxonaxaqui co'ollaq qomi' qauacoñiigueta, qataq da 'eetec co'ollaq qoquiÿa'ai nam nqolacpi da qoquiigue da qau'onataxañiÿot ñim Dios mayi nca'altauec qataq sa ishit da chochi n'enaqtaguetto. 10Nataq'en namayipi n'aqtaxaatapigui da qami' qauachiitaique nagui da ñi'iguelaq so Jesús som llalec ñi Dios mayi nca'aleec naq'en co'ollaq mashi ileu. Somayi mayi nachiso so qomi' nca'alaxateeguesopa qome da lchiquiaxac ca nhuaxanaguec na shiÿaxauapi mayi naÿa'cna.
Currently Selected:
1 Tesalonicenses 1: TBSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
