Лука 24
24
Глава 24
Иисус Христос арадякан
1Неделя омнилэн инэӈэӈнэн бадикар асал, кимчавур унӈэлэлдывурбур гадыдюр, дӫлдулэ биситки хуртэки#24:1Хур – здесь: грот, пещера. ӈэнритэн, ноӈарнюнтан хөнтэл-дэ боддитан. 2Тарбач нипкэлдывум дӫлу хурдук нэбдэлчэв бакритан. 3Долан иридюр, Хунӈивур Иисус Булгиссон эчилтэн бакра. 4Тарав мяӈчиддакатан, ноӈарбутан дэпки дӫр бэил гилрэнеч хуталрич оич тэтуттыл илачилритан, 5Асал, олми, итывур төрлэ ноӈкэрэкэтэн, тарал ноӈартакитан гөнитэн:
– Ядавур инив көкэчэл долитан гэлэтэс? 6Ноӈан элэ ачча, Ноӈан аррин. Дӫлилра, унэт Галилеяду бидми, хунтэки гөнчэвэн: 7«Бэй Хутэн Оча төнӈэкичу овканчал ӈалдутан хэпкэмдин, тэлгэлэвдин, илилатан инэӈэӈнэтэн ардин».
8Тарбач ноӈартан тарав, Иисус тачин гөнчэвэн, дӫнитан. 9Алдысагдук мучуридюр, мян өмэнду хупкуттынэлтэкин, хөнтэлтэки-дэ тарав тэлэӈритэн. 10Тарак Мария Магдалина, Иоанна, Иаков энинни Мария, хөнтэл-дэ ноӈарнюнтан бичэл хупкуттыӈэлтэкин тарав эйду тэлэӈчэл биситэн. 11Асал тэлэӈчэвутэн эчилтэн тэдер, чукалдаридитан гөникэн. 12Пётр-нян, хэкэркиниди, алдытки хэтэкэнин, хур долан эӈэниди, дӫрбу-ткан көкэчэв хэркэлдывум булату иттин, мучурин-нян, тарав мяӈчиникан.
13Тарав-тит инэӈу ноӈардукутан дӫр Иисус хупкуттыӈэлни Иерусалимдук мян өмэнь хулэкэч километрач тэгэдукун биситки билэктэки, Эммаусач гэрбэттытки, гиркаддытан, 14нян мэр дөливур эйду некэпчэв укчэнритэн. 15Тарбач мэр доливур укчэнмэттэкэттэн, Мэнкэн Иисус дагамриди, ноӈарнюнтан гиркадилрин. 16Тарбач ясалалтан нурутча бисин, теми эчилтэн Ноӈман тад. 17Нян Ноӈан ноӈартакитан гөнин:
– Яв-нян ху гирканикан, мэр доливур укчэнэс, ями-да набучис?
18Ноӈардукутан өмэн, Клеопач гэрбэди, ноӈантакин барагрин:
– Эв хи эмчэлдук Иерусалимна өмэн эсэнри хар, як-та эрэл инэӈэӈнэтэн тала некэпчэв?
19Нян Ноӈан ноӈартакитан гөнин:
– Як очав?
Ноӈартан Ноӈантакин гөнитэн:
– Иисуснюн Назаретанканюн опчав, Ноӈан мэтумӈэ бисин, Хэвки, чэлэн ӈөнмим дэпки некэндули, төрэндулэ-дэ эӈи бисин, 20он-да дюлэгэл хиргэчимӈэл попал, бэгэсэл-дэ усалтанду көкэнтэки Ноӈман бөритэн, нян Ноӈман тэлгэритэн. 21Бу-нян эеттивун, Ноӈан Тарак бисивэн, Ӈи Израилю айчинна, тарич-та-тта эрэв инэӈу укал илитан инэӈэӈэтэн тарак очатки одни. 22Тарбач хан-да мун асаӈалбун муну мямканитан: ноӈартан бадич алди анчиндун биситэн, 23нян Ноӈан булгиссон эчилтэн бакра, эмридюр, тэлэӈритэн, ангелал ичулчэвутэн, гөнчэвутэн-дэ Иисус инивэн. 24Тарбач хан мундук алдытки ӈэнритэн, тар асал гөнчэгчинтэн бакритан, нян Ноӈман эчилтэн иттэ.
25Таракам Иисус ноӈартакитан гөнин:
– Эрэй, ач мэргэнэл, мявундюр-да няӈал, чэлэн тэдедэвур мэтумӈэл гөнчэвутэн. 26Эв эсни тачин Христос хиланнан бис, Мэн Эскэндулэй ӈэндэй?
27Тар Моисейдук эйдудукун мэтумӈэлдук чэлэн Дукундула Ноӈман дукутчав, Иисус ноӈартакитан тэлэӈэдилрин.
28Тарбач ноӈартан ӈэнэтчэткивур билэклэ исадилритан, Ноӈан-нян часки гиркастирий ичукэттин. 29Нян ноӈартан Ноӈман бөкаттитан, гөникэн:
– Муннюн эмэбли, укал хисэлрэн.
Тар Ноӈан ноӈарнюнтан ирин, эмэбтин. 30Ок Иисус ноӈарнюнтан дебэдекту тэгэттин, килебу гадыди, тарав төрэснин, калтирин, нян ноӈардутан бөрин. 31Таракам ясалалтан аӈабтитан, нян ноӈартан Ноӈман тадытан, тарбач Иисус ноӈардутан эты ичур одын. 32Нян ноӈартан мэр дөливур төрэритэн: «Эв мут мявунты эч дуррэ, муттэки хотаранду гөндиддэкэн, нян мутту Дукунмаю уталукандиддакан?» 33Тармав часу илридюр, Иерусалимна мучуритан, нян мян өмэм өмэтту апостолалбу, ноӈарнюнтан-да бисилбу бакритан, 34төрэрилбу айдитач Хунӈит арчаван, Симонтаки ичулчэвэн. 35Ноӈартан-нян хотаранду бичэв тэлэӈритэн, Ноӈман-да тадачавур, килебу калтачалин.
Иисус Христос арча эмрэн
36Ноӈартан унэт тарав тэлэӈэдэкэтэн, Иисус мэнкэн дулкакандулатан илачилрин, гөникэн:
– Аймулдан хунду бидэн.
37Ноӈартан, аричивридюр гэрбэтми, олритан. 38Тарбач Ноӈан ноӈартакитан гөнин:
– Яв гирбэлэӈчис? Якав таррөчин экич тэдеттэ хун мэргэндулэсэн бисни? 39Мин ӈалу, Мин бодэлу-дэ коетлилрэ, эрэк Би бисэм, тэмилрэ Мину, ярутлилра, як мингэчин мусун илрэлкэн, икэрилкэн-дэ бивэттэн.
40Тачин гөникэн, Мэн ӈали, бодэли-дэ ноӈардутан ичукэнин. 41Ноӈартан, тарав хокаӈчими, эсэкэтэн унэт тарав тэдер, унэт-тэ мяӈчиракатан, Иисус ноӈарбутан улгэмрин:
– Хун деплэӈэсэн иррөчинул бисни-гу?
42Дебдэн далгатчав олрав, гамату-да нӫчэ чакаррон ноӈандун бөритэн. 43Гадыди тарав, коедэтэн дептин.
44Тар ноӈартакитан гөнин:
– Эчин биннэв Би хунтэки, хуннюн унэт бидми, гөндидӫттэм. Эйду, як-ка Мину Моисей Итундулан дукаттан, мэтумӈэл-дэ мэтундулэтэн, Хэвкив эскэндулэ икэлдулэ-дэ дукаттан, тарак эйду обдин.
45Чэлэвэн, як-ка Ноӈман Дукундула дукуттан, эйдувэн бисилбэ унувканин. 46Тарбач ноӈартакитан гөнин:
– Тачин дукуттан, тачин-да Христос хиланнан бисин, көкэми илилатан инэӈэӈнэтэн араннан-да бисин. 47-48Ху эйду коерисэн он-да бичэвэн, теми ху эйдуткин бэилтэки тэлэӈэннэсэн, мэтуннэсэн-дэ, төнӈэкичу овканчавур тэлэӈдэтэн, таракам төнӈэкичу овканчатан ноӈардукутан аталабдин. Тачин некрекэтэн, Хэвки ноӈарбутан айчидин. Иерусалимдук мэтудилӈэсэн, тарбач тадук эйдулин төрли бисилтэки бэилтэки, Мин Гэрбэву гэрбутникэн, тэлэӈӈэсэн. 49Би-нян Мин Амму гөнчэвэн хунтэки хөрукэндим, ху-си унэт городла Иерусалимна эмэбӈэсэн, няниндук хомив эӈигэвур бакакан.
Иисус Христос нянинтаки хуелдэнни
50Тадук ноӈарбутан городдук Вифаниякла хөрукэниди, Мэн ӈали огэрриди, ноӈарбутан ирэмкэттин. 51Нян тачин ирэмкэтникэн, огэски нянинтаки огэрэбникэн, ноӈардукутан хуелдэдилрин. 52Ноӈартан Ноӈантакин дылур ноӈкэритэн, нян эгдень хокаӈчинь хокаӈчиникан, Иерусалимна мучуритан. 53Хэвкив ирэмкэтникэн, эскэникэн-дэ эрэгэр Хэвки Дюлан биддитэн. Аминь (тек тачин бидэн).
Currently Selected:
Лука 24: eve
Highlight
Share
Copy
Want to have your highlights saved across all your devices? Sign up or sign in
© Библияв тулмачин Институт
Москва, 2001
ISBN 5-93943-008-2
ISBN 91-89122-50-X