Lolmav 10
10
1Aqivq jaqbheq juq-ol, Ilsaqleiqlav nail tsaol-aq hevq kovq nail phaq ya dai, ngaq nail neema lavqkhoel nee aqyu juq nail haqbhoil Miqyail bhai geeqlaoq hal nail ngaol. 2Aqyu juq Miqyail nail haqbhoil neema kev dee dee nail ngaol dai, ngal ge kivq nail ngaol. Thail hai ngaol-aoq, aqyu juq heeq nia khi neema kev nail maq ngel-ail. 3Aqyu juq neq, Miqyail nail tsaq nail daol nail phaq bhai maq heeq nia-ail, yovqgavq nail tsaq nail daol nail phaq bhai nl dov nail ngaol. Al heel ngel-i mail, aqyu juq Miqyail nail tsaq nail daol nail phaq nail kov-uvq bhai maq jaol movq ail bhiq-ail. 4Khul khi mail dai ngal-aq neq, aivq bhai neema khal thaq tsaol nail tsaol-aq iqsanl mail, tsaq nail daol nail tsaol-aq pevq lal dai, Yeiqsul Khali neq, aoldaoq kovqdaoq bhai nl gil lee-a nail ngaol.
Hevq kovq nail phaq neq, tsaol-aq iqsanl nail haqbhoil pevq nail ngaol
5Aol daoq kovq daoq bhai tavq nail tsaq nail daol nail phaq nail ganl bhai Maolseiq niail hai gevq-ai thaq nail ngaol: Aol daoq Kovqdaoq nail lavqkhoel bhai gevq-ai thaq nail khe-ai nl nail tsaol-aq neq, aqdoevq ya doevq nail ngaol dai, Maolseiq-i mail gevq-ai thaq nail, jiav nail ngaol. 6-7Thail hai ngaol-aoq, neema thaq tsaol nail phaq bhai tavq nail tsaq nail daol nail phaq neq, niail hai ge nail ngaol: “Nqtavq bhai khaq sil gaq dav lai nail-aiq. Aq navq mao ail navq nail bha khaq sil gaq aol ail nail-aiq dai, neema lavqkhoel bhai thaq saol-nvq-o” dai, ge nail ngaol. Niailhai ge nail neq, Khali bhai hevq lai nail dai khi, nqtavq bha kha sil gaq dav lai nail-aiq. Khali bhai bhi doevq kovq lal nail dai khi, mao ail navq nail bhai khaq sil gaq aol ail nail-aiq dai, ge movq nail ngaol. 8Neema thaq tsaol nail phaq bhai tavq nail tsaq nail daol nail phaq neq, khal hai ge nail ngel aiq.
“Daoq niil daoq neq, nul juq nee aqjail jail dee dee nail ngaol. Naoq nail moeqthaoq lavqkhoel bhai iqsanl, naoq nail neema lavqkhoel bhai iqsanl aol nail ngaol” dai, ge nail ngaol. Daoq niil daoq neq, nv juq-i mail cavq nail neema thaq tsaol nail phaq bhai tavq nail daoq bhai, ge movq nail ngaol. 9“Yeiqsul neq, Heeqphaq ngaol” dai, naoq nail moeqthaoq khanq khi, “Miqyail aivq bhai bhi doevq kovq lal-a nail ngaol” dai, naoq nail neema lavqkhoel nee, neema thaq tsaol haq neq, Miqyail naoq bhai hevq kovq lavq nail ngaol. 10Neema lavqkhoel nee, neema thaq tsaol nail ngel-i mail, Miqyail nail sivtavq bhai tsaq nail daol nail tsaol-aq pevq lal khi, moeqthaoq khanq-a nail ngel-i mail, hevq kovq nail phaq ya-a nail ngaol.
11“Aivq bhai neema
khal thaq tsaol nail
tsaol-aq iqsanl mail
maq ya haq sil ail” dai,
Jal liq lavqkhoel bhai gevq-ai thaq nail ngaol.
12Yuldav nail tsaol-aq khi yu nail jeq-e jaq-a dai, maq saol-nvq pav-ail. Tsaol-aq iqsanl bhai uv thaiq nail Heeqphaq teevq gaq taivq-ail jaol khi, aivq bhai khal hal nail tsaol-aq iqsanl bhai Miqyail geeqlaoq teevq bhee bivq nail ngaol. 13Jal liq lavqkhoel bhai gevq-ai thaq nail khe-ai:
“Heeqphaq Miqyail
bhai gul khi
khal thaoq hal nail
yaoq gaq yaoq-ao nee bhai
aivq hevq kovq
bhiq nail ngaol” dai,
gevq-ai thaq nail ngaol.
14Thail hai ngaol-aoq, aivq bhai neema maq thaq tsaol haq neq, khal hai khi hal nail-aiq. Aivq nail ganl maq gaiq daiq haq neq, khal hai khi neema thaq tsaol lal nia nail-aiq. Daoq cavq cavq nail tsaol-aq maq jaol haq neq, khal hai khi gaiq nia nail-aiq. 15Teevq gaq bhai iqsanl maq khoel gai aivq haq neq, daoq cavq khal hai khi cavq ail nia nail-aiq. Al hai dul dai,
“Lavq khiq tsail nail
geeqlaoq daoq
cavq nail tsaol-aq
lal-u phao,
kha dai meeq nail
ngel ail” dai,
Jal liq lavqkhoel bhai gevq-ai thaq nail ngaol.
16Thail hai ngaol-aoq, tsaol-aq iqsanl mail lavqkhiq tsail nail geeqlaoq daoq bhai nal daiq nail maq ngel-ail.
“Heeqphaq-ol,
nv juq-i mail
cavq nail daoq bhai
khaq sil gaq neema
thaq tsaol nail-aiq” dai,
Ilsaqyal iqsanl, ge-ai thaq nail ngaol.
17Neema thaq tsaol nail juq neq, ya gaiq-a nail ngel-i mail, neema thaq tsaol lal-a nail ngaol. Ya gaiq-a nail al neq, Khali nail lavqkhiq tsail nail geeqlaoq daoq yu-i mail cavq bhiq-a nail ngel-i mail, ya gaiq-a nail ngaol. 18Ilsaqleiqlav nail tsaol-aq juq maq ya gaiq-al laiq dai, ngal nal daiq movq ail nial. Mal dil ya gaiq-a nail ngaol. Jal liq lavqkhoel bhai gevq-ai thaq nail khe-ai:
“Aqyu juq nail aqthel
milkhaoq doi dai
gaiq ail khi,
aqyu juq-i mail
cavq bhiq-a nail daoq
nq jail mil jail bha
kev ail-a nail ngaol” dai,
gevq-ai thaq nail ngaol.
19Ilsaqleiqlav nail tsaol-aq juq maq heeq nia-ail laiq dai, ngal teevq pov gaoq nal daiq nail ngaol. Maolseiq-i mail ge-ai thaq nail:
“Nul juq yu nail
jeq-e jaq-a bhai
maivjeel jeel nail
neema aol lal dai,
ngal nl naol.
Nul juq nee noeq
neekha maq aol nail
jeq-e jaq-a bhai neema
phail lal dai iqsanl,
ngal nl naol” dai,
iqmoeq-u nee mail ge-ai thaq nail ngaol.
20Ilsaqyal iqsanl gee sil nail neema maq aol dai, Miqyail nail haqbhoil niail hai ge dan-a nail ngaol:
“Ngaq bhai
maq hal pov nail juq,
ngal aqyu juq bhai
bhiq moel-a nail ngaol.
Ngaq nail ganl maq
nal daiq nail juq bhai,
ngaq nail ganl bhi
heeq nia naol” dai,
ge-ai thaq nail ngaol.
21Thail hai ngaol-aoq, Ilsaqleiqlav nail tsaol-aq nail ganl aivq ge nail:
“Maq nal daiq mail
daoq kovq kovq nail
tsaol-aq bhai
bhi lal nail dai khi,
teevq n n lao ail,
ngal aqlavq tsiqkhail-ai
thaq nail ngaol” dai,
ge-ai thaq nail ngaol.
Currently Selected:
Lolmav 10: aeu
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
