Phaodaiq 19

Nqtavq bhai jaol nail tsaol-aq munl munl ma juq Miqyail bhai tsiq eeq nail ganl

1A bhai nee ngal-aq, nqtavq nee mail tsaol-aq munl munl ma nail aqthel khe-ai kav dee dee nail aqthel bhai, ngal ya gaiq-a nail ngaol. Aq thel al neq, niail hai gul nail ngaol:

“Haqleiqlulyaq!

Hevq kovq nail phaq,

seiqleiq khaoqsail

khi mail bhaqaoq,

ngadao nail Miqyail

taivq-ail jiav nail ngaol.

2Aivq yalkhaq dal nail neq,

mal dil tsaq nail daol nail ngaol.

Eeq nail maimaqlal al gaq

yu nee mail khaqmiq sev khi

miltsaq yaq luq ail

seil ail-a nail ngel-i mail,

Miqyail aivq bhai

yalkhaq dal bhiq-a nail ngaol.

Al ovqtavq,

sil-a nail aivq nail

yaqkav juq nail haqbhoil

Miqyail yaqmai-aq al gaq bhai

nl kovq bhiq-a nail ngaol” dai,

gul nail ngaol.

3Aqyu juq gaoq gul nail:

“Haqleiqlulyaq!

Meenq al meenq bhai

miqjaq tovq thail thaiq nail

miq khoiq neq,

nqmaq maqluv halyeel

dav lai nail ngaol” dai,

gul nail ngaol.

4Aq-u phao, joiqmaoq mavmaoq nvq tsel liq gaq khi mail aqdoevq phaq al liq maol peevqceevq kovdoiq doiq nail lavqkhoel nee gaol beiv khi, joiq jaq doiqbev bev ma bhai jaol deel-nvq thaq nail Miqyail bhai uqhuq thaoq thaoq ail:

“Aq miq.

Haqleiqlulyaq” dai,

gul-a nail ngaol.

5A bhai nee ngal-aq, doiqbev bev ma nee aqthel meel dov-ai leevq nail bhai, ngal ya gaiq-a nail ngaol. Aq thel al neq,

“Miqyail nail yaqkav pevq khi,

Miqyail bhai ev nail

eeq yaq nil yaq juq iqsanl-ol,

ngadao nail Miqyail bhai

tsiq eeq bhel” dai,

ge nail ngaol.

6Al ovqtavq, tsaol-aq munl munl ma nail aqthel khe-ai maqkhaiq, ulcuvq laoljaol nail aqthel khe-ai maqkhaiq, kav dee dee nail nqjaiq jaiq nail aqthel khe-ai maqkhaiq, ngal ya gaiq-a nail ngaol. Aq thel al neq, niail hai gul nail ngaol:

“Haqleiqlulyaq!

Iqsanl nail kovtavq bhai

uv thaiq nail bhaqaoq eeq nail

ngadao nail

Heeqphaq Miqyail neq,

joiq jaq nail heeqphaq

pevq lal-a nail ngaol.

7Ngadao lavqkhiq

tsail dee dee bhel.

Ngadao aivq bhai

tsiq eeq tsiq heel bhel.

Khul khi mail dai

ngal-aq neq,

Yaolyaq khaq ma

hevq nail yanq

kev lee-aoq nail ngaol.

Aivq bhai maol ail nail dai khi,

yaqmai-aq yaqnoil

aivq nail aqmaol aqmeeq-ai

lainq-ai thaq nail ngaol.

8Yaqmai-aq al gaq bhai,

haol taiv deel

haqphal phal phul

doi nail aqkhaoq-anq

bivq-a nail ngaol.

Haqphal phal phul al neq,

Miqyail nail

tsaol-aq juq-i mail

nl-a hal-a nail

tsaq nail daol nail

phaq ngaol” dai,

ge nail ngaol.

9A bhai nee ngal-aq, “Yaolyaq khaqma hevq nail bhai lal yaoq dai, bhi khul-a nail tsaol-aq neq, geeqlaoq eeq naol dai, gevq yaoq” dai, nqtavq gaqkhoel al gaq ngaq bhai ge lavq-a nail ngaol. “Daoq niil daoq neq, mal dil tsaq nail Miqyail nee dov lee-a nail daoq ngaol” dai iqsanl, ge lavq-a nail ngaol.

10Aq-u phao, ngal aivq bhai uqhuq thaoq nail dai khi, aivq nail aqkhil daoqthaoq bhai peevqceevq kovdoiq doiq-a nail ngaol. Thail hai ngaol-aoq, aivq ngaq bhai ge lavq-a nail: “Thail hai thaq khi. Naol khi naoq nail aqivq jaqbheq Yeiqsul nail salkhil khanq nail juq nee ngal iqsanl nul juq khe-ai, Miqyail nail yaqkav ngaol. Miqyail bhai uqhuq thaoq yaoq. Khul khi mail dai ngal-aq neq, Yeiqsul nail ganl salkhil khanq nail phaq neq, Miqyail nail haqbhoil ge dan nail juq bhai Aqhaqlal Miqyail-i mail bhi ge-a nail phaq pevq nail ngaol” dai, ge lavq-a nail ngaol.

Moeqphaq aqphul jeenq thaq nail teevq gaq nail ganl

11A bhai nee ngal-aq, nqtavq phao-ai thaq nail bhai, ngal yaq moel-a nail ngaol. A bhai moeqphaq aqphul teevq maol jaol khi, al maol bhai jeenq thaq nail gaq neq, saljial ivq khi tsaq nail gaq dai, khul nail ngaol. Aivq neq, tsaq nail daol nail lavqkhoel nee yalkhaq dal khi genl dev nail gaq ngaol. 12Aivq nail maivneev neq, miqjaq miqlail khe-ai dul nail ngaol. Aivq nail uqhuq bhai heel uq tsaoq mao dai tsaoq tsaoq-nq thaq nail ngaol. Aivq teevq gaq taivq-ail heeq nia nail aqmil aivq nail kovtavq bhai teevq mil gevq-ai thaq nail ngaol. 13Aivq aqsivq bhai he deev-a nail phailkhaoq heelma teevq keiv doi-nq thaq nail ngaol. Aivq nail aqmil neq, Miqyail nail Daoq dai, mil-ai thaq nail ngaol.

14Aq-u phao, nqtavq kovtavq khe genl dev nail munl munl ma juq moeqphaq aqphul jeeq khi, aivq nail haoqnao tsao thel aivq-a nail ngaol. Aqyu juq neq, haol taiv deel haqphal phal phul doi-nq thaq nail ngaol. 15Milkhaoq juq nee genl dev nail dai khi, aivq nail moeqthaoq lavqkhoel nee, tav dee dee nail thaoma teevq keiv dov lal-a nail ngaol. Aivq aqyu juq bhai hail nail joiqniaoq-i mail uv thaiq nail ngaol. Iqsanl nail kovtavq bhai uv thaiq nail bhaqaoq eeq nail Miqyail nail neema phail dee dee nail aqheeq tsilju nail ullul naoq dov duq bhai, aivq naoq nail ngaol. 16Aivq nail phailkhaoq heelma bhai maqkhaiq, aqbhaq bhai maqkhaiq, aqmil niail hai gevq-ai thaq nail ngaol.

“Heeqphaq nail

kovtavq bhai heeqphaq,

uv thaiq nail

juq nail kovtavq bhai

uv thaiq nail gaq” dai,

gevq-ai thaq nail ngaol.

17Aq-u phao, nlma bhai nqtavq gaqkhoel teevq gaq thul phaol-nvq thaq nail bhai, ngal ya moel-a nail ngaol. Nqtavq bhai bhail nail keivq-avq juq bhai aivq mail ma-ail gul bhiq-a nail: “Lal yaoq. Jaq tavq daol tavq nail haqbhoil Miqyail-i mail lav sav-ai thaq nail aqduq bhai jil lal yaoq. 18Heeqphaq juq nail haqjoil, genl dev nail munl munl ma bhai hel daiq nail aqivq juq nail haqjoil, gaq mao ail kav nail tsaol-aq juq nail haqjoil, moeqphaq khi mail al nail kovtavq bhai jeenq thaq nail tsaol-aq juq nail haqjoil, yaqkav khi yaqkav maq ngel nail juq nail haqjoil, eeq yaq nil yaq juq iqsanl nail haqjoil jaq lal yaoq” dai, gul bhiq-a nail ngaol.

19Aq-u phao, haqeiv nail jaiqyaq al maol neq, miltsaq bhai uv thaiq nail heeqphaq juq khi mail aivq nail genl dev nail munl munl ma juq nee mail moeqphaq jeenq thaq nail gaq khi mail aivq nail genl dev nail munl munl ma juq bhai genl dev nail dai khi, jil lai nail bhai, ngal ya moel-a nail ngaol. 20Thail hai ngaol-aoq, haqeiv nail jaiqyaq al maol bhai nieivq khi, Miqyail nail haqbhoil ge dan naol dai ge khi ngaol-aoq, mal dil maq ngel nail gaq bhai iqsanl, aivq nee mail teevq gaq khe-ai nieivq-a nail ngaol. Tsaol-aq al gaq neq, haqeiv nail jaiqyaq al maol nail junq deeq-ai thaq khi, al maol nail maolkhoel bhai uqhuq thaoq nail tsaol-aq bhai hevq bheel aivq dai, haqeiv nail jaiqyaq al maol nail aqmil bhai juq khi bhi heeq bhiq moel nail juq nl daiq bhiq-a nail al gaq ngaol. Aqyu nvq gaq bhai miqjaq tovq nail miq jal jal heel nail ngaqkha bhai bavqpuvq bhiq-a nail ngaol. 21A bhai nee ngal-aq, moeqphaq jeenq thaq nail gaq nail moeqthaoq nee dov lee-a nail thaoma-i mail jail ail ceevq-a nail tsaol-aq juq bhai iqsanl, heivq gil-a nail ngaol. Aq-u phao, keivq-avq iqsanl mail, aqyu juq nail haqjoil teevq bov ya jaq-a nail ngaol.

Currently Selected:

Phaodaiq 19: aeu

Highlight

Copy

Compare