Phaodaiq 18
18
Bhaq bhul loq meenq peiv ail-a nail ganl
1A bhai nee ngal-aq, nqtavq gaqkhoel yaoq gaq yaoq nqtavq nee mail yavq kha lee thail thaiq nail bhai, ngal ya moel-a nail ngaol. Aivq neq, eeq dee dee nail bhaqaoq aol khi, aivq nail seiqleiq khaoqsail bhaq da nee miltsaq bhai aqbhaq bhaq nail ngaol. 2Aivq aqthel aqkav kav dai gul nail:
“Aqmil dov nail
Bhaq bhul loq meenq,
ga peiv gil ail naol,
ga peiv gil ail naol.
Meenq al meenq neq,
haqeiv nail neivq nail
jaol duq khi,
aq jiivq aq cavq phaq nail
aqheel yaoq phaq
yaoq-ao nee nail
tsaoq uvq duq
pevq lal-a nail ngaol.
Aqjiivq aq cavq
cavq dee dee khi
yu maq hel daiq nul nail
keivq-avq iqsanl mail,
a bhai jaol nail ngaol.
3Khul khi mail dai
ngal-aq neq,
tsaol-aq iqsanl mail
aivq nee mail
khaqmiq sev nail dai
jil pheeq daol bol
laivq-a nail ngaol.
Miltsaq khe heeqphaq juq
aivq nee mail bheeq khi,
miltsaq-ai
jaiqgaiq gaiq nail juq neq,
meenq al meenq nail
hulmeeq hul bhao bhao nail
phaq bhai juq khi,
hulmeeq hul bhao
bhao lal-a nail ngaol” dai,
ge nail ngaol.
4A bhai nee ngal-aq, nqtavq kovtavq nee mail daoq yaoq daoq yaoq niail hai ge dov-ai leevq-a nail bhai, ngal ya gaiq-a nail ngaol. “Ngaq nail tsaol-aq juq-ol, aivq nail oeqbal nail haoqnao maq ya tsao thel aivq dai maqkhaiq, aivq-i mail ya daq nail khoeq nail jiovq nail juq bhai maq ya daq dai maqkhaiq, meenq al meenq nee dov lal yaoq. 5Khul khi mail dai ngal-aq neq, aivq nail oeqbal neq, nqtavq kovtavq bha kev dai, jiav tuv-ai thaq nail ngaol. Aivq-i mail nl-a hal-a nail laiq nail tsa nail juq bhai, Miqyail maq nioil peivq-ail.
6Aivq yu bhai nl bhiq-a nail khe-ai, aivq bhai nl kovq bhiq yaoq. Aivq-i mail nl thaq hal thaq-ai thaq nail khe-ai, aivq bhai nvq bhoil nl kovq bhiq yaoq. Aivq-i mail kheq-ai thaq nail khaoqanq bhai, a bhai nee maq tsil nvq bhoil kheq khi aivq bhai bhi daol yaoq. 7Aivq neq, aivq bhai aivq thaq eeq thaq heel khi, hulmeeq hul bhao bhao nail lavqkhoel nee, neekhaol sil nail ngaol. A dai nail khoeq nail jiovq nail phaq khi noeq haq noeq aoq nail phaq aivq nail kovtavq bhai bhi kev lee yaoq. Aivq nail neema lavqkhoel bhai niail hai ge thail thaiq nail ngaol: ‘Ngal neq, heeqphaq ma jiovq khi jaol deel-nvq thaq nail ngaol. Ngal miqtsiq miqma maq ngel. Ngal haq nail aoq nail phaq bhai teevq thal-iq maq ya thaoq phuq ail’ dai, ge nail ngaol. 8Al heel ngel-i mail, sil nail phaq, nioil khaoq khaoq nail phaq, moevq nail sivq nail phaq, khoeq bhiq jiovq bhiq nail niil juq, teevq n nail lavqkhoel bhai taivq-ail aivq nail lavqkhoel bhai kev lee khi, miqjaq poiv ha nail bhai ya daq nail ngaol. Khul khi mail dai ngal-aq neq, aivq bhai yalkhaq dal nail Heeqphaq Miqyail neq, bhaqaoq eeq dee dee nail ngaol.
9Meenq al meenq nee mail bheeq khi, hulmeeq hul bhao bhao nail lavqkhoel nee, neekhaol sil nail miltsaq khe heeqphaq juq neq, meenq al meenq bhai miqjaq poiv nail miq khoiq bhai ya moel-u phao, meenq al meenq nail haqbhoil nioil khaoq khaoq nail ngaol. 10Aqyu juq meenq al meenq-i mail ya daq thail thaiq nail khoeq nail jiovq nail phaq bhai, gee sil dee dee nail ngel-i mail, eqyal bha thul phaol khi niail hai ge nail ngaol: ‘Aqmil dov khi bhaqaoq mao ail eeq nail Bhaq bhul loq meenq-ol, naol geeqlaoq aqdoil ya nail ngaol. Naqli teevq lavq lavqkhoel bhai taivq-ail naoq bhai yalkhaq dal nail phaq kev lee-aoq nial’ dai, ge nail ngaol.
11Miltsaq kovtavq-ai jaiqgaiq gaiq nail juq iqsanl, meenq al meenq nail haqbhoil nioil khaoq khaoq nail ngaol. Khul khi mail dai ngal-aq neq, teevq gaq ail aqyu juq nail yalkav maq ul yaoq-aol. 12Yalkav al juq neq, phul, heel, sainl, laoq pav laol pav nail sainl, mao ail meeq nail haqphal phal phul, nel nav nav nail haqphal, bhoiqkheel nail haqphal, neltsaiq deel haqphal, huqbhiq nil nail aqbhaol yaoq phaq yaoq-ao nee, yavmav nail aqjeel khi aqphoiq phoiq dee dee nail aqbhaol-i mail lav sav-ai thaq nail yalkav, giqheel, hail khi lovmav-i mail lav sav-ai thaq nail nlmaoq iqsanl aol nail ngaol. 13Tsaoq gaoq laq phil, jaltsoiq bhai goe jaq nail phaq, thaoq nuv-ai thaq nail huqbhiq nil nail phaq, huqbhiq nil nail ulcuvq, huqbhiq nil nail ulcuvq aqheel, aqheeq tsilju nail ullul, aqtseel, khaqmul aq thail, gov, niaoqnel, yaol, moeqphaq lavlaoq, yaqkav khi tsaol-aq nail yeel, niil juq ngaol.
14Naol maivjeel jeel dee dee lai nail aqheeq allu peivq gil-aoq nail ngaol. Naoq-i mail kheel dee dee nail phaq khi meeq dee dee nail yalkav juq iqsanl, luq ail seil ail khi, naol yaqhao teevq thal-iq maq ya moel yaoq-aol.
15Yalkav al juq gaoq khi ul khi, meenq al meenq bhaq da nee hulmeeq hul bhao bhao lal-a nail jaiqgaiq gaiq nail juq neq, meenq al meenq ya daq thail thaiq nail phaq bhai gee sil dee dee nail ngel-i mail, eqyal bha thul phaol thail thaiq nail ngaol. Aqyu juq nioil khaoq khaoq khaoq ail niail hai ge nail ngaol:
16‘Mao ail meeq nail
haqphal phal phul,
nel nav nav nail haqphal khi,
neltsaiq deel haqphal dai khi,
heel, sainl khi,
laoq pav laol pav nail sainl
goe-nq thaq nail
aqmil dov nail meenq neq,
geeqlaoq aqdoil ya nail ngaol.
17A dai mao nail
yalkav iqsanl mail,
naqli teevq lavq nail
lavqkhoel bhai taivq-ail
peiv gil ail-aoq nial laq’ dai,
ge nail ngaol.
Laovq nail aqheel juq iqsanl, laovq bhai hel daiq phail nail aqivq juq iqsanl, laovq lavqkhoel bhai ganl nl nail tsaol-aq iqsanl khi, iqyaq iqma lavqkhoel bhai jaiqgaiq gaiq nail tsaol-aq iqsanl mail, eqyal bha thul phaol-nvq thaq nail ngaol. 18Aqyu juq meenq al meenq poiv thail thaiq nail miq khoiq bhai ya moel-u phao, ‘Aqmil dov nail meenq thoil meenq khe-ai dul nail meenq khul meenq jiav nail-aiq’ dai, gul dee dee nail ngaol. 19Aqyu juq yovqgavq bhai yovqgavq khaqlail hoel dav hoel dav ail nioil khaoq khaoq-a nail ngaol. Aqyu juq gul dee dee nail:
‘Aqmil dov nail meenq neq,
geeqlaoq aqdoil ya nail ngaol.
Meenq al meenq nail
lavqkhoel bhai
yalkavjiav
dee dee nail ngel-i mail,
iqyaq iqma lavqkhoel bhai
tsao nail laovq juq nail
aqheel iqsanl mail
hulmeeq hul bhao
bhao lal-a nail ngaol.
Thail hai ngaol-aoq,
naqli teevq lavq nail
lavqkhoel taivq-ail,
meenq al meenq
peiv ail-a nail ngaol’ dai,
gul nail ngaol.
20Nqtavq kovtavq bhai jaol nail juq-ol, meenq al meenq peiv ail-a nail ngel-i mail, lavqkhiq tsail yaoq. Miqyail nail tsaol-aq juq, gaqkhoel juq khi, Miqyail nail haqbhoil ge dan nail juq-ol, meenq al meenq peiv ail-a nail ngel-i mail, nul juq iqsanl lavqkhiq tsail yaoq. Khul khi mail dai ngal-aq neq, Nul juq nail haqbhoil nl kovq bhiq nail dai khi, Miqyail meenq al meenq bhai yalkhaq dal bhiq-a nail ngaol” dai, ngal ya gaiq-a nail ngaol.
21A bhai nee ngal-aq, gaq mao ail kav nail nqtavq gaqkhoel teevq gaq, lovmav heeq ma teevq heeq bavq khi, iqyaq iqma bhai bav puvq gai aivq khi ge nail:
“Niailhai dul dai,
aqmil dov nail
Bhaq bhul loq meenq bhai
maq ya moel yaoq-aol.
22Dil-nvq deeq nail aqthel,
daoqsel gul nail aqthel,
bhaoq lao jiiv nail aqthel,
nqbho jiiv nail aqthel,
naoq nail lavqkhoel bhai
maq ya gaiq yaoq-aol.
Lavqmaoq nl nail tsaol-aq
teevq gaq iqsanl,
naoq nail lavqkhoel bhai
maq jaol yaoq-aol.
Gov thaoq nail aqthel iqsanl,
naoq nail lavqkhoel bhai
maq ya gaiq yaoq-aol.
23Phalmanq nail aqbhaq iqsanl,
naoq nail lavqkhoel bhai
maq bhaq yaoq-aol.
Khaq ma hevq nail,
maol ail nail aqthel iqsanl,
naoq nail lavqkhoel-ai
maq ya gaiq yaoq-aol.
Milnee uqnee
naoq nail lavqkhoel bhai
jaiqgaiq gaiq-a nail juq,
miltsaq niil
teevq heeq heeq lao bhai,
eeq nail heel nail juq
pevq nail ngaol.
Naol neivq bhai
laol bhiq sail bhiq-a nail
bhaq da nee,
jeq-e jaq-a iqsanl mail
laiq ail-a nail ngaol.
24Miqyail nail haqbhoil
ge dan nail juq nail aqsivq,
Miqyail nail
tsaol-aq nail aqsivq dai khi,
miltsaq-ai
heivq nail bhai ya daq-a nail
tsaol-aq iqsanl nail aqsivq,
naoq nail lavqkhoel bhai
ya moel-a nail ngaol” dai,
nqtavq gaqkhoel al gaq ge lavq-a nail ngaol.
Currently Selected:
Phaodaiq 18: aeu
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
