Tsiqeeq 74
74
Tsiq eeq 74
Uqhuq thaoq nail ilkhaol il ma nee tavq lai khi hal nail ganl
Aq saq nail daoqsel
1Miqyail-ol, naol neq
khul khi mail nv juq bhai niail hai mao dai
khaonq ha lavq nail-aiq.
Naoq nail yaol khe-ai dul nail tsaol-aq juq bhai
khul khi mail neema phail dee dee khi jaol nail-aiq.
2Aq-u nee mail tsel dov-ai thaq nail
naoq nail tsaol-aq bhi pevq nail dai khi
yaqkav jiovq nail nee ul kovq lavq-a nail
naoq nail tsaol-aq juq bhai noeq kev lavq yaoq.
Aq-u naoq-i mail jaol-a nail jaol duq pevq nail
Yeel ovq gaoqjaoq bhai noeq kev lavq yaoq.
3Luq ail seil ail-a nail Yeiqlulsaqlaiq meenq bha
tsao daiq lee yaoq.
Nee jiav jiav nail juq-i mail
uqhuq thaoq nail ilkhaol il ma lavqkhoel khe
khal jiav nail yaoq phaq yaoq-ao nee
lav luq lav seil gil aoq nail bhai
lee khi hel daiq lee yaoq.
4Naoq bhai neejiav jiav nail tsaol-aq juq
uqhuq thaoq nail ilkhaol il ma lavqkhoel bhai
"Gaq lai aoq nail" dai, gul khi
al bhai pha laoq pha lail
kha thul-ai thaq nail ngaol.
5-6Aq bhaol thul nail tsaol-aq juq hail jaol bavq khi
haqtsoiq haqyal bha aqbhaol bhai thul nail khe-ai
aqyu juq
uqhuq thaoq nail ilkhaol il ma
lavqkhoel khe jiav nail
hel daiq meeq dai dailpav-i mail
lav sav-ai thaq nail aqbhaol dailpav bhai
hail jaol khi mail deeq dul-i mail
deeq khoi deeq loi-a nail ngaol.
7Aqyu juq
naoq nail uqhuq thaoq nail
ilkhaol il ma bhai
miqjaq kheq poiv gil-a nail ngaol.
Naoq nail aqmil-ai tsiq eeq nail jaol duq bhai
lav cov khi lav cavq-a nail ngaol.
8Aqyu juq neq
"Nv juq bhai oil nail phaq maq aol dai
lav cov bhel" dai, ge khi
milkhaoq lavqkhoel bhai
khal jiav nail uqhuq thaoq nail jaol duq bhai
miqjaq kheq ha-a nail ngaol.
9Nv juq neq
naoq-i mail bhi heeq bhi moel nail phaq bhai
maq ya moel yaoq-aol.
Miqyail nail haqbhoil ge dan nail juq iqsanl
maq jaol yaoq-aol.
Khaq mao kev dai niail hai jiav nail dai
teevq gaq iqsanl maq heeq nia-ail.
10Miqyail-ol
neejiav jiav nail tsaol-aq juq
khaq mao kev dai
naoq bhai meel naq meel naq ail
bhi jaol nail-aiq.
Aqyu juq naoq nail aqmil bhai
khaq mao kev dai
khal ge movq ail bhi ge nail-aiq.
11Khul khi mail naol nv juq bhai
maq tsao jao-ai lee dai jil ha lavq nail-aiq.
Naoq nail bhaqaoq yuq khi
aqyu juq bhai lav cov bhiq yaoq.
12Thail hai ngaol-aoq
Miqyail-ol, naol neq
aq-u nee mail
ngaq nail Heeqphaq pevq nail ngaol.
Naol hevq kovq nail phaq
miltsaq bhai bhi kev lee-a nail ngaol.
13Naol neq, naoq nail bhaqaoq-i mail
iqyaq iqma nvq pav bhi pav ail khi
ulcuvq lavqkhoel khe aol nail
baiv yaoq maol ma nail uqhuq
ngaoq pav-a nail ngaol.
14Al ovqtavq, Leiq bhel daq dai khul nail
baiv yaoq maol ma al maol nail
uqhuq naoq peiv khi
haqtsoiq khe jaol nail jaiqyaq bhai
bhi jaq nail haqbhoil av bhiq-a nail ngaol.
15Naol neq, laoljaol jaol yaq juq khi
ulcuvq laol bev juq bhai bhi dov lal-a nail ngaol.
Teevq thal-iq maq gee lai nia nail
laoljaol jaol ma juq bhai neq
ulcuvq bhi gee lai-a nail ngaol.
16Nqkiv khi n-gaol iqsanl
naoq nail pevq nail ngaol.
Nl ma bhala bhai naoq-i mail teivq-a nail ngaol.
17Naol neq
miltsaq khe milkhaiq iqsanl bhai lav tsaq khi
aqlaol laol nail yanq khi mail
aq coevq coevq nail yanq bhai
teivq-a nail ngaol.
18Thail hai ngaol-aoq, Heeqphaq Miqyail-ol
naoq bhai neejiav jiav nail juq neq
naoq bhai meel naq nail bhai maqkhaiq
yaq jaoq khaq lal miq thoi juq
naoq nail aqmil bhai
khal ge movq ail ge nail bhai maqkhaiq
thaq nioil peivq lavq.
19Gaq hal duq maq jiav nail
naoq nail tsaol-aq juq bhai
haqeiv dee dee nail juq nail
aqlavq lavqkhoel bhai thaq khaonq ha lavq.
Khoeq nail jiovq nail bhai ya daq thail thaiq nail
naoq nail tsaol-aq juq bhai
khaq mao iqsanl thaq nioil peivq lavq.
20Naoq-i mail nv juq bhai
saljial jaq-ai thaq nail daoq bhai
noeq kev lavq yaoq.
Milkhaoq niil khaoq nail lavqkhoel-ai
aqnav khal jiav nail bhai
haqeiv nail phaq bhee nail ngaol.
21Bhi khoeq bhi jiovq nail juq nail kovtavq bhai
haq sil nail phaq thaq bhi kev lee dei-eiq.
Haq nail aoq nail tsaol-aq juq
naoq nail aqmil bhai bhi tsiq eeq dei-eiq.
22Miqyail-ol, thul lal khi
naoq nail ganl ge bhiq thail bhiq yaoq.
Yaq jaoq khaq lal miq thoi juq
naoq bhai teevq n n lao
meel naq nail bhai thaq nioil peivq.
23Naoq bhai neejiav jiav nail juq
gul nail aqthel bhai maqkhaiq
naoq bhai lav tsoiq nail tsaol-aq juq
gul kav lal nail aqthel bhai maqkhaiq
thaq nioil peivq.
Currently Selected:
Tsiqeeq 74: aeu
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
