Tsiqeeq 7
7
Tsiq eeq 7
Tsaq nail daol nail galduq geeqlaoq hal-a nail daoq
Bheinqyaqminq nail jeq-e Khulsav nail daoq bhaq da nee, Daq bhil nail daoqsel.
1Heeqphaq Miqyail-ol, ngaq nail Miqyail-ol
ngal naoq bhai juq nail ngaol.
Ngaq bhai the kheel lee nail juq nail
aqlavq lavqkhoel nee hevq kovq lavq yaoq.
2Maq hevq kovq lavq haq neq
haqeiv nail al laq jaq sil khe-ai
tsao jao-ai lee nail gaq maq jaol nail bhai
aqyu juq ngaq bhai bavq jal-aivq lavq khi
he pav he sav lavq nail ngaol.
3Heeqphaq Miqyail-ol, ngaq nail Miqyail-ol
ngal niail hai nl-a nail jiav haq neq
ngaq nail aqlavq nl laiq lao haq neq
4ngaq nail aqtsaoq teevq gaq nail kovtavq bhai
ngaq-i mail aqdoil nl bhiq-a nail jiav khi
ngaq bhai neejiav jiav nail
tsaol-aq nail kovtavq-ai
khul maq ngel nail bhai
kav jaq-a nail jiav haq neq
5neejiav jiav nail gaq the kheel lee khi
ngaq-ai miltsaq bhai
naoq heivq lavq nail nee ovqtavq
ngaq nail seiqleiq khaoqsail bhi ga ail lavq yaoq.
6Heeqphaq Miqyail-ol, thul lal yaoq.
Neema phail khi
ngaq bhai neejiav jiav nail juq
haqeiv nail phaq nl lal nail bhai
ngaq nail haqbhoil genl dev lavq yaoq.
Ngaq nail Miqyail-ol, noeq lal yaoq.
Ngaq nail haqbhoil yalkhaq dal yaoq.
7Tsaol-aq khal jaol nail iqsanl mail
naoq nail teevq jaoq bhai bhi jil lal khi
aqyu juq nail kovtavq-ai uv thaiq yaoq.
8Heeqphaq Miqyail neq, jeq-e jaq-a juq bhai
yalkhaq dal nail ngaol.
Heeqphaq Miqyail-ol
ngal tsaq nail daol nail bhai maqkhaiq
oeqbal maq aol nail bhai maqkhaiq
hel daiq khi yalkhaq dal lavq yaoq.
Ngaq nail haqbhoil yalkhaq dal yaoq.
9Maq tsaq maq daol nail tsaol-aq juq-i mail
nl nail haqeiv nail phaq bhai bhi sunq ail gil khi
tsaq nail daol nail juq bhi doevq thul lal yaoq.
Tsaq nail daol nail Miqyail-ol, naol neq
nee noeq khi neema bhai tsao tsel nail ngaol.
10Miqyail neq, ngaq nail
doeq daq duq pevq nail ngaol.
Neema aqhaol haol nail juq bhai
hevq kovq bhiq nail ngaol.
11Miqyail neq, tsaq nail daol nail
yalkhaq dal nail gaq pevq nail ngaol.
Haq eiv nail juq bhai yaoq n yaoq n nee
neema phail nail ngaol.
12Aqyu juq neema maq noeq phal haq neq
Miqyail thaoma heeq tav-ai thaq nail nee ovqtavq
heeqnav iqsanl he thao-ai thaq khi
maoq-ai thaq nail ngaol.
13Heivq nail khe-n kha-ao
lainq-ai thaq khi
miqjaq nail heeqnav maq tsoe-i mail
he thao gil-ai thaq nail ngaol.
14Hel daiq dei-eiq.
Maq tsaq maq daol nail tsaol-aq
yaqbeiv uvq nail khe-ai, uvq lai khi
haqeiv nail phaq bhi doevq lee nail ngaol.
Yu bhai suq saq nail phaq iqsanl
yaqbeiv uvq nail khe-ai, uvq lai khi
goiqbhaoq bhaoq nail phaq
bhi doevq lee nail ngaol.
15Aqyu juq khaq duq aqnavq duq khi
yovqgavq-i mail duq-a nail bhai
yovqgavq gaoq ga bhoel ail nail ngaol.
16Yovqgavq-i mail
nl-a nail haqeiv nail phaq
yovqgavq bhai gaoq kovq lee khi
yovqgavq-i mail nl-a nail aq doil
yovqgavq bhai gaoq kev lee nail ngaol.
17Heeqphaq Miqyail
tsaq nail daol nail ngel-i mail
ngal aivq bhai geeqlaoq eeq nail ngaol.
Eeq jaiq heel jaiq nail
Heeqphaq Miqyail nail aqmil bhai
ngal daoqsel gul khi tsiq eeq nail ngaol.
Currently Selected:
Tsiqeeq 7: aeu
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.