Tsiqeeq 5
5
Tsiq eeq 5
“Hel daiq phail lavq yaoq” dai, hal nail geeqlaoq hal daoq
Daoqsel gul nail juq nail aqivq gaq bhai bhi heeq nia nail galduq: Tsil lil bhaoq lao jiiv khi gul-a nail, Daq bhil nail daoqsel.
1Heeqphaq Miqyail-ol
ngaq nail daoq bhai nal daiq lavq yaoq.
Ngal meel nail aqthel bhai gaiqlaq yaoq.
2Ngaq nail Heeqphaq-ol, ngaq nail Miqyail-ol
“Tsao jao-ai lavq yaoq” dai
ngal hal nail bhai, nal daiq lavq yaoq.
Ngal naoq bhai geeqlaoq hal nail ngaol.
3Heeqphaq Miqyail-ol
nqhao phao ngaq nail aqthel bhai
naol gaiq nail ngaol.
Nqhao phao, ngaq-i mail
hal movq nail phaq oil lavq khi
naol ge kovq lavq nail bhai
ngal daonq thail thaiq nail ngaol.
4Naol neq, laiq nail tsa nail phaq bhai
neema tsaq nail Miqyail maq ngel-ail.
Haq eiv nail juq bhai maq hav bhoel-ail.
5Khaoq sail he nail juq
naoq nail sivtavq bhai maq ya aol lal-ail.
Haq eiv nail phaq nl nail juq bhai naol bhe nail ngaol.
6Goiq bhaoq bhaoq nail juq bhai naol lav cov khi
khoiqbhaoq tsaol pheel juq bhai naol bhe nail ngaol.
7Thail hai ngaol-aoq
naoq-i mail gaoq haq goil gaiq-a nail phaq bhaq da nee
ngal naoq nail ilkhaol bhai lal kivq khi
naoq nail meeq nail haol nail
uqhuq thaoq nail ilkhaol il ma bhai
naoq bhai ev nail lavqkhoel nee
gaol beiv khi uqhuq thaoq nail ngaol.
8Heeqphaq Miqyail-ol
ngaq bhai neejiav jiav nail
tsaol-aq jaol nail ngel-i mail
naoq nail tsaq nail daol nail lavqkhoel nee
ngaq bhai hevq daiq lavq yaoq.
Naoq nail gailkhaol bhai ngal tsao kivq dai
daol coev dai lav daol lavq yaoq.
9Aqyu juq nail moeqthaoq neq
mal dil tsaq nail daoq maq aol-ail.
Aqyu juq nail neema neq
al jaiq-ail doil nail ngaol.
Aqyu juq nail khoeq ma neq
phao-ai thaq nail luqdaol khaq duq khe-ai
aqnil nil nail ngaol.
Aqyu juq nail moevqlal neq
al jaiq-ail nal daiq meeq dai
ge nia nail ngaol.
10Miqyail-ol, naol aqyu juq bhai
yalkhaq dal bhiq yaoq.
Aqyu juq-i mail lainq-ai thaq nail phaq
aqyu juq bhai bhi lav cov yaoq.
Aqyu juq oeqbal mao dai nl khi
naoq bhai genl dev lal nail ngel-i mail
naoq nail sivtavq nee the ha yaoq.
11Thail hai ngaol-aoq
naoq bhai juq nail juq neq
khaq mao iqsanl daoqsel gul khi
lavqkhiq tsail dei-eiq.
Naol aqyu juq bhai
hel daiq phail bhiq nail ngel-i mail
naoq nail aqmil bhai gaiq-a nail juq
naoq nail lavqkhoel bhai lavqkhiq tsail dei-eiq.
12Heeqphaq Miqyail-ol
tsaq nail daol nail tsaol-aq bhai
naol geeqlaoq bivq nail ngaol.
Naoq-i mail gaiq-a nail phaq neq
doeq daq duq khe-ai
aqyu juq bhai lovq phail bhiq nail ngaol.
Currently Selected:
Tsiqeeq 5: aeu
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.