Tsiqeeq 140
140
Tsiq eeq 140
"Hel daiq phail lavq yaoq" dai, hal nail geeqlaoq hal daoq
Daoqsel gul nail juq nail aqivq gaq bhai bhi heeq nia nail galduq: Daq bhil nail daoqsel.
1Heeqphaq Miqyail-ol
haqeiv nail tsaol-aq nail aqlavq lavqkhoel nee
ngaq bhai hevq dov lavq yaoq.
Tsaol-aq bhai heivq movq nail juq nail
aqlavq lavqkhoel nee
ngaq bhai hel daiq phail lavq yaoq.
2Aqyu juq khaq mao iqsanl
haqeiv nail ganl taivq-ail saol-nvq khi
genl dev nail phaq taivq-ail hal pov nail ngaol.
3Aqyu juq nail moevqlal neq
eellel nail moevqlal khe-ai dul khi
aqyu juq nail moeq kov bhai iqsanl
eellel nail dovq il dov lee nail ngaol.
4Heeqphaq Miqyail-ol
haqeiv nail tsaol-aq nail aqlavq lavqkhoel nee
ngaq bhai hevq kovq lavq yaoq.
Ngal bhi ga tsuq ail nail haqbhoil
maoq bhaoq nl nail tsaol-aq juq nee
bhi jel-ail lavq yaoq.
5Neema eeq nail heel nail juq neq
ngal maq moel lal dai
lavq phee khail-ai thaq nail ngaol.
Aqyu juq ngal lai nail gailkhaol bhai
lavq phee khail khi neeqtsaq juq
he uvq-ai thaq nail ngaol.
6Ngal Heeqphaq Miqyail bhai
"Naol neq, ngaq nail Miqyail ngaol" dai
ge bhiq-a nail ngaol.
Heeqphaq Miqyail-ol
"Tsao jao-ai lavq yaoq" dai
ngaq-i mail gul nail bhai nal daiq lavq yaoq.
7Heeqphaq Miqyail-ol
ngaq nail Heeqphaq-ol, naol neq
ngaq bhai hevq kovq nail
bhaoq aoq eeq nail gaq pevq nail ngaol.
Genl dev-u n-gaol ngaq bhai
hel daiq phail lavq-a nail ngaol.
8Naol neq haqeiv nail tsaol-aq juq-i mail
neekhaol jiav nail phaq bhai
thaq nl bhee bhiq dei-eiq.
Aqyu juq-i mail
lainq-ai thaq nail phaq bhai
thaq bhi pevq lai dei-eiq.
9Ngaq bhai neejiav jiav nail juq bhai
ga lai nail phaq thaq bivq.
Aqyu juq-i mail
goiqbhaoq bhaoq nail haqeiv nail daoq
aqyu juq nail kovtavq bhai gaoq bhi kev lee dei-eiq.
10Miqjaq miqjiiv aqyu juq nail uqhuq bhai
bhi ga dav lee dei-eiq.
Aq yu-i mail duq-ai thaq nail khaq duq bhai
bhi ga bhoel ail khi
teevq thal-iq thaq bhi dov lal dei-eiq.
11Yu bhai khal ge movq ail ge nail juq
miltsaq niil heeq bhai jaol-u phao
thaq bhi bhao thaq bhi ya lee dei-eiq.
Yu bhai heivq movq nail juq bhai iqsanl
haqeiv nail phaq bhi kev lee khi
lav luq lav seil bhiq dei-eiq.
12Heeqphaq Miqyail neq
haq nail aoq nail juq bhai
hel daiq phail bhiq khi
moevq nail sivq nail juq bhai neq
tsaq nail daol nail lavqkhoel nee
loq nail phaq bivq nail ngaol dai
ngal heeq kivq nail ngaol.
13Tsaq nail daol nail tsaol-aq juq neq
mal dil naoq nail aqmil bhai tsiq eeq khi
daol coev dai doevq nail tsaol-aq iqsanl
naoq nail sivtavq bhai ya jaol nail ngaol.
Currently Selected:
Tsiqeeq 140: aeu
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
