Genesis 45

Iqmoeq 45

Yaolsai khaq sil gaq pevq nail ganl ge dov bhiq-a nail

1Yaolsai neq, aivq nail neema maq jeeq thaiq tsaol nail ngel-i mail, aivq nail ilkhaol khe ganl nl nail juq bhai, "Ilkhaol lavqniil phao bhi dov-ail gil yaoq" dai, daoq bivq-a nail ngaol. Al heel ngel-i mail, Yaolsai neq, aivq khaq sil gaq pevq nail ganl aivq nail mailnail juq bhai ge bhiq-u phao, yu teevq gaq iqsanl maq jaol-ail.

2Thail hai ngaol-aoq, aivq-i mail aqthel aqkav kav dai nioil-a nail bhai, Iljiltuv nail tsaol-aq juq ya gaiq-a nail ngaol. Aivq-i mail noil nail ganl bhai, haol khe jaol nail heeqphaq Phaqlaol bha naqgaiq kev lai-a nail ngaol.

3Yaolsai aivq nail mailnail juq bhai, "Ngal neq, Yaolsai ngaol. Ngaq nail aqbhu aqdoevq doevq-ai haq nail ngaol laiq" dai, nal daiq bhiq-a nail ngaol. Thail hai ngaol-aoq, aqyu juq Yaolsai nail maivphaoq bhai hel daiq khi, gee sil dee dee nail ngel-i mail, khul dai gail, maq ge kovq bhiq dai, jaol nail ngaol.

4A bhai nee ngal-aq Yaolsai neq: "Ngaq nail aqjail bha jiiv bal lavq yaoq" dai, ge bhiq-u phao, aivq nail mailnail juq iqsanl, aqjail bhai jiiv bal laivq-a nail ngaol. Yaolsai ge nail: "Ngal neq, nul juq-i mail Iljiltuv milkhaoq bhai gaoq jaq lavq-a nail, nul juq nail jaqbheq Yaolsai ngaol.

5Nul juq ngaq bhai niai gaoq jaq lavq-a nail ngel-i mail, neema noeq haq khi yovqgavq bhai yovqgavq gail neema thaq phail. Khul khi mail dai ngal-aq, Miqyail neq, tsaol-aq yaq nail doevqyeel bhai hevq kovq kivq dai, nul juq nail iqmoeq, ngaq bhai bhi lee lavq-a nail ngaol.

6Milkhaoq bhai moevq nail sivq nail thel lee-a nail, niil aq-il nvq kovq teevq-eel ngel-ai haq nail ngaol. Kha jaq kha daol nail maq ya nail aqkovq niil aq-il ngaq kovq, jail-ai haq nail ngaol.

7Miqyail neq, nul juq dai khi nul juq nee mail yavq kha lee thaq nail juq aqdoevq ya doevq nail haqbhoil, eeq nail hevq kovq nail phaq-i mail nul juq bhai bhi jel-ail nail dai khi, ngaq bhai iqmoeq bhi lee lavq-a nail ngaol.

8Al heel ngel-i mail, nul juq ngaq bhai niil niai bhi lee lavq-a nail, maq ngel-ail. Miqyail-i mail bhi lee lavq-a nail ngaol. Miqyail neq, ngaq bhai Phaqlaol nail ganl bhi hel daiq phail nail gaq bhi jiovq lavq-a nail nee ovqtavq, Iljiltuv milkhaoq teevq khaoq khaoq lao bhai iqsanl, bhi uv thaiq lavq-a nail ngaol.

9Niil aq-il, nul juq ngaq nail aqbhu jaol nail bha lavqtsail mail kovq lai khi, aivq bhai niail hai ge bhiq lai yaoq: 'Naoq nail yaqyov Yaolsai niail hai ge nail ngaol: Miqyail neq, ngaq bhai Iljiltuv milkhaoq teevq khaoq khaoq lao-ai bhi uv thaiq nail teevq gaq, bhi pevq lal lavq-a nail ngaol. Ngal jaol nail bha lavqtsail mail lee yaoq.

10Naoq-ai nee mail teevq gaq khe-ai, naoq nail yaqmiq yaqyov juq, aqjievq liqdee juq, yaol juq, civqmeiv juq, niaoqnel juq dai khi, naoq-i mail khal jiav nail ildaoq maoqgaiq juq iqsanl mail oil khi, ngaq-i mail jaol nail aqjail bhai jiav nail Gaolsinq dai, khul nail miltsaq bhai jaol lee yaoq.

11Gaolsinq bhai jaol lee haq neq, ngal naoq bhai hel daiq bhiq kivq nail ngaol. Khul khi mail dai ngal-aq, moevq nail sivq nail ngaq kovq jail-ai haq nail ngel-i mail, naol dai khi naoq nail phaqyaq ma yaq juq, naoq nail jaiqyaq juq iqsanl mail maq ya jaq maq ya daol dai, haq nail aoq nail bhai maq bhi kev ail movq-il'" dai ge bhiq-a nail ngaol.

12Yaolsai, aivq nail mailnail juq bhai gaoq ge bhiq-a nail: "Niil aq-il, nul juq bhai daoq ge tsaoq thail thaiq nail gaq neq, mal dil Yaolsai pevq nail bhai, jaqbheq Bheinqyaqminq nee mail daq-n khi, nul juq iqsanl mail ya moel-aoq nail ngaol.

13Ngal neq, Iljiltuv nail milkhaoq bhai bhaqaoq kha dai eeq nail ganl bhai maqkhaiq, nul juq-i mail ya moel-a nail iqsanl mail bhai maqkhaiq, ngaq nail aqbhu bhai ge bhiq lai yaoq. Aqbhu bhai gail, niil niai lavqtsail mail hel leevq yaoq" dai, ge bhiq-a nail ngaol.

14Thail hai ge bhiq gaq-al nee ngal-aq, Bheinqyaqminq bhai phal thaiq khi mail nioil-a nail ngaol. Bheiqyaqminq gail, Yaolsai bhai phal thaiq khi mail nioil-a nail ngaol.

15Al ovqtavq, algao juq yaoq gaq yaoq-ao nee mail bhai gail teevq gaq teevq gaq-ai phal thaiq khi mail nioil-a nail ngaol. A bhai nee ngal-aq aivq nail mailnail juq neq, Yaolsai nee mail teevq gaq khe-ai, daoq ge tsaoq-a nail ngaol.

16Yaolsai nail mailnail juq kev lee thaq nail ganl ya gaiq-u phao, Phaqlaol dai khi, aivq nail ganl nl yaq juq yaoq gaq yaoq-ao nee, lavqkhiq tsail lal bhiq-a nail ngaol.

17Phaqlaol neq, Yaolsai bhai ge bhiq-a nail: "Naoq nail mailnail juq-ai, moeqphaq laljieiv nail kovtavq bhai yalkav kavq dav bhiq khi Khaqnanq milkhaoq bha lavqtsail mail bhi kovq lai khi mail,

18aqyu juq nail aqbhu dai khi phaqyaq ma yaq juq bhai bhi hel leevq yaoq. Ngal aqyu juq bhai Iljiltuv nail milkhaoq-ai jiav nail khal meeq jaiq nail aqduq bhai bhi jaol nail ngaol. Al ovqtavq, khal meeq jaiq nail heeqlaoq gaoqjal iqsanl, bhi jaq nail ngaol.

19Aqyu juq nail khaqma juq dai khi, yaqmiq yaqyov juq bhai, bhi hel leevq nail haqbhoil Iljiltuv milkhaoq khe moeqphaq lavlaoq juq gail, bhi thel laivq yaoq.

20Aqyu juq-i mail ya khaonq ha-ail ceevq nail ildaoq maoqgaiq juq bhai, khaoq thaq bhi laol. Iljiltuv milkhaoq khe khal meeq nail ildaoq maoqgaiq juq iqsanl mail, aqyu juq nail ildaoq maoqgaiq juq pevq nail ngaol" dai, ge bhiq-a nail ngaol.

21Yaqkov nail yaqyov juq gail, Phaqlaol-i mail ge nail khe-ai nl-a nail ngaol. Yaolsai gail Phaqlaol mail daoq bivq-a nail khe-ai, moeqphaq lavlaoq juq dai khi mail, jaq jaq daol daol juq bivq-a nail ngaol.

22Aivq neq, aivq nail algao juq bhai yaoq gaq yaoq-ao nee teevq gaq bhai, aqgaq aqdoi teevq jun bivq-a nail ngaol. Bheinqyaqminq bhai neq phul 300 bavq dai khi, aqgaq aqdoi ngaq jun bivq-a nail ngaol.

23Aivq nail aqbhu nail haqbhoil, Iljiltuv milkhaoq khe khal meeq jaiq nail yalkav juq moeqphaq laljieiv 10 maol bhai kavq dav khi, aivq nail aqbhu gailkhaol dov lee-u phao, bhi jaq nail galduq gov, khaqmul dai khi yaoq phaq yaoq iqsanl moeqphaq laljieiv aqma 10 maol thaoq mao dai, kavq dav bhiq-a nail ngaol.

24A bhai nee ngal-aq, aivq nail mailnail juq bhai: "Gailphail lail ma-ai teevq gaq nee teevq gaq daoqgovq maq dov mail, kovq lai yaoq" dai, ge bhiq khi, bhi kovq lai-a nail ngaol.

25Aqyu juq gail, Iljiltuv milkhaoq nee mail kovq dov lai khi, Khaqnanq milkhaoq bhai jiav nail, aqyu juq nail aqbhu nail ilkhaol bha kev lai-a nail ngaol.

26Aqyu juq neq, aqyu juq nail aqbhu bhai, "Yaolsai aqdoevq jaol-ai haq nail ngaol. Aivq neq, Iljiltuv milkhaoq teevq khaoq khaoq lao bhai uv thaiq nail gaq pevq nail ngaol" dai, ge bhiq-u phao, Yaqkov neq, noeq-u maq dov dai, pevq-ail bhiq khi, "Maq pevq lal nia-ail" dai, ge bhiq-a nal ngaol.

27Thail hai ngaol-aoq, aivq nail yaqyov juq neq, Yaolsai-i mail khal ge bhiq-a nail khe-ai, ge bhiq-u phao maqkhaiq, aivq bhai Iljiltuv milkhaoq bha bhi hel leevq nail haqbhoil, Yaolsai-i mail bhi thel lavq-a nail moeqphaq lavlaoq juq bhai ya moel-u phao maqkhaiq, neema gaq gaoq aol lal bhiq-a nail ngaol.

28A bhai nee Yaqkov ge nail: "Maldil tsaq nail ngaol. Ngaq nail yaqyov Yaolsai aqdoevq doevq-ai haq nail ngaol. Ngal maq sil nail iqmoeq aivq bhai, hel daiq moel-ail nail ngaol" dai, ge nail ngaol.

Currently Selected:

Genesis 45: aeu

Highlight

Copy

Compare