Gaqkhoel 28

Paolluv-i mail Meiqleiqdeiq eel jaol laol-n bhai jaol-u phao khe ganl

1Nv juq bhuq ail lao ail khi daolbhaq bhai lai dov-u phao, eel jaol laol-n al laol bhai Meiqleiqdeiq dai, khul nail bhai ya heeq kivq-a nail ngaol. 2Eeljaol laol-n al laol bhai jaol nail tsaol-aq juq nv juq bhai aqmeeq meeq dai, hav lavq-a nail ngaol. Maoq-aol gaoq aol lee khi, aq coevq coevq nail ngel-i mail, aqyu juq miqjaq sivtovq khi nv juq bhai hav lavq-a nail ngaol. 3Aq-u phao, Paolluv miqjaq dalphail bal lavq khi bavq poiv lal-a nail ngaol. Dovq mao ail kav nail eellel teevq maol miqjaq aqlaol laol lal-u phao dov lal khi, Paolluv nail aqlavq bhai keivq khi leel thaiq-ai thaq nail ngaol. 4Dovq mao ail kav nail eellel al maol Paolluv nail aqlavq bhai leel thaiq khi ga tseq nail bhai, a bhai jaol nail juq ya moel-a nail ngaol. Aqyu juq ge nail: “Tsaol-aq niil gaq, tsaol-aq bhai mal dil deeq heivq thaq nail gaq nial. Aivq iqyaq iqma nail lavqkhoel nee ya jel-ail khi ngaol-aoq, tsaq nail daol nail phaq aivq bhai maq bhi doevq-il” dai, aqyu juq nail gaiqlaq bhai ge pheel jaq nail ngaol. 5Thail hai ngaol-aoq, Paolluv eellel al maol bhai miqjaq lavqkhoel bhai jiivqpoiv gai aivq khi, aivq neq, khul teevq phaq iqsanl maq ngel-ail. 6“Aivq nail aqmaol bhaonq lal nail ngaol, maq ngel haq neq, teevq pov taivq-ail bavq tsuq ail khi sil nail ngaol” dai, aqyu juq noeq noeq ail hel daiq thail thaiq nail ngaol. Aqyu juq tsaq dai, hel daiq hel daiq-ail jaol khi ngaol-aoq, Paolluv khul teevq phaq iqsanl maq pevq lal nail bhai ya moel-u phao, aqyu juq noeq phal khi, “Tsaol-aq niil gaq, miqyail teevq gaq niil” dai, ge nail ngaol.

7Jaol duq al dao nail aqjail bhai, Bhulbhaq lil dai mil-ai thaq nail gaq daiyal khoeq ma jiav nail ngaol. Aivq neq, eel jaol laol-n al laol bhai aqivq jiovq nail gaq ngaol. Aivq nv juq bhai aqmeeq-ai hav lavq khi, hail n bhee dai, bhiq jaq bhi daol lavq-a nail ngaol. 8Aq-u phao, Bhulbhaq lil nail aqbhu coevq iqsanl coevq sil khi, ovqmav aqnel nal-ai bhiq nail lavqkhoel nee iq thaiq thail thaiq nail ngaol. Paolluv aivq jaol nail bha lai khi, geeqlaoq hal bhiq-a nail ngaol. A bhai nee ngal-aq, aivq nail kovtavq bhai aqlavq bavq dav bhiq khi bhi meeq lai-a nail ngaol. 9Al heel ngel-i mail, eel jaol laol-n al laol bhai jaol nail, nal nail tsaol-aq yaoq juq yaoq iqsanl lal-a nail ngaol. Paolluv aqyu juq bhai iqsanl bhi meeq lai-a nail ngaol. 10Aqyu juq iqsanl nv juq bhai meeq nia phaq nail lavqkhoel nee ev lavq khi, nv juq laovq jeeq khi dov ail-u phao, nv juq loq nail juq bhai laovq lavqkhoel bhai bavq bhoel lavq-a nail ngaol.

Paolluv Lolmav meenq bhai lai kev-a nail ganl

11Bhala hail heeq jel-ail khi, Aqleiqsaqdul meenq bhai jaol nail tsaol-aq nail laovq teevq laovq bhai jeeq khi dov ail-a nail ngaol. Laovq al laovq neq, coevqjieiv jieiv nail yanq jel ail-u phao kev dai, eel jaol laol-n al laol bhai naq-a nail ngaol. Laovq al laovq nail maolkhoel neq, teevq pov taivq-ail nvq gaq doevq lee-a nail miqyail nail maolkhoel ngaol. 12Nv juq Sullaqgul meenq bhai ail kev khi, a bhai hail n jaol-a nail ngaol. 13Nv juq a bhai nee gaoq dov-ail khi, Leiqjiqoq meenq bhai ail kev-a nail ngaol. Niaohao kheel neq, pul-nvq phaoq khe lilmoel bhoe nail ngel-i mail, halpha n-gaol neq, nv juq Bhaoldaq yallil meenq bhai ail kev-a nail ngaol. 14Nv juq a bhai aqivq jaqbheq Khali yaq juq bhai ya moel-a nail ngaol. “Nv juq nee mail sivq n jaol lavq yaoq” dai, aqyu juq nv juq bhai hal nail ngaol. Nv juq Lolmav meenq bhai al hai khi lai kev-a nail ngaol. 15A bhai jaol nail aqivq jaqbheq Khali yaq juq nv juq lal thail thaiq nail ngaol geiq dai, ya gaiq-a nail ngel-i mail, Aqbhil leiv dai khul nail dao khi Gaq naq yavqtsoel hail tsoel dai khul nail meenq bhai kev dai, nv juq bhai hav lee-a nail ngaol. Paolluv aqyu juq bhai ya moel-u phao, Miqyail bhai tsiq eeq khi, neema gaq aol lal-a nail ngaol. 16Nv juq Lolmav meenq bhai lai kev-u phao, Paolluv neq, aivq bhai lovq nail genl dev nail teevq gaq nee mail, aivq nail ilkhaol bhai aivq ya jaol dai, aqyanq ya-a nail ngaol.

Paolluv Lolmav meenq lavqkhoel bhai cavq bhiq cov bhiq-a nail ganl

17Hail n jel ail-u phao, Paolluv a bhai jaol nail Yuldav nail tsaol-aq nail lavqkhoel aqivq jiovq nail juq bhai khul jil-a nail ngaol. Aqyu juq jil lal-u phao, Paolluv aqyu juq bhai ge bhiq-a nail: “Aqivq jaqbheq juq-ol, ngadao nail jeq-e jaq-a bhai maqkhaiq, aqphiq aqbhal nail aolsaolkovq bhai maqkhaiq, ngal teevq phaq iqsanl maq nl bheeq-al. Thail hai ngaol-aoq, Yeiqlulsaqlaiq meenq lavqkhoel khe, Yuldav nail tsaol-aq juq ngaq bhai nieivq khi, Lolmav tsaol-aq nail aqlavq lavqkhoel bhai av bhiq-a nail ngaol. 18Lolmav tsaol-aq ngaq bhai aqmeeq-ai nal daiq gaq-u phao, ngaq nail lavqkhoel khe, sil heeq phaq-ail tsaq nail oeqbal maq moel-a nail ngel-i mail, phaiq bhiq movq nail ngaol. 19Thail hai ngaol-aoq, Yuldav nail tsaol-aq lav tsoiq nail ngel-i mail, ‘Heeqphaq Gailsaq jaol nail bha yalkhaq bhi dal ail lavq yaoq’ dai, ngal hal-a nail ngaol. Ngal al hai ya hal khi ngaol-aoq, ngaq nail jeq-e jaq-a nail kovtavq bhai oeqbal thaq nail maq ngel. 20Al heel ngel-i mail, nul juq bhai moel khi daoq ya ge tsaoq dai, ngal nul juq bhai khul-a nail ngaol. Ngal neq, Ilsaqleiqlav nail jeq-e jaq-a-i mail noeq thunq nail phaq bhai ngal neema thaq tsaol nail ngel-i mail, hailcav niil phee-ai thaq nail bhai, ya daq nail ngaol” dai, Paolluv aqyu juq bhai ge bhiq-a nail ngaol.

21Aq-u phao, aqyu juq ge nail: “Yuldav milkhaoq nee mail, naoq nail ganl gevq bhoel-ai lavq-a nail haoqgavq bhai, nv juq maq ya daiq-al. Aqivq jaqbheq Yuldav nail tsaol-aq teevq gaq iqsanl lal khi, naoq nail ganl maq meeq nail phaq maq ge lavq daiq-al. 22Thail hai ngaol-aoq, yu nee mail gaoq ail nail dai, khul nail munl al munl bhai khaq bhai khe jaol nail tsaol-aq iqsanl oeqbal thaq nail ngaol dai, nv juq heeq kivq nail ngaol. Al heel ngel-i mail, naoq-i mail noeq thaq-ai thaq nail juq ge lavq nail bhai, nv juq gaiq movq ail nial” dai, ge bhiq-a nail ngaol.

23Aq-u phao, aqyu juq nv peiv peiv-a nail ngaol. Nv peiv peiv-ai thaq nail aqn kev lal-u phao, tsaol-aq mao dai Paolluv jaol nail bha jil lal-a nail ngaol. Aq-u phao, Miqyail Milkhaoq nail ganl aivq teevq n n-lao salkhil khanq khanq ail, aqyu juq Yeiqsul bhai neema thaq tsaol lal dai, Maolseiq-i mail bivq-a nail aoldaoq kovqdaoq khi Miqyail nail haqbhoil ge dan nail juq nail haoqgavq bhai juq juq ail, mail ma-ail cavq bhiq cov bhiq-a nail ngaol. 24Aivq cavq bhiq cov bhiq nail bhai, tsaol-aq teevq pav ga nav juq neema thaq tsaol lal-a nail ngaol. Thail hai ngaol-aoq, teevq pav ga nav juq neq, neema maq thaq tsaol-ail. 25Aqyu juq teevq gaq nee teevq gaq maq tsaq maq jil lai mail, dov ail-a nail ngaol. Aqyu juq maq dov ail-u phao nee, Paolluv aqyu juq bhai daoq niil daoq ge bhiq-a nail ngaol: “Meeq nail Haol nail Aqhaqlal, Miqyail nail haqbhoil ge dan nail Ilsaqyal bhai juq khi, nul juq nail aqphiq aqbhal bhai ge bhiq-a nail daoq al daoq neq, tsaq dee dee nail ngaol.

26Ilsaqyal ge nail:

‘Tsaol-aq niil jeq-e

niil jaq-a

jaol nail bha ail khi

niail hai ge bhiq ail yaoq:

Nul juq ya gaiq

khi ngaol-aoq,

maq gov heeq nia-ail.

Nul juq ya moel

khi ngaol-aoq,

maq heeq nia-ail.

27Khul khi mail dai

ngal-aq neq,

tsaol-aq niil jeq-e

niil jaq-a neq,

neema aqgaol

gaol lal-a nail ngaol.

Aqyu juq maq

nal daiq movq-ail.

Maiv neev iqsanl,

maiv khul-ai

thaq nail ngaol.

Al hai maq ngel ail

nul neq,

aqyu juq

ngal jaol nail bha

kovq lal nail ngaol.

Ngal aqyu juq bhai

bhi meeq lai nail ngaol.

Aq-u phao,

aqyu juq maivneev

moel nia lal khi,

naq khaol gaiq nia

lal nail ngaol.

Neema lavqkhoel

bhai iqsanl,

noeq heeq nia

lal nail ngaol’ dai,

ge-ai thaq nail ngaol.

28Al heel ngel-i mail, nul juq niail hai heeq kivq thaq-ai yaoq. Miqyail nail hevq kovq nail ganl niil, yu nail jeq-e jaq-a bhai cavq bhiq nail ngaol. Al hai cavq bhiq-u phao, aqyu juq nal daiq nail ngaol” dai, Paolluv ge bhiq-a nail ngaol.

29[Paolluv al hai ge gaq-u phao, Yuldav nail tsaol-aq al juq dov-ail khi aqyu juq nail gaiqlaq bhai jil pheel jaq dee dee nail ngaol.]

30Paolluv neq, aivq-i mail ngaq-ai thaq nail ilkhaol bhai nvq kovq bhee dai jaol khi, aivq jaol nail bha khal lal nail tsaol-aq iqsanl bhai, hav-a nail ngaol. 31Aivq maq gee sil dai, Miqyail Milkhaoq nail ganl cavq bhiq khi, Heeqphaq Yeiqsul Khali nail ganl cavq bhiq cov bhiq-a nail ngaol. Aivq al hai cavq bhiq nail bhai teevq gaq ail, maq lav tsoiq-ail.

Currently Selected:

Gaqkhoel 28: aeu

Highlight

Copy

Compare