1 Bheiqtuvluv 2
2
1Al heel ngel-i mail, yu bhai khoeq lai dai nl movq nail, goiqbhaoq bhaoq nail, maq ngel nail bhai ngel nail khe-ai jiovq nail, yu bhai maivjeel jeel nail khi, haoqnaol phao nee khal ge movq ail ge nail, niil juq iqsanl bhai khaonq ha ail ceevq yaoq. 2Yaqbeiv aqtsil cuvq movq nail neema aol nail khe-ai, nul juq iqsanl aqhaqlal phao khe maljiaov deel aqtsil cuvq movq nail neema aol yaoq. Nul juq aqtsil al cuvq haq neq, hevq kovq nail lavqkhoel eeq lal nail ngaol. 3Khul khi mail dai ngal-aq, nul juq neq, Heeqphaq Miqyail nail aqmeeq phaq bhai ya mevqdaiq-a nail ngaol.
Aq doevq doevq nail lovmav
4Yeiqsul jaol nail bha lal yaoq. Aivq neq, aqdoevq doevq nail lovmav ngaol. Tsaol-aq yaq aivq bhai bavq ha khi ngaol-aoq, Miqyail aivq bhai tsel dov khi, aqphoiq phoiq dee dee nail lovmav ngaol dai, saol-nvq-ai thaq nail ngaol. 5Nul juq iqsanl, aqdoevq doevq nail lovmav ngaol. Miqyail nul juq bhai oil khi, aqhaqlal phao khe uqhuq thaoq nail ilkhaol cov nia dai, yovqgavq nail aqmaol Miqyail bhai av bhiq yaoq. Al ovqtavq, aqhaqlal phao laol bhiq nail phaq laol bhiq nia dai, nul juq meeq nail haol nail Phil yaq juq pevq lal nail ngaol. Nul juq Yeiqsul Khali bhai juq khi laol bhiq haq neq, laol bhiq-a nail al juq bhai Miqyail hav bhoel nail ngaol. 6Jal liq lavqkhoel-ai niail hai gevq-ai thaq nail ngaol:
“Hel daiq dei-eiq.
Ngaq-i mail
tsel dov-ai thaq nail,
aqphoiq phoiq dee dee nail
ilkhaol nail jioivqloiv bhai
kaovq-ai thaq nail
lovmav heeq ma
Yeel ovq gaoqjaoq bhai
ngal kaovq-ao nail ngaol.
Lovmav al bhai neema
khal thaq tsaol nail tsaol-aq,
maq ya haq sil ail” dai,
gevq-ai thaq nail ngaol.
7Nul juq neema khal thaq tsaol nail tsaol-aq nail haqbhoil, lovmav al heeq neq, aqphoiq phoiq dee dee nail ngaol. Thail hai ngaol-aoq, neema maq thaq tsaol nail tsaol-aq nail haqbhoil, Jal liq lavqkhoel-ai gevq-ai thaq nail khe-ai,
“Il khaol cov nail
tsaol-aq-i mail
bavq ha-a nail
lovmav al heeq,
jioivqloiv bhai
kaovq-ai thaq nail
aqphoiq phoiq
dee dee nail lovmav
pevq lal-a nail ngaol”.
8Al ovqtavq,
“Tsaol-aq phaq thiq
bhi thiq khi,
bhi bavq tsuq ail nail
lovmav iqsanl
ngel nail ngaol” dai,
gevq-ai thaq nail ngaol.
Aqyu juq Miqyail nail daoq maq nal daiq nail ngel-i mail, phaq thiq thiq khi bavq tsuq ail-a nail ngaol. Niailhai pevq lal nail ngaol dai, milnee uqnee nee Miqyail ge-ai thaq nail ngaol.
Miqyail nail tsaol-aq pevq lal-a nail ganl
9Thail hai ngaol-aoq, nul juq neq, Miqyail-i mail tsel dov-a nail jeq-e jaq-a ngaol. Heeqphaq Miqyail nail Phil yaq iqsanl ngel nail ngaol. Meeq nail haol nail milkhaoq yaq pevq khi, Miqyail nail tsaol-aq mal dil pevq nail ngaol. Miqyail-i mail nl-a nail mao ail meeq nail ganl yu bhai cavq bhiq nail haqbhoil, nul juq al hai pevq nail ngaol. Aivq nul juq bhai, aqnav nail lavqkhoel nee noeq-u maq dov nail aivq nail aqbhaq lavqkhoel bhai khul bhoel-a nail ngaol. 10Nul juq neq, aq-u phao aqmil maq jiav nail tsaol-aq ngaol. Thail hai ngaol-aoq, niil aq-il neq, Miqyail nail tsaol-aq pevq lal-a nail ngaol. Nul juq neq, aq-u phao gaoq haq gaiq-a nail geeqlaoq bhai maq ya haq-al. Thail hai ngaol-aoq, niil aq-il neq, ya-aoq nail ngaol.
Miqyail nail yaqkav jiovq yaoq
11Ngal mao ail gaiq-a nail aqtsaoq juq-ol, nul juq neq, miltsaq bhai daq-i jiovq thail thaiq nail ngaol. Al heel ngel-i mail, nul juq nail aqhaqlal bhai genl dev nail aqsivq haqjoil nail neekhaol khaonq ha ail ceevq yaoq dai, ngal nul juq bhai gaq bhiq movq ail nial. 12Nul juq laol kivq yaq nail sivtavq bhai aqmeeq phaq nl nl-ail doevq yaoq. Al hai doevq haq neq, aqyu juq nul juq bhai, haqeiv nail phaq nl nail tsaol-aq niil dai, oeqbal thaq khi ngaol-aoq, nul juq aqmeeq phaq nl nl-ail doevq nail bhai ya moel-a nail ngel-i mail, Miqyail dov lee-u n-gaol, aqyu juq aivq bhai tsiq eeq nail ngaol.
13Heeqphaq Yeiqsul bhaq da nee, heeqphaq juq nail kov-uvq bhai aqmeeq-ai jaol yaoq. Milkhaoq iqsanl bhai uv thaiq nail heeqphaq Gailsaq nail kov-uvq bhai aqmeeq-ai jaol yaoq. 14Gailsaq nail kov-uvq bhai ganl nl nail yovkav juq nail kov-uvq bhai iqsanl aqmeeq-ai jaol yaoq. Haq eiv nail tsaol-aq juq bhai dal bhiq khi, aqmeeq phaq nl nail tsaol-aq juq bhai bhi tsiq eeq nail haqbhoil, Gailsaq-i mail aqyu juq bhai khoel-ai thaq nail ngaol. 15Nul juq aqmeeq phaq bhaq da nee, khul maq heeq nail yaq jaoq khaq lal miq thoi nail moeqthaoq bhai pheethaiq nail haqbhoil, Miqyail neema tsaq nail ngaol. 16Nul juq neq, jel ail-a nail tsaol-aq ngaol. Thail hai ngaol-aoq, jel ail-a nail al bhai juq khi, haqeiv nail phaq thaq gaoq nl. Jel ail-a nail al neq, Miqyail nail yaqkav jiovq nail haqbhoil jel ail-a nail ngaol. 17Tsaol-aq iqsanl bhai ev yaoq. Aqivq jaqbheq Khali yaq juq bhai gaiq-a yaoq. Miqyail bhai gee sil yaoq. Gailsaq bhai ev yaoq.
18Yaqkav juq-ol, nul juq nail ilheel bhai ev khi aqyu juq nail kov-uvq bhai aqmeeq-ai jaol yaoq. Neema meeq khi nee nuq nee beiv aol nail ilheel juq nail kov-uvq bhai taivq-ail maq ngel nail. Haq eiv nail ilheel juq nail kov-uvq bhai iqsanl, aqmeeq-ai ev khi jaol yaoq. 19Nul juq Miqyail nail neema tsaq nail phaq bhai heeq nia nail lavqkhoel, maq ngel nail bhai kev dai, khoeq lavq jiovq lavq-u phao, daq jel ol jel haq neq, al nail haqbhoil Miqyail nul juq bhai geeqlaoq bivq lavq nail ngaol. 20Nul juq laiq nail tsa nail phaq nl nail bhaq da nee, yu deeq lal kov lal-u phao, ol khi ngaol-aoq, khul tsiq eeq nail phaq jiav nail-aiq. Thail hai ngaol-aoq, aqmeeq phaq nl-a nail ngel-i mail, ya daq-u phao, ol haq neq, Miqyail nul juq bhai geeqlaoq bivq lavq nail ngaol. 21Khul khi mail dai ngal-aq neq, nul juq al hai ya daq dai, Miqyail khul-a nail ngaol. Khali iqsanl, nul juq nail haqbhoil daq-a nail ngaol. Nul juq aivq bhai bhi saol oil khi, aivq nail aqkhil phaq yal nail haoqnao bhi tsao the nail dai khi, aivq al hai nl-a nail ngaol.
22“Aivq neq,
oeqbal maq nl daiq-al.
Aivq nail moeqthaoq
lavqkhoel-ai
goiqbhaoq bhaoq nail daoq
maq dov lal daiq-al” dai,
gevq-ai thaq nail ngaol.
23Yu aivq bhai khal ge movq ail ge khi ngaol-aoq, aivq yu bhai khal ge movq ail maq ge kovq bhiq daiq-al. Aivq ya khanq ya daq-u phao, yu bhai maq lav gee sil-al. Aqtsaq aqdaol daol dai yalkhaq dal nail Miqyail nail aqlavq lavqkhoel bhai, aivq nail aqmaol av bhiq-a nail ngaol. 24Aivq lavqyavq kovtavq bhai khanqsil-u phao, aivq nail aqmaol lavqkhoel-ai ngadao nail oeqbal phi-nq thaq nail ngaol. Ngadao yovqgavq nail oeqbal bhai yovqgavq sil ceiv khi, tsaq nail daol nail haqbhoil ya doevq dai, aivq khanqsil-a nail ngaol. Aivq-i mail nal-a nail malkhoeq bhaq da nee, nul juq meeq lai-a nail ngaol. 25Nul juq neq, aq-u phao gail bheeq bheeq khi peivq ail-a nail yaol khe-ai, dul nail ngaol. Thail hai ngaol-aoq, nul juq nail aqhaqlal bhai hel daiq phail nail yaol bhai lovqphail nail gaq jaol nail bha niil aq-il nul juq kovq lal-aoq nail ngaol.
Currently Selected:
1 Bheiqtuvluv 2: aeu
Highlight
Copy
Compare
Share
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
