1 Gaolliqthu 4

Gaq khoel juq nail ganl

1“Nul juq neq, Khali nail yaqkav pevq khi, Miqyail-i mail oil tsail-ai thaq nail juq bhai hel daiq phail nail tsaol-aq nial” dai, yu nv juq bhai saol-nvq lavq nail tsaq nail ngaol. 2Hel daiq phail nail juq neq, saljial ivq nail tsaol-aq ya pevq nail ngaol. 3Nul juq maqkhaiq, yaoq juq yaoq maqkhaiq, ngaq bhai yalkhaq dal lavq khi ngaol-aoq, khul maq khi-ail. Ngal neq, yovqgavq bhai yovqgavq yalkhaq maq dal. 4Khul khi mail dai ngal-aq neq, ngaq nail heeq kivq nail neema aqhaol ngaol. Ngal al hai noeq nail ngel-i mail, mal dil tsaq nail tsaol-aq pevq lal-a nail maq ngel-ail. Ngaq bhai yalkhaq dal nail gaq, Heeqphaq Yeiqsul ngaol. 5Al heel ngel-i mail, aqyanq maq kev lal-u phao, khul nail ganl nee maqkhaiq, yalkhaq thaq dal haq lao. Heeqphaq Yeiqsul kev lee-u phao, aqnav nail lavqkhoel oil tsail-ai thaq nail juq bhaq laoq kheq dai, bhi dov lal khi, tsaol-aq nail nee noeq nee dul bhai iqsanl bhi dov lal nail ngaol. Aq-u phao, tsaol-aq yaoq gaq yaoq-ao nee bhai geel-nvq nail khe-ai, Miqyail tsiq eeq bhiq nail ngaol.

6Aqivq jaqbheq juq-ol, Aqpaolluv nv-nvq gaq nail ganl bhai tavq lai khi nul juq nail haqbhoil saol-nvq nail lavqkhoel, ngal niail hai ge nail ngaol. Nv-nvq gaq bhai hel daiq khi Jal liq lavqkhoel bhai khal gevq-ai thaq nail khe-ai, nul juq tsao the khi doevq nia dai, ge nail phaq pevq nail ngaol. Ngadao juq nail lavqkhoel khe aqivq jiovq nail juq bhai teevq gaq bhai tsiq eeq khi teevq gaq bhai ge doil nail neq, maq tsaq-ail. 7Khul khi mail dai ngal-aq neq, khaq sil gaq nul juq bhai bhi bhee lal lavq-a nail-aiq. Miqyail nee ya-a nail maq ngel nail, nul juq khul jiav nail-aiq. Miqyail nee mail ya-a nail phal-iq neq, Miqyail nee mail maq ya-a nail khe-ai, nul juq khul khi mail neema eeq nail-aiq.

8Nul juq khal loq nail phaq iqsanl jiav gil-aoq naol laiq. Nul juq hulmeeq meeq lal gaq-ao naol laiq. Nv juq heeqphaq maq pevq lal khi ngaol-aoq, nul juq heeqphaq pevq lal-a nail laiq. Meeq nail ngaol. Nv juq iqsanl nul juq nee mail teevq gaq khe-ai heeqphaq ya jiovq dai, nul juq bhai mal dil heeqphaq bhi pevq lal movq ail nial. 9Nqtavq gaqkhoel iqsanl khi mail miltsaq yaq iqsanl bhai bhi hel daiq ga nail haqbhoil Miqyail nail gaqkhoel pevq nail nv juq bhai milkhaoq yaq juq nail sivtavq bhai bhi khoeq bhi jiovq nail dai khi, Miqyail-i mail yu nail haoqnao nao saq bhi jaol lavq thaq nail khul-i dai, ngal noeq nail ngaol. 10Nv juq Khali nail haqbhoil neenoeq neekha maq aol nail tsaol-aq ngaol-aoq, nul juq Khali nail lavqkhoel neenoeq neekha aol nail tsaol-aq nial. Nv juq gaq bhaq nail tsaol-aq ngaol-aoq, nul juq neq, gaq kav nail tsaol-aq nial. Nul juq khaoqsail eeq nail tsaol-aq ngaol-aoq, nv juq neq, yu-i mail khul maq tsoiq dai, saol-nvq-ai thaq nail tsaol-aq ngaol. 11Nv juq neq, niil aq-il kev dai, aoq moevq nail, ulcuvq moevq nail, maq ya doi maq ya gaq nail, deeq nail kov nail bhai ya daq khi, jaol duq maq bhao nail tsaol-aq pevq nail ngaol. 12Nv juq yovqgavq nail aqlavq-i mail lai jai khi ganl nl jaq thail thaiq nail ngaol. Yu nv juq bhai ivqkhail yavq lal-u phao, nv juq geeqlaoq bivq nail ngaol. Yu nv juq bhai khoeq lal jiovq lal-u phao, nv juq ol nail ngaol. 13Yu nv juq bhai khal ge movq ail ge lal-u phao, nv juq aqyu juq bhai thaoq hal nail ngaol. Niil aq-il kev dai, yu nv juq bhai miltsaq khe aq jiivq aq cavq phaq khe-ai saol-nvq-ai thaq khi, yu-i mail yav ha-ai thaq nail pavqkhuq pavq leivq khe-ai, pevq nail ngaol.

14Nul juq bhi haq sil nail dai khi, ngal niail hai gevq-a nail maq ngel. Ngal mao ail gaiq-a nail yaq khe-ai, saol-nvq-ai thaq khi, bhi yaol phaol nail dai khi, gevq-a nail ngaol. 15Khul khi mail dai ngal-aq neq, Khali nail ganl nul juq bhai cavq bhiq nail saq laq teevq meel-nvq gaq jaol khi ngaol-aoq, aqbhu teevq gaq teevq-eel ngaol. Ngal lavqkhiq tsail nail geeqlaoq daoq cavq khi, nul juq bhai Yeiqsul Khali nail lavqkhoel bhai bhi doevq lal-a nail ngaol. 16Al heel ngel-i mail, ngaq bhai saol oil yaoq dai, ngal nul juq bhai hal nail ngaol. 17Yaoq dao yaoq-ao nee jaol nail Khali yaq munl iqsanl bhai ngal cavq bhiq cov bhiq-a nail khe-ai, ngal Yeiqsul Khali bhai juq juq ail nl-a nail juq, nul juq bhai bhi ge noeq lal nail haqbhoil, Tilmolseiq bhai nul juq jaol nail bha bhi lal naol. Aivq neq, Yeiqsul nail lavqkhoel bhai saljial ivq khi, ngal mao ail gaiq-a nail yaq teevq gaq ngaol.

18“Paolluv nv juq jaol nail bha maq lal ail” dai, tsaol-aq teevq pav ga nav juq noeq noeq ail, neema eeq thail thaiq nail ngaol. 19Thail hai ngaol-aoq, Miqyail neema tsaq haq neq, mao ail maq mao lal mail, ngal nul juq jaol nail bha lal naol. Ngal lal kev haq neq, neema eeq nail tsaol-aq al juq daoq ge nail bhai, maq nal daiq-ail. Aqyu juq bhaqaoq aol ail laiq, maq aol ail laiq dai, hel daiq naol. 20Khul khi mail dai ngal-aq neq, Miqyail Milkhaoq neq, daoq ge nail bhai tavq nail maq ngel-ail. Bhaq aoq bhai tavq nail ngaol. 21Nul juq khul oil movq nail-aiq. Dailtseel oil khi bhi lal movq nail laiq. Maq ngel haq neq, goil nail gaiq-a nail lavqkhoel neema nee nuq nee beiv aol khi bhi lal movq nail laiq.

Currently Selected:

1 Gaolliqthu 4: aeu

Highlight

Copy

Compare