1 Gaolliqthu 3

Teevq gaq khe-ai Miqyail nail ganl nl nail tsaol-aq ngaol

1Aqivq jaqbheq juq-ol, aqhaqlal phao khe ganl gov heeq nia nail tsaol-aq bhai cavq bhiq nail khe-ai, ngal nul juq bhai maq cavq bhiq kivq-il. Nul juq neq, Khali nail lavqkhoel bhai neema thaq tsaol nail phao gaq bhaq nail ngel-i mail, miltsaq nail ganl taivq-ail gov heeq nia nail tsaol-aq bhai cavq bhiq nail khe-ai taivq-ail, ngal nul juq bhai cavq bhiq kivq ail teevq-eel nial. 2Nul juq neq, aqjal aqgaol maq jaq nia lal haq nail ngel-i mail, ngal nul juq bhai maq bhi jaq-ail. Aq tsil taivq-ail nul juq bhai bhi cuvq nail ngaol. Niil aq-il iqsanl, nul juq aqjal aqgaol maq jaq nia lal heeq thaq-il. 3Khul khi mail dai ngal-aq, nul juq neq, aqsivq haqjoil nail haoqnao tsao the-ai haq nail ngaol. Nul juq nail lavqkhoel teevq gaq nee teevq gaq maivjeel jeel khi iqdaiq iqtsai dov nail ngel-i mail, aqsivq haqjoil nail haoqnao tsao the khi, miltsaq yaq khe-ai aqdoevq doevq thail thaiq nail, maq ngel ail laiq. 4Teevq gaq, “Ngal neq, Paolluv nail tsaol-aq ngaol” dai, ge nail ngaol. Teevq gaq, “Ngal neq Aqpaolluv nail tsaol-aq ngaol” dai, ge nail ngaol. Nul juq al hai khal ge-u phao kev dai, nul juq miltsaq khe yaq taivq-ail pevq nail, maq ngel ail laiq.

5Aqpaolluv khaq sil gaq, Paolluv iqsanl khaq sil gaq. Nul juq neema thaq tsaol lal dai, nv-nvq gaq yaqkav jiovq thail thaiq nail ngaol. Miqyail-i mail ganl bhi nl lavq-a nail khe-ai, nv-nvq gaq yovqgavq nail ganl yovqgavq bhao nail ngaol. 6Ngal neq, kha nail gaq ngaol. Aqpaolluv neq, ulcuvq hoeq nail gaq ngaol. Thail hai ngaol-aoq, bhi doevq lal nail gaq neq, Miqyail ngaol. 7Al heel ngel-i mail, kha nail gaq khi ulcuvq hoeq nail gaq eeq nail maq ngel-ail. Bhi doevq lal nail Miqyail taivq-ail eeq nail ngaol. 8Kha nail gaq khi ulcuvq hoeq nail gaq, teevq gaq kheel ngaol. Thail hai ngaol-aoq, yovqgavq-i mail nl-ai thaq nail khe-ai, yovqgavq geeqlaoq ya nail ngaol. 9Nv-nvq gaq neq, teevq gaq khe-ai, Miqyail nail ganl nl nail tsaol-aq ngaol. Nul juq neq, Miqyail nail daiyal khi Miqyail nail ilkhaol khe-ai, dul nail ngaol.

10Miqyail ngaq bhai geeqlaoq eel jaol bivq lavq-a nail khe-ai, mao ail nia nail ilkhaol covq nail gaq khe-ai ngal iqmoeq ilmoeq cov-ai thaq nail ngaol. Yu neq, al nee cov dal laivq nail ngaol. Thail hai ngaol-aoq, khal hai khi cov dal laivq nail bhai, yaoq gaq yaoq-ao nee sativq ya thaq nail ngaol. 11Khul khi mail dai ngal-aq neq, iqmoeq ilmoeq daoqthaoq thaoq khi kaovq-ai thaq nail al neq, Yeiqsul Khali ngaol. Khul gaq maqkhaiq, yaoq phaq yaoq nee daoqthaoq maq thaoq kivq-ail. 12-13Tsaol-aq teevq gaq ga nav, phul, heel, sainl, aqbhaol, iqlaq, gov heeq oil khi, daoqthaoq thaoq-ai thaq nail al bhai nee cov dal laivq haq neq, yaoq gaq yaoq-ao nee yovqgavq-i mail nl-ai thaq nail khe-ai, dov lal nail ngaol. Khul khi mail dai ngal-aq neq, yalkhaq dal nail aqn kev lee-u phao, yaoq gaq yaoq-ao nee mail nl-a hal-a nail juq bhaq laoq kheq dai dov lal nail ngaol. Tsaol-aq yaoq gaq yaoq-ao nee mail nl-a hal-a nail juq bhai miqjaq-i mail poiv tsel daiq nail ngaol. 14Tsaol-aq teevq gaq ga nav, iqmoeq ilmoeq daoqthaoq thaoq-ai thaq nail a bhai nee cov dal laivq nail al ivq haq neq, aivq geeqlaoq ya nail ngaol. 15Tsaol-aq teevq gaq ga nav-i mail nl-a hal-a nail juq bhai miqjaq-i mail poiv ha haq neq, aivq nail geeqlaoq sunq ail nail ngaol. Thail hai ngaol-aoq, aivq neq, hevq kovq nail phaq ya nail ngaol. Hevq kovq nail al neq, miqjaq lavqkhoel nee ya jel-ail nail khe-ai, dul nail ngaol.

16Nul juq neq, Miqyail nail uqhuq thaoq nail ilkhaol il ma pevq nail bhai maqkhaiq, Miqyail nail Aqhaqlal nul juq nail lavqkhoel bhai jaol nail bhai maqkhaiq, maq heeq kivq ail laiq. 17Tsaol-aq teevq gaq ga nav Miqyail nail uqhuq thaoq nail ilkhaol il ma bhai lav cov haq neq#3.17 Uqhuq thaoq nail ilkhaol il ma dai ge nail neq, Khali yaq munl bhai ge nail ngaol. Lav cov nail dai ge nail neq, Khali yaq mul nail lavqkhoel bhai neema teevq heeq bhai maq tavq mail pavq ail nail bhai ge movq nail ngaol., Miqyail aivq bhai lav cov nail ngaol. Khul khi mail dai ngal-aq neq, Miqyail nail uqhuq thaoq nail ilkhaol il ma neq, meeq nail haol nail ngaol. Nul juq neq, uqhuq thaoq nail ilkhaol il ma al il ngaol.

18Khaq sil gaq maqkhaiq, yovqgavq bhai yovqgavq goiqbhaoq thaq bhaoq. Nul juq nail lavqkhoel khe teevq gaq ga nav, “Ngal neenoeq neekha aol naol” dai, noeq haq neq, aivq mal dil neenoeq neekha aol lal dai, iqmoeq neenoeq neekha maq aol nail tsaol-aq ya pevq-ail nail ngaol. 19Khul khi mail dai ngal-aq neq, miltsaq nail neenoeq neekha neq, Miqyail nail sivtavq bhai neenoeq neekha maq aol-ail. Jal liq lavqkhoel bhai gevq-ai thaq nail khe-ai,

“Nee noeq nee kha

aol nail tsaol-aq bhai

Miqyail aqyu juq nail

noeqheeq noeqmoel nia nail

phaq bhai juq khi,

aqyu juq bhai

nieivq nail ngaol” dai,

gevq-ai thaq nail ngaol. 20Yaoq daoq yaoq niail hai gevq-ai thaq nail ngaol:

“ ‘Nee noeq nee kha

aol nail tsaol-aq nail

nee noeq nee dul neq,

aqnieivq ngaol’ dai,

Heeqphaq Miqyail

heeq nia nail ngaol” dai,

gevq-ai thaq nail ngaol.

21Al heel ngel-i mail, tsaol-aq bhai juq khi neema thaq eeq. Khul khi mail dai ngal-aq neq, yaoq phaq yaoq-ao nee nul juq nail ngaol. 22Paolluv maqkhaiq, Aqpaolluv maqkhaiq, Geiqphal maqkhaiq, miltsaq maqkhaiq, aqdoevq phaq maqkhaiq, Aq sil phaq maqkhaiq, niil aq-il pevq thail thaiq nail juq maqkhaiq, yaqhao pevq lal nail juq maqkhaiq, iqsanl mail nul juq nail ngaol. 23Nul juq neq, Khali nail ngaol. Khali neq, Miqyail nail ngaol.

Currently Selected:

1 Gaolliqthu 3: aeu

Highlight

Copy

Compare