Pulosay kágad pa Rumián 11
11
Hodáyá wati kawm yalah nakortag
1Nun man josta kanán, Hodáyá wati kawm nazortag o dawr dátag? Hechbar! Chéá ke man wat ham Esráilié án, Ebráhémay nasl o padréch án o cha Benyáminay kabilahá. 2Hodáyá wati kawm ke cha pésará zántag, dawr nadátag. Shomá nazánét ke Pákén Ketáb Elyás Nabiay bárawá ché gwashit? Á che paymá Esráilay helápá Hodáay kerrá dazbandia kant? 3Elyás Nabia gwashit: “Oo Hodáwand! Eshán tai nabi koshtagant o tai korbánjáh karótkagant.#11:3 Karójag, bezán harójag, addh kortagén chizzéay próshag. Pasht kaptagén tahná man án o mani koshagay randá ant.”#11:3 Bádsháháni Awali Ketáb 19:10, 14. 4Bale Hodáay passaw pa áiá ché at? “Man pa wat hapt hazár mardom dáshtag ke Bahalay#11:4 Bahal, bezán darkawmáni yakk boté. démá kóndhán nakaptagant.”#11:4 Bádsháháni Awali Ketáb 19:18. 5Hamé paymá, maróchi ham lahtén choshén pasht kaptag ke Hodáay rahmatay barkatá gechén kanag butagant. 6Agan gechén bayag rahmatay barkatá ent, gorhá bezán cha kár o kerdá naent, agan cha kár o kerdá butén, gorhá bezán rahmat, rahmat nabutagat.
7Gorhá ché? Á chizz ke Esráil áiay shóházá at, naraseti, gechén kortagénán raset, bale á degaráni del seng butant. 8Anchosh ke nebeshtah ent:
“Hodáyá á gránwáb kortagant,
anchén chammi dátagant ke magendant o
anchén góshi dátagant ke maeshkonant,
tán maróchigén róchá.” #11:8 Mussáay Wáz 29:4; Eshayá Nabiay Ketáb 29:10.
9Dáudá ham gwashtag:
“Áyáni parzónag # 11:9 Parzónag, bezán soprah, kopár. dám o talké bát,
pa áyán mán gisshénókén sengé o sezáé bát,
10 chammesh tahár bátant tánke magendant o
srénesh modám komp bát.” # 11:10 Zabur 69:22-23.
11Gorhá man josta kanán, áyán thagal wártag ke bekapant o padá pád átk makanant? Hechbar! Áyáni náparmániay sawabá darkawmán neját rasetag tánke Esráiliáni hasadd pád byayt. 12Agan Esráiliáni náparmáni pa donyáyá barkat but o áyáni táwán pa darkawmán ganjé, gorhá áyáni sarjamiá imán árag o gón bayag chónén mazanén barkaté kárit.
13Oo darkawmán! Man gón shomá habará án. Nun ke mani kásedi gón darkawmán ent, wati hezmatá porarzesha zánán, 14pa é ométá ke wati jenday mardomán hasaddig bekanán o é paymá cha áyán lahténá berakkénán. 15Chéá ke, agan áyáni nazurag jahánay sohl o wassháni ent, gorhá áyáni zurag cha mordagán zendag bayagay paymén káré bit. 16Agan ártay hamá awali chánag ke Hodáay bahr ent, pák ent, gorhá bezán sarjamén tarr kortagén árt pák ent o agan bondhál#11:16 Bondhál drachkay masterén wandhál o risshag ent. pák ent, thál#11:16 Thál, bezán sháharh, sháhal. o sháharh ham pák ant.
17Agan drachkay lahtén thál próshag butag o taw ke jangali zaytunay thálé ay, á dega tháláni nyámá gón drachká paywand janag butagay o nun zaytunay bondhálay shiragá sharikdár ay, 18á dega tháláni sará pahr maband. Agan chosha kanay, mashamósh ke taw bondhál nadáshtag, é bondhál ent ke tará dáshtagi. 19Nun balkén begwashay: “Á thál próshag butant tánke man paywand janag bebán.” 20Rást ent. Á thál paméshká próshag butant ke imánesh néstat, bale taw cha imánay zórá mohr óshtátagay. Gorunák mabay o betors. 21Chéá ke agan Hodáyá drachkay asligén tháláni sará bazzag nabut, tai sará ham bazzagia nabit. 22Nun Hodáay mehrabániá o áiay trondiá bechár. Trondi pa hamáyán ent ke gonáhá kaptagant o mehrabáni pa taw ent, agan áiay mehráni sáhegá bemánay. Agan na, taw ham próshaga bay. 23Á ham, agan wati nábáwariay sará mamánant, paywand janaga bant, chéá ke Hodáyá padá áyáni paywand janagay wák o twán hast. 24Taw cha hamá zaytunay drachká próshag butagay ke wati zátá jangali ent o wati zátay helápá gón keshtagén zaytunay drachká paywand janag butagay. Gorhá allamá hamá ke é zaytunay asligén thál ant, pa arzáni gón wati jenday drachká padá paywand janaga bant.
Esráilay neját
25Oo brátán! Chó mabit ke watá dáná sarpad bebét. Paméshká mana lóthán é rázá bezánét ke Esráilay yakk bahréay sará sengdeli átkag o é sengdeli tán hamá wahdá mánit ke darkawm sarjamiá góna nabant. 26É paymá, nun sajjahén Esráila rakkit, hamá dhawlá ke nebeshtah ent:
“Rakkénók # 11:26 Rakkénók, bezán neját dayók. cha Sahyuná kayt o
Ákubay nasl o padréchay hodánáparmániá dura kant.”
27 “Wahdé mane Hodá áyáni gonáhán dura kanán
gón áyán hamé ahd o paymáná bandán.” # 11:27 Eshayá Nabiay Ketáb 59:20-21; 27:9; Eremyá Nabiay Ketáb 31:33-34.
28Esráilián wasshén mestágay sará báwar nakortag o pa shomaygi Hodáay dozhmen ant, bale Hodáyá á gechén kortagant o wati bonpirokáni sawabá Hodáyá dóst ant. 29Chéá ke Hodá wati dátagén nyámatán pacha nagipt o wati gechéná badala nakant. 30Hamá paymá ke yakk wahdé shomá Hodáay náparmán atét, bale nun cha Esráiliáni náparmániá Hodáyá shomay sará rahm kort, 31nun á náparmán butagant tánke hamé rahm ke shomay sará kanag butag, áyáni sará ham kanag bebit. 32Chéá ke Hodáyá sajjahén mardom náparmániay golám kortagant tánke sajjahénáni sará rahm bekant.
Hodáay dánái
33Wáh! Hodáay ganj o hekmat o zánt chinchok békesás ent.
Áiay paysalah cha zántá dar ant o
ráhi cha o zánagá hamá dém!
34 “Kayá Hodáwanday pegr zántag o
kay áiay sar o sój dayók butag?” # 11:34 Eshayá Nabiay Ketáb 40:13.
35 “Kayá áiárá chizzé dátag
ke Hodá áiay badalá bedant?” # 11:35 Ayyubay Ketáb 41:11.
36Chéá ke har chizz cha hamáiay némagá ent o hamáiay wasilahá ent o pa hamáiá ent. Tán abad shán o shawkat áiá sar bát. Ámin.
Currently Selected:
Pulosay kágad pa Rumián 11: HPKB
Highlight
Copy
Compare
Share
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.
